Aktivitete

Operatori i Shpërndarjes së Energjisë Elektrike GROUP (OSHEE GROUP) sh.a. dhe Banka Evropiane për Rindërtim dhe Zhvillim (BERZH) kanë nënshkruar më 10 mars 2025 Marrëveshjen e Huasë për “Projektin e Qëndrueshmërisë së OSHEE-së”.

Marrëveshja u firmos në Ministrinë e Financave nga administratori i grupit, z.Enea Karakaçi dhe përfaqësuesit e bankës, në prezencën e ministrit, z.Petrit Malaj.

Kjo hua është e garantuar nëpërmjet Marrëveshjes së Garancisë, nënshkruar midis Qeverisë së Republikës së Shqipërisë dhe Bankës Evropiane për Rindërtim dhe Zhvillim (BERZH), e cila ka për qëllim garantimin e të gjitha detyrimeve që Operatori i Shpërndarjes së Energjisë Elektrike (OSHEE GROUP) merr përsipër në kuadër të marrëveshjes së huasë.

Marrëveshja mundëson sigurimin e një huaje afatgjatë me kushte të favorshme në vlerën 45,750,000 Euro, e cila synon të rifinancojë kreditë ekzistuese overdraft me garanci shtetërore, marrë nga bankat e nivelit te dytë në vitin 2021, në periudhën e krizës energjitike në vend.

Me anë të kësaj marrëveshjeje, administratori i OSHEE GROUP z.Karakaçi deklaroi se “kompania forcon stabilitetin e saj financiar dhe optimizon strukturën e borxhit, duke siguruar burime financimi më pak të kushtueshme dhe më të qëndrueshme, për të mundësuar financimin e shpenzimeve të rëndësishme kapitale të gjelbërta e të rëndësishme, në zhvillimin, menaxhimin dhe efiçencën e rrjetit shpërndarës të energjisë elektrike në Shqipëri”.

Sipas z.Karakaçi, OSHEE Group dëshmon qartë faktin se tashmë, institucionet financiare ndërkombëtare e konsiderojnë një partner të sigurtë dhe me një qëndrueshmëri financiare në vitet në vijim.

Kjo nismë është pjesë e angazhimit të Qeverisë Shqiptare dhe BERZH-it, për të mbështetur sektorin energjetik dhe për të garantuar një menaxhim më efikas të burimeve financiare, duke rritur qëndrueshmërinë operacionale të OSHEE GROUP dhe duke përmirësuar shërbimet ndaj qytetarëve.

Zv/kryeministrja dhe ministrja e Infrastrukturës dhe Energjisë, znj.Belinda Balluku e shoqëruar nga administratori i OSHEE GROUP, z.Enea Karakaçi dhe administratori  i OSSH, z.Blendian Dalipi, ndoqën nga afër procesin e leximit të konsumit në matësat e energjisë elektrike, te një bllok pallatesh në Tiranë.

Sipas vendimit të ERE, më datë 1 shkurt ka nisur zbatimi i aplikimit për tarifat e reja të energjisë elektrike për konsumatorët familjarë. Çmimi i ri bazohet në dy kategori konsumi:

• 8,5 lekë për kilovat për abonentët që konsumojnë deri në 700 kilovatorë
• 9,5 lekë për të gjithë ata që e kalojnë fashën e konsumit

Administratori i OSHEE Group Enea Karakaçi tha se procesi i leximit të matësit konsiderohet mjaft i rëndësishëm, prandaj dhe OSHEE Group ka ndërmarrë një sërë masash me qëllim për të garantuar një faturim sa më korrekt dhe në kohë për çdo abonent.

“Kemi nxjerrë një urdhër të posaçëm ku kemi referuar të gjitha dinamikat e procesit të leximit, datat përkatëse kur fillon dhe mbaron, në mënyrë që periudha e konsumit të jetë 30 ditë.

Çdo konsum mbi 700 kilovat do t’i regjistrohen të dhënat në sistemin e faturimit, bazuar edhe mbi foto nga çasti i leximit, për të qenë sa më të saktë dhe transparentë me klientët për çdo ankesë që mund të kenë”, nënvizoi administratori i OSHEE Group, Enea Karakaçi.

Administratori i Operatorit të Sistemit të Shpërndarjes, Blendian Dalipi theksoi rëndësinë e transparencës për lexim të sigurt të konsumit të energjisë.

“Nga ky muaj e në vazhdim janë shtuar filtrat për leximin e faturimit. Që do të thotë, në rast se një fotografim i aparatit matës nuk është i qartë nga operatorët në sistem ky lexim nuk kalon për faturim, por i kërkohet edhe një herë lexuesit të rikthehet dhe ta riverifikojë. Fotot që dërgohen në sistem, bashkë me gjeolocation, duhet të jenë 100% të sigurta që të konfirmojmë që leximi i matësit korrespondon me leximin e sistemit”.

Ministrja e Infrastrukturës dhe Energjisë, znj.Belinda Balluku tha se muaji shkurt, është muaji i parë që aplikohet çmimi sipas kategorisë së konsumit, duke vënë theksin tek rëndësia e procesit të leximit me qëllim që ai të jetë sa më i drejtë.

“Arsyeja pse ne vendosëm që të aplikonim një çmim më të ulët sipas kategorive të konsumit, 8,5 lekë për konsumin nga 0 deri në 700 kilovat-orë është sepse kërkojmë që të sensibilizojmë të gjithë popullatën, të gjithë familjarët të cilët përfitojnë nga kjo paketë mbi 1 milion abonentë, që energjia është një mall shumë i rëndësishëm, i cili edhe duhet kursyer.

Patjetër përdorimi i tij është i domosdoshëm në jetën e përditshme, por kursimi është akoma më i rëndësishëm për shkak edhe të të gjitha kushteve që ne kemi, hidrocentraleve, varësisë nga moti”, nënvizoi Balluku.

Ky është muaji i parë që ne do të aplikojmë çmimin, por nga ana tjetër e gjithë procedura është e dizenjuar nga fillimi deri në fund që të jetë transparente.

Nga ulja e çmimit të energjisë me gati 10,5% përfitojnë afro 1 milion abonentë familjarë në të gjithë vendin.

Në të gjithë vendin OSSH numëron 870 punonjës me detyrën e lexuesit të matësit të energjisë. Në janar të këtij viti OSHEE shpalli 120 vende vakante në këtë pozicion, ku afati i aplikimit ishte data 5 shkurt. Në këtë thirrje, pranë kompanisë janë paraqitur 542 aplikime.

Zv.kryeministrja dhe ministre e Infrastrukturës dhe Energjisë, Belinda Balluku inspektoi punimet për riparimin dhe fuqizimin e nënstacionit “Tirana 1”, në zonën e “Zogut të Zi”, i cili pritet të përfundojë në maj të këtij viti.

Projekti i rikonstruksionit ka nisur në maj të 2024 dhe aktualisht kanë përfunduar 95% e punimeve, por nënstacioni nuk e ka ndërprerë në asnjë moment furnizimin me energji elektrike për 25 mijë banorë të kësaj zone.

“Në këtë nënstacion, të ndërtuar 75 vite më parë, është duke u zëvendësuar e gjithë teknologjia, duke rritur kapacitetin nga 33 mega në 100 mega. Në të gjithë vendin aktualisht janë në riparim disa nënstacione dhe po ndërtohen disa të tjera të reja”, u shpreh ministrja e Energjisë Belinda Balluku.

Administratori i OSSH, Blendian Dalipi, përmendi disa nga investime ku po punohet aktualisht, sic janë punimet për rikonstruksionin e NST Lezhës, Velipojës. Po ashtu, ka përfunduar nënstacioni i Pogradecit, edhe aty është kaluar nga operimi 10 kV, në 20 kV.

“Po riparohet nënstacioni i Kuçovës, ndër më të rëndësishmit të zonës së Jugut.
Prej gati një viti ka nisur ndërtimi i një nënstacioni të ri në Fier i cili shërben për të gjithë qarkun e Fierit, Lushnjës dhe pjesës tjetër të Jugut si një një garanci për furnizimin e gjithë kësaj zone” tha administratori i OSSH, Blendian Dalipi.
Administratori Dalipi theksoi se OSSH ka planifikuar dhe ndërtimin e nënstacioni të ri në Piqeras, si siguri për të gjithë bregun, si dhe do të riparohet nënstacioni i Xarës që i shërben Ksamilit, si përgjigje ndaj zhvillimeve urbane në atë zonë.

Tjetër nënstacion i cili po riparohet, tha Dalipi, është ai i Akërnisë, që i shërben rajonit të Vlorës, por do të shërbejë edhe si siguri për aeroportin e ri të Vlorës.

“Njëkohësisht po punohet për fuqizimin e nënstacionit të Skraparit, i cili deri dje ka operuar në pothuajse 100% të kapaciteteve të tij. Kemi futur në fuqizim dhe riparim linjën Kafaraj-Fier dhe nënstacionin e ri të Kafarajt”, deklaroi Dalipi.

Sa i takon nivelit të humbjeve teknike në rrjetin elektrik, në fund të vitit 2024 ato zbritën në 17% duke shënuar një shifër rekord, ndërsa objektivi është të arrihet niveli 16%.

“Të gjitha nënstacionet që po fuqizohen, riparohen apo ndërtohen të reja, kontribuojnë pa dyshim në rritjen e cilësisë së ofrimit të shërbimit të shpërndarjes së energjisë, por nga ana tjetër mbështesin qëllimin për uljen e humbjeve teknike, pasi ulja e humbjeve teknike është edhe kursim parash, të cilat shkojnë më pas në uljen e çmimit, siç kemi bërë edhe duke nisur nga 1 shkurti”, deklaroi ministrja Balluku.

Zv/kryeministrja dhe ministrja e Infrastrukturës dhe Energjisë, Belinda Balluku, administratori i OSHEE-së, Enea Karakaçi dhe administratori i OSSH-së, Blendian Dalipi zhvilluan një takim me lexuesit e matjes së energjisë elektrike në terren, për të diskutuar planin teknik e administrativ që do të zbatohet me aplikimin e skemës së re të faturimit nga data 1 shkurt.

Një nga masat kryesore që ka ndërmarrë OSHEE Group për garantimin e leximit korrekt, është shtimi me 120 lexues të rinj, duke e çuar në 1000 numrin e punonjësve të leximit të energjisë elektrike në terren.

“Kemi një trupë të konsiderueshme prej 870 punonjësish. Kësaj trupe do t’i shtohen edhe 120 punonjës të rinj, pasi nga 1 shkurti OSHEE do të aplikojë një çmim të ri, 10,5% më të ulët për më shumë se 1 milion abonentë familjarë, që përbëjnë 95% të numrit total të abonentëve. Nuk duhet të ketë vonesa, pasi do të dëmtohej abonenti, duke kaluar masën 700 kilovat-orë dhe nuk do të mund të përfitonte çmimin e ulur të energjisë”, deklaroi zv/kryeministrja.

Administratori i OSHEE-së, Enea Karakaçi theksoi se leximi është ndër elementet kryesore gjatë këtij procesi, me qëllim që qytearët të mos kenë shqetësime të tepërta.

“Ulja e çmimit të energjisë elektrike është një lajm që ne si kompani na bën krenar për rezultatet e arritura gjatë 2024-s, ku një prej treguesve është reduktimi i ankesave të abonentëve me 30 përqind, në krahasim me vitin 2023.

Leximi është ndër elementet kryesore të skemës së re të faturimit. Që nga dita e sotme është hapur aplikimi në faqen e oshee.al për 120 lexues të rinj dhe kërkohet që aplikanti të ketë përfunduar shkollën e mesme, si dhe të ketë dëshmi të pastër penaliteti.”, u shpreh administratori i OSHEE Group Enea Karakaçi.

Administratori i Operatorit të Sistemit të Shpërndarjes (OSSH), Blendian Dalipi, u shpreh se lexuesit e matësve elektrikë do të hedhin në mënyrë manuale të dhënat përmes aparatit PDA. Ky aparat është i lidhur online dhe të dhënat transmetohen në qendër, ku stafi proceson hedhjen e të dhënave dhe printon faturat.

Nga ana e OSSH-së, janë identifikuar të gjithë abonentët që shpenzojnë mesatarisht nën 700 dhe mbi 700 kilovat-orë energji në muaj.

“Pika delikate është se të gjithë lexuesit duhet të shkojnë fizikisht dhe të lexojnë matësat, dhe asnjë lexim të mos bëhet në mënyrë fiktive. Nëpërmjet aparatit kemi krijuar mundësinë e përcaktimit të vendndodhjes së lexuesit. Në rast se konsumatorët do të kenë ankesa, nëpërmjet aparatit ne verifikojmë nëse lexuesi ka qenë në datën e duhur dhe në momentin që është bërë leximi. Leximi do të kryhet në ciklin 30 ditor”, tha administratori i OSSH-së, Blendian Dalipi.

Faza e parë e përzgjedhjes së lexuesve të rinj do të bëhet më 5 shkurt.

Njësia e projekteve të huaja në OSHEE Group, në bashkëpunim me bankën KfË, do të nisë procedurën e prokurimit ndërkombëtar për projektin “Programi i investimeve në Shpërndarjen e Energjisë I”.

Ky projekt i vjen në ndihmë OSHEE Group, të forcojë  strukturën organizative dhe funksionimin e tij, për të mbështetur zgjerimin dhe modernizimin e sistemit elektrik të Shqipërisë.

Kjo përpjekje trajton nevojën e vendit për infrastrukturë të përmirësuar të energjisë elektrike dhe efikasitet më të madh të energjisë, në kuadër të Programit të investimeve në Shpërndarjen e Energjisë I.

 Programi pritet të përfundojë 3 komponentët e tij të parë deri në fund të vitit 2026, të cilët përfshijnë modernizimin e sistemit SCADA, përmirësimet në sistemet e shpërndarjes dhe dispecimet, ndërtimin e nënstacioneve të reja dhe zgjerimin e rrjetit të tensionit të mesëm.

OSHEE Group fton të gjitha kompanitë e interesuara të marrin pjesë në tenderin ndërkombëtar për projektin “Programi i investimeve në Shpërndarjen e Energjisë I”.

Klikoni këtu për të parë thirjen e hapur për procedurën e prokurimit ndërkombëtar

Nga data 1 shkurt 2025, mbi 1 milion abonentë që konsumojnë deri në 700 kWh dhe që përbëjnë 95% të abonentëve të OSHEE, do ta paguajnë më lirë energjinë elektrike.

Sipas vendimit që tashmë është aprovuar dhe nga Enti Rregullator i Energjisë, çmimi i energjisë elektrike në Republikën e Shqipërisë nga 9.5 lekë për kilovat orë do të shkojë në 8.5 lekë për kilovat-orë për fashën nga 1-700 kilovat orë dhe 9.5 lek për konsumin mbi 700 kilovat orë.

Në një konferencë të përbashkët për mediat, kryeministri Edi Rama së bashku me zv/kryeministren dhe njëherësh ministre e Infrastrukturës dhe Energjisë, Belinda Balluku, deklaruan se kjo është ulja e parë e çmimit të energjisë elektrike pas 35 vitesh.

Kryeministri Rama theksoi se vendimi për uljen e çmimit të energjisë elektrike, erdhi si pasojë e një transformimi epokal të sektorit energjetik, rritjes së kapaciteteve prodhuese dhe menaxheriale të tij.

“E kemi gjetur sektorin në një katastrofë të nivelit botëror, të krahasueshme vetëm me vende që ne nuk e dimë ku janë, por që nuk kishte asnjë lidhje me Evropën ku jetojmë dhe ku niveli i humbjeve për shkak të vjedhjeve haptazi ditën për diell, me bekimin elektoral të qeverisë dhe patjetër edhe me ndihmën e injorancës dhe të paaftësisë qeverisëse, shkonte afro 50%”, u shpreh kryeminstri Edi Rama.

Ministrja e Infrastrukturës dhe Energjisë, Belinda Balluku sqaroi se “ulja e çmimit korrespondon me 3.1miliardë lekë në vit, që nga OSHE-ja, shkon në lehtësim për familjet shqiptare, ndërkohë që kursimi maksimal është për 1 abonent, rreth apo mbi 100 euro në vit”.

“Ne kemi arritur të konsolidojmë performancën e OSHEE duke pasur dy elementë të rëndësishëm, normën e arkëtimit gjithmonë në rritje dhe humbjet teknike, gjithmonë në ulje. Kjo na dha mundësi dhe hapësirë fiskale për uljen e çmimit”, u shpreh ministrja e Infrastrukturës dhe Energjisë, Belinda Balluku.

Ministrja Balluku sqaroi se nuk bëhet fjalë për vendosjen e një fashe, pasi në të shkuarën në vitet 2005, 2006-2013, fasha e aplikuar për konsumin 201-300 kWh prekte vetëm 10.5% ose 120874 abonentë, ndërkohë që nga vendimi i ri përfitojnë 1 milion e 70 mijë abonentë.

Vendimi për uljen e çmimit të energjisë hyn në fuqi për periudhën 1 shkurt deri në 31 dhjetor 2025.

OSHEE Group më pranë qytetarëve, tashmë me një shërbim 24 orë përmes Call Center-it.

 Zv/kryeministrja dhe ministrja e Infrastrukturës dhe Energjisë, e shoqëruar nga administratori i OSHEE group, Enea Karakaçi, vlerësoi nismën e re të ndërmarrë nga kompania për të qenë në shërbim të qytetarit 24 orë, në 7 ditë të javës.

Ministrja Balluku ftoi qytetarët t’i drejtohen Call Center-it të marrin çdo informacion që iu nevojitet, për të bërë një kërkesë, për të adresuar një ankesë, ose për të raportuar mungesën e energjisë.

“Ajo që është më e rëndësishme për funksionimin e shërbimit, është modernizimi më tej i Call Center-it, duke monitoruar dhe regjistruar kohën e pritjes së klientit”, tha ministrja Balluku.

Zv/kryeministrja Balluku nënvizoi rëndësinë e transparencës së shërbimit ndaj klientit, që gjithçka ata thonë të regjistrohet e të mbetet në arkivat tona, për t’u dhënë zgjidhje problematikave të adresuara.

Balluku ka reaguar dhe për lajmin e shpërndarë nga disa media për rritje të çmimit të energjisë për furrat e bukës.

Ajo theksoi se Drejtoria e Tatimeve po kryen kontrolle, për të parë, nëse aplikohet çmim abuziv i bukës për shkak të sistemit të ri të tarifimit të konsumit të energjisë për këtë kategori.

“Qeveria ka vendosur ta subvencionojë energjinë për furrat e bukës. Sa u përket ëmbëltoreve, kemi faturuar 9.5 lekë për kilovat orë, gjithashtu një çmim i subvencionuar; ndërkohë për bar-kafetë e kemi vendosur 12 lekë, duke krijuar një treg i cili favorizon bukëpjekësit dhe duke u dhënë mundësinë edhe dy njësive të tjera, bukës dhe ëmbëltores e bar kafesë, që të kenë çmime favorizuese”, tha Balluku.

Nga ana tjetër, zv/kryeministrja Balluku tha se prej kohësh po punohet me OSHEE-KESH-OST- për të vlerësuar një ulje të energjisë elektrike, duke nisur nga 1 janari i vitit 2025.

“Jemi në punë e sipër, në analizë e sipër, por jemi të sigurt që do t’ia dalim, që duke optimizuar proceset teknike dhe financiare të kompanive tona, ne të kemi mundësi nga 1 janari t’iu ofrojmë qytetarëve shqiptarë një çmim më të mirë për energjinë elektrike”, u shpreh ajo.

Administratori i OSHEE Group Enea Karakaçi u ndal tek ecuria e shërbimit Call Center për 24 orë, ku vetëm në ditët e para u regjistruan 50 telefonata, çka tregoi se ka interes nga qytetarët.

“Ne kemi depozituar kërkesën pranë AKEP-it për marrjen e një numri 3 shifror për të qenë më i aksesueshëm për klientin. Nga ana e specialistëve tanë është shkurtuar koha e pritjes së klientit në telefonatë, pasi dhe eleminimi i avarive në terren është reduktuar, çka ka ndihmuar Call Center të informojë sa më shpejt për situatën e defekteve”, u shpreh administratori i OSHEE Group Enea Karakaçi.

Me digjitalizimin e disa shërbimeve, çdo klient i OSHEE që ka akses në internet, mund të shmangë paraqitjen në sportelet e Kujdesit të Klientit, duke evituar kohën e gjatë dhe burokracitë.

Administratori i OSHEE Group Enea Karakaçi tha se nga data 15 tetor, është rritur fluksi i aplikimeve për dy shërbimet online që ofrohen përmes aplikacionit të OSHEE-së dhe faqes zyrtare të kompanisë në internet.

“Nga data 15 tetor janë tërhequr online 2100 vërtetime debie dhe janë depozituar rreth 600 aplikime për lidhje të re të energjisë.

Edhe në këtë pikë, roli i Call Center-it është i rëndësishëm pasi orienton klientët drejt faqes zyrtare të kompanisë dhe aplikacionit të OSHEE për shërbimet digjitale”, shtoi administratori Karakaçi.

Stafi i Call Center është trajnuar për t’iu përgjigjur saktë e me korrektesë problematikave që referohen përmes numrit të telefonit, 042274141 dhe chatbox-it, ose adresave të kontaktit:
ankesajuaj@oshee.al dhe kujdesi_abonentit@oshee.al

Aplikacioni i ri i OSHEE Group është hapi i radhës që po zbatojmë në kuadër të digjitalizimit të shërbimit për klientët.

Aplikacioni OSHEE është projektuar për të ofruar një shumëllojshmëri funksionalitetesh, që u mundësojnë konsumatorëve të kryejnë operacione të ndryshme në mënyrë të thjeshtë, të shpejtë dhe transparente.

Ky aplikacion mund të shkarkohet lehtësisht nga çdo aparat celular në Play Store apo App Store dhe klientët mund të marrin shërbimet e dëshiruara.

Klientët mund t’i shohin faturat e tyre mujore, si  edhe të kryejnë pagesat direkt nga aplikacioni, pa patur nevojën të shkojnë në zyrat KNK. Në çdo kohë mund të kontrollojnë dhe të vërtetojnë debinë në sistem, për t’u siguruar që janë në rregull me pagesat dhe për të shmangur ndërprerjen e furnizimit me energji elektrike; si edhe të lidhin një akmarrëveshje për t’i paguar me këste detyrimet e prapambetura. Dyshimin për keqfaturim, klienti mund ta përcjellë fare thjesht online, në web ose në aplikacion. Pas përfundimit të ankesës ose kërkesës, klienti mer një kod, me të cilin mund të ndjekë ecurinë e procesit, deri në marrjen e përgjigjes përfundimtare.

Prioritetet e aplikacionit

Klientët mund të marrin njoftime të rëndësishme për ndërprerjet e planifikuara, mirëmbajtjet apo ndryshimet në shërbime, përmes informacioneve të dërguara direkt në aplikacion.

Në rast se hasin ndonjë problem me furnizimin e energjisë elektrike, mbifaturim apo ankesa të tjera, klientët mund të raportojnë menjëherë dhe të marrin informacione mbi statusin e zgjidhjes së problemit.

Po ashtu, klientët mund të kontaktojnë me shërbimin e klientit në çdo moment përmes aplikacionit për çdo pyetje apo problem të mundshëm.

Përmes aplikacionit, klientët mund t’i gjejnë lehtësisht pikat më të afërta të shërbimit OSHEE, për çdo nevojë pranie fizike.

Vetëm online

Është e rëndësishme të nënvizojmë se prej datës 15 tetor, vërtetimi i debive dhe aplikimi për lidhje të re të energjisë për fuqi të kërkuara deri në 20Kw, do të ofrohen vetëm online. Kjo masë nxit përdorimin e platformave tona, rrit transparencën, ndan përgjegjësitë mes palëve, shmang burokracitë dhe eviton veprimet abuzive.

Në çdo rast, klientët mund të konsultohen për veprimet që duan të ndërmarin me specialistët tanë kudo që ndodhen në qëndrat e Kujdesit ndaj Klientit. Në rang vendi numërohen rreth 100 pika shërbimi, që janë të hapura çdo ditë nga ora 08:00 deri në 20:00 (e diela, pushim).

Dokumentacioni

Risi në marrëdhënien me klientët tanë është reduktimi i dokumentacionit, duke e lehtësuar më tej procesin e hapjes së kontratës së furnizimit me energji elektrike, me fuqi të instaluar deri në 20Kw.

Klienti mund të aplikojë me formular vetëdeklarimi, i cili zëvendëson një sërë dokumentash, tashmë të panevojshëm, si:

• Genplani i vendodhjes
• Deklaratë instaluesi
• Protokoll tokëzimi
• Fotokopje e çertifikatës së regjistrimit

Më parë, këto dokumente  ishin të detyrueshme, por tashmë nuk e kuzhtëzojnë më procesin, pasi janë lënë në vullnetin e lirë të aplikantit gjatë plotësimit të vetëdeklarimit.

Për të gjitha sa më lart, duhet mbajtur parasysh faktin se: shërbimet online përmes web-it të oshee.al dhe aplikacionit, u jepen vetëm titullarëve të kontratës, të cilët zotërojnë username dhe password për të hyrë në sistem.

OSHEE Group Sh.A. dhe BERZH kanë shpallur hapjen e garës për ndërtimin e Nënstacionit 110/20kV Qendër Tiranë.

Detajet e njoftimit për zhvillimin e procedurës së hapur ndërkombëtare janë publikuar në faqet zyrtare të internetit të institucioneve përkatëse, sipas të cilit ftohen shoqëritë e interesuara të sjellin ofertat për realizimin e projektit strategjik.

Ndërtimi i nënstacionit vjen si fazë përfundimtare pas vlerësimeve të shumta nga konsulentë ndërkombëtarë dhe si fryt i bashkëpunimit të ngushtë mes drejtuesve të grupit OSHEE dhe institucionit të njohur financiar: Banka Europiane për Rindërtim dhe Zhvillim.

Realizimi i investimit vjen në kuadër të Marrëveshjes së Kredisë, të firmosur nga OSHEE Group, dhe Marrëveshjes së Garancisë. të aprovuar nga qeveria shqiptare.

Nënstacioni “Qendër” parashikohet të jetë një vepër bashkëkohore, i ndërtuar nëntokë dhe me parametra të sigurtë të furnizimit me energji elektrike, përmes tre transformatorëve me fuqi 40/50MVA, që do t’u shërbejë rreth 140 mijë banorëve të kryeqytetit. Referuar afateve në marrëveshje, punimet për ndërtimin e nënstacionit përfundojnë në vitin 2028.

Detajet e ftesës për ofertë i gjeni në linkun https://ecepp.ebrd.com

Dokumenti i OSHEE me poshte

Ofrimi i një rrjeti cilësor të shpërndarjes së energjisë elektrike në zonat e reja të banimit është në fokus të investimeve që po zbaton kompania OSHEE përmes Operatorit të Sistemit të Shpërndarjes, OSSH.

Një ndër to është dhe Petrela, e cila po zhvillohet me ritme të shpejta.

Ky rajon, i cili shtrihet në juglindje të Tiranës, vitet e fundit ka pritur vizitorë të shumtë, si rezultat i zhvillimit të agroturizmit.

Investimi i OSSH në zonën e Petrelës, ka në fokus ndërtimin e 11 kabinave të reja dhe shtrimin e 24 km linjë tension i mesëm dhe tension i ulët ABC.

Ky projekt që pritet të përfundojë para afatevetë caktuara,  do të përmirësojë ndjeshëm cilësinë e furnizimit me energji elektrike dhe do ti mundësojë bizneseve të zonës, zgjerimin e kapaciteteve akomoduese.

Përfitues të investimit janë 2400 banorë dhe biznese në fshatrat Mullet, Daias, Hekal, Mangull, Gurë dhe Barbas, pjesë të njësisë administrive Petrelë.

OSHEE, përmes shumë investimeve që po kryen aktualisht, po i jep zgjidhje klientëve tanë për të patur furnizim me energji elektrike brenda standardit bashkëkohor.

Një prej këtyre zonave ku është ndërhyrë nga ana e OSSH, është dhe zona e Kasharit, ku 1000 banorë të fshatrave Mazrek dhe Gjokaj, tashmë furnizohen me rrjetin e ri 20kV, përmes kabinave të ndërtuara, shtyllave dhe linjave me kabull ABC.

Gjatë inspektimit të përfundimit të punimeve të realizuara, drejtori i OSSH Tiranë, Darling Hoxha, u shpreh se rrjeti i ri tension i mesëm, i jep mundësinë 40 subjekteve private të zonës të furnizohen me 20kV, nga 6kV që e kanë aktualisht.

Drejtori i OSSH Tiranë u shpreh ndër të tjera se, “përmes shumë investimeve që po kryejmë aktualisht, i dhamë zgjidhje klientëve tanë për të patur furnizim me energji elektrike brenda standardit bashkëkohor”.

Investimi rrit me trefish cilësinë e furnizimit me energji elektrike, përmes 9 kabinave të reja, dhe garanton qëndrueshmëri pasi bashkon dy anët e rrjetit kabllor 20kV me nënstacionet Vorë dhe Kashar.