Back
21 Korrik

Furnizuesi i Tregut të Lirë blen energji për muajin gusht 2023

Furnizuesi i Tregut të Lirë (FTL Sh.A), pjesë e OSHEE Group Sh.A, zhvilloi në datë  20-21.07.2023 në platformën online të blerjes së energjisë elektrike, procedurën “Blerje Energjie për periudhen 01-31 Gusht 2023“.

Pjesëmarrësit në procedurë ishin 8 shoqëri:

 NOA ENERGY TRADE  SH.P.K.

FUTURE ENERGY TRADING AND EXCHANGE DINAMICS SH.P.K.

GSK SH.P.K

AYEN ENERGY TRADING SH.A.

GSA SH.P.K

EZ-5 ENERGY TRADING SH.P.K.

ENER TRADE  SH.P.K

ReNRGY TRADING GROUP  SH.P.K

U sigurua sasia prej 4,464 MËh , me çmim 110.70 Eu/MWh dhe vlerë totale 494,164.80 Euro.

Shoqëria fituese u shpall  “NOA ENERGY TRADE”  SH.P.K.

21 Korrik

Ministrja Belinda Balluku takim me drejtues të OSHEE Group për masat e sezonit turistik dhe ecuria e 6-mujorit

Ministrja e Infrastrukturës dhe Energjisë, njëkohësisht zv/kryeministre, znj.Belinda Balluku, zhvilloi një takim me drejtuesit e OSHEE Group, Administratorin e OSHEE Group Sh.a., Enea Karakaçi, Administratorin e FSHU, Elton Sevrani, Administratorin e OSSH, Blendian Dalipi dhe drejtorët rajonalë të OSSH, ku në fokus ishin masat e marra për mbarëvajtjen e sezonit turistik dhe analiza e treguesve të performancës për 6-mujorin.

Në fillim të analizës, znj.Balluku prezantoi administratorin e ri të OSHEE Group Sh.A, z.Enea Karakaçi, duke vlerësuar punën e tij si menaxher dhe bashkëpunëtor prej vitesh në ministrinë e Energjisë dhe njohës i mirë i sektorit energjetik.

Ministrja Balluku tha se zgjedhja e Karakaçit në këtë pozicion, si drejtues i një nga ndërmarrjeve më të mëdha energjetike, tregon që vëmendja qëndron me OSHEE-në si zakonisht.

Balluku theksoi se megjithëse dhe kompanitë e tjera energjetike kanë peshë të madhe sic është KESH dhe OST ku nuk do të mungojnë investimet,  OSHEE-ja dhe bijat e saj mbeten një nga pjesët kyç të sektorit duke qenë se janë ata që përballen direkt me klientin tonë, me abonentin.

“Keni kaluar një periudhë jo të lehtë, përsa i përket riorganizimit. Jeni një nga ndërmarrjet që jeni për t’u marrë shembull përsa i përket përafrimit me kërkesat e Bashkimit Europian.

Me të gjitha këto ndryshime dhe sfida të sektorit, duke nisur nga kriza energjetike e 2022-it, edhe duke vazhduar më pas me të gjitha sfidat e reja që na presin, duhet thënë që OSHEE-ja, OSSH-ja, FTL-ja dhe FSHU-ja, që të gjitha kanë nevojë për një riorganizim të fuqishëm, për një frymëmarrje të re, për një ritëm të ri, gjë të cilën unë besoj që Enea, bashkë me Blendianin, bashkë me Tonin dhe gjithë të tjerët do ja dalin me shumë sukses.

Sidomos në rastin e Eneas që vjen nga Ministria e Infrastrukturës dhe Energjisë, i qartë për të gjitha synimet, politikat, strategjitë tona për vazhdimësinë, unë jam e sigurtë që nuk do të ketë as ekuivoke, as nuk do jeni të paqartë për çka kërkohet në të ardhmen”, u shpreh ministrja Balluku.

Sipas saj, me rritjen e fluksit të turistëve në zonat turistike, kërkohet vëmendje e shtuar nga të gjithë drejtuesit rajonalë të OSSH dhe punonjësit e sektorit për të monitoruar situatën dhe shmangur problemet që mund të shkaktojë mbingarkesa e rrjetit.

“Kemi një fluks ekspansional të turistëve tashmë. Ka zona, qytete bregdetare kryesisht, duke nisur nga Velipoja dhe duke përfunduar poshtë në Ksamil, të cilët bëhen mikpritës të shumëfishit të numrit të banorëve që kanë zakonisht. Diçka që e bën sifiduese ofrimin e shërbimit nga ana jonë.

Dhe, komponenti i dytë me të cilin po përballemi këto ditë, por që nga çfarë më rezulton mua nga të gjithë të dhënat që do kemi do të na shoqërojë gjatë gjithë verës, janë temperatura ekstremisht të larta, të cilat padyshim krijojnë probleme teknike.

E kemi pasur këtë sfidë gjatë javës së fundit, por këtu gjej rastin, pavarësisht se nuk janë këtu me ne, të falënderoj edhe grupet e OST-së, të Operatorit të Transmetimit, për të gjithë bashkëpunimin e shkëlqyer që kanë pasur me OSSH-në javën e fundit dhe për të gjithë masat që janë marrë për të mitiguar problemin sa më shpejt dhe për ti pasur kohët e shkëputjeve sa më të shkurtra”, theksoi ministrja e Infrastrukturës dhe Energjisë znj.Belinda Balluku.

Në fjalën e saj, ministrja Balluku u ndal dhe tek performanca e OSHEE Group, për 6-mujorin e parë të vitit 2023, tek targetet dhe treguesit të cilët duhet të përmirësohen në të gjitha rastet.

Por, sipas Ballukut, prioritet mbeten operimet e sigurta dhe të vazhdueshme brenda këtij sezoni veror me dy komponentë sfidues, numrin shumë të lartë të turistëve në vend dhe temperaturat shumë të larta, , përsa i përket stinës së verës.

“Ne kemi 1100 punonjës në dispozicion për të gjitha zonat bregdetare të cilët, jo vetëm mundohen që të zgjidhin problematikat të cilat ndodhin, por nga ana tjetër mundohen dhe që ti paraprin ato, pa arritur në ndërprerje, por dhe në rastet kur ne kemi ndërprerje të gjitha këto grupe që ndodhen në terren mundohen që ta rikthejnë shërbimin sa më shpejt e mundur. Duhet të na mirëkuptoni edhe ngarkesën edhe përsa i përket të temperaturave të larta të cilat ndikojnë në operimet e nënstacioneve tona”, tha ministrja Balluku.

Nga ana tjetër, ministrja Balluku i bëri apel dhe qytetarëve që të jenë të kujdesshëm në përdorimin e energjisë elektrike, duke minimizuar konsumin e panevojshëm.

“E kemi shumë të qartë që këto temperatura duhen patjetër shoqëruar me përdorimin e kondicionerit dhe gjithçka tjetër që e lehtëson situatën, megjithatë ju lutem efiçenca energjetike është ajo çfarë na ndihmoi dhe çfarë na shpëtoi në 2022-in, kështu që edhe entitetet private që operojnë në fushën e shërbimeve, hoteleri restorante etj, por edhe vetë qytetarët pra individët, abonentët duhet të jenë shumë të kujdesshëm për të ruajtur sa më shumë energjinë elektrike.

Sigurisht do të përdorni atë që është e nevojshme në këto kushte atmosferike, por nga ana tjetër gjithçka që është e panevojshme nuk duhet përdorur. Për ta pasur energjinë, e kemi thënë dhe në 2022-in, duhet ta ruajmë”, tha Balluku.

Ministrja e Infrastrukturës dhe Energjisë, znj.Belinda Balluku, deklaroi gjatë fjalës së saj se Shqipëria ka disponibilitet të plotë të sasive energjetike dhe përsa i përket situatës së prodhimit, ky është një nga vitet më të mirë që ne kemi.

Në fjalën e tij, administratori i OSHEE, Enea Karakaçi tha se OSHEE do të vijojë të çojë përpara reformat dhe masat e marra ndër vite, më e rëndësishmja ndarja e funksioneve, si një kërkesë dhe direktivë e Sekretariatit të Energjisë.

“OSHEE group do të jetë dhe do  të ketë në fokus çuarjen përpara të direktivave dhe vizionit të qeverisë duke patur në fokus elementin kryesor dhe bazik që është shërbimi sa më i mirë dhe në kohë për qytetarët dhe biznesin dhe modernizimi i kompanisë drejt hapjes së tregut, burime të rinovueshme të energjisë, dhe normalisht dhe klientevë që janë në tregun e lirë dhe që furnizohen nga FTL me cmime konkurruese në treg”, tha administratori i OSHEE, Karakaçi.

Ndërsa administratori i OSSH, Blendian Dalipi, tha ndër të tjera në fjalën e tij se për 6-mujorin e parë të vitit 2023, fokus ka qenë realizimi i targetit të humbjeve, ku deri në fund të majit niveli i humbjeve ështe realizuar në masën 20.5 % , krahasuar kjo me të njëjtën periudhë të një viti më parë ështe 1.4 % më pak se treguesi i humbjeve të vitit të kaluar.

“Një vëmendje e shtuar duhet për 6 mujorin e dytë të vitit, në mënyrë që këta tregues të vazhdojnë të përmirësohen edhe më shumë sidomos në ato rajone ku ky tregues është më i lartë, (p.sh disa rajone në zonat e veriut dhe disa agjenci brenda zonave të jugut).

Për këtë periudhë janë shtuar kontrollet ndaj paligjshmërisë, verifikimet në sistemet e matjes, ku në terren, sidomos në zonat bregdetare po operojmë me fokus të shtuar për mirëmenaxhimin e kërkesës për energji elektrike në mënyrë të pandërprerë dhe me parametra cilësorë të gjithë konsumatorët dhe ndërhyrjen me kontrolle dhe masa aty ku ka abuzime me energjinë elektrike”, tha administratori i OSSH, Blendian Dalipi.

26 Qershor

Furnizuesi i Tregut të Lirë blen energji për muajin korrik 2023

Në datë  26.06.2023,  në platformën online të blerjes së energjisë elektrike u zhvillua procedura “Blerje Energjie për periudhen 01-31 Korrik 2023 “.

 Pjesëmarrësit në procedurë ishin 10 shoqëri:

 NOA ENERGY TRADE  SH.P.K.

EZ-5 ENERGY SH.P.K.

GSA SH.P.K

ENER TRADE  SH.P.K

FUTURE ENERGY TRADING AND EXCHANGE DINAMICS SH.P.K

RENRGY TRADING GROUP SH.P.K.

ALBESP TRADING & CONSULTING  SH.P.K

GSK  SH.P.K

 AYEN ENERGY TRADING  SH.A.

NATYREENERGY  SH.P.K

U sigurua sasia prej 3,720 MWh, me cmim 112 Eu/MWh dhe vlerë totale 416,640.00 Euro.

 Shoqëria fituese u shpall shoqëria  “NOA ENERGY TRADE”  SH.P.K.

23 Qershor

Bordi i ERE miraton çmimin e shitjes së energjisë për klientët në tensionin 35 kV

Bordi i Entit Rregullator të Energjisë, ERE, miratoi javën e kaluar gjatë mbledhjeve të zhvilluara në datat 19 dhe 23 qershor, çmimin e shitjes së energjisë elektrike nga Furnizuesi i Mundësisë së Fundit për konsumatorët e lidhur në tensionin 35, për muajin Maj 2023.

Sipas vendimit të bordit të ERE, çmimi i shitjes së energjisë është 16.41 Leke/kËh për klientët e lidhur në nivelin e tensionit 35 kV.

06 Qershor

Nënshkruhet marrëveshja e bashkëpunimit financiar mes Shqipërisë, Gjermanisë dhe Francës

Ministrja e Energjisë Belinda Balluku, në prani të Sekretarit të shtetit të Gjermanisë, Niels Annen, firmosi marrëveshjen e bashkëpunimit financiar mes Shqipërisë, Gjermanisë dhe Francës sa i takon mbështetjes së reformës në sektorin energjetik shqiptar.

“Sot partnerët tanë, që na kanë qëndruar në krah gjatë realizimit të kësaj reforme sfiduese, kanë vlerësuar angazhimin e Ministrisë së Infrastrukturës dhe Energjisë, si dhe të ndërmarrjeve shtetërore të sektorit energjetik, për këtë arritje të shënuar, reformë që ka sjell transparencë në sektorin elektro energjetik , ashtu dhe si ka përafruar këtë sektor me kërkesat dhe parametrat e BE. Qeveria Shqiptare mbetet e vendosur për të vijuar transformimin e këtij sektori duke përmirësuar në vijimësi treguesit”, tha ndër të tjera në fjalën e saj ministrja Balluku.

Më poshtë fjala e plotë e ministres Balluku gjatë nënshkrimit të marrëveshjes së bashkëpunimit financiar mes Shqipërisë, Gjermanisë dhe Francës:

Përshëndetje të gjithëve.

Shumë kënaqësi që të mblidhemi këtu sot. Po diskutoja edhe me Sekretarin e Shtetit Annen, se padyshim reforma në sektorin elektro energjetik për qeverinë shqiptare është një nga krenaritë më të mëdha që ne mbartim. Një reformë e cila ka nisur në vitin 2018 dhe sigurisht që përveç vështirësive që ka pasur për realizimin e saj në këtë periudhë 5 vjeçare na është dashur të përballemi dhe me sfida që nuk kanë lidhje me sektorin energjetik, siç ishte pandemia dhe më pas kriza ekonomike botërore. Kështu që është kënaqësi që të jem këtu së bashku me të gjithë ju dhe jeni që të gjithë kontributorë seriozë të sektorit dhe të reformës, por nga ana tjetër dua ti uroj mirëseardhjen Sekretarit të Shtetit Annen, i cili ndodhet këtu në Tiranë për herë të parë dhe sapo ka arritur dhe nuk ka pasur kohë të shikoj qytetin tonë, kështu që do ti kërkoja ambasadorit dhe mikut tim të dashur Peter që ti japë mundësinë që të shikoj kryeqytetin e Shqipërisë, sepse me të vërtetë ja vlen të njihesh nga afër me Tiranën. Ne do të kemi edhe evente të tjera nesër shumë të rëndësishëm, por po fokusohem tek eventi sotëm.

Sot jemi këtu për të nënshkruar një marrëveshje financiare, e cila do të kontribuojë në fazën e dytë për mbështetjen e sektorit elektroenergjetik shqiptar, i cili në vitin e fundit është përballur me një sfidë shumë të vështirë atë të krizës ekonomike, e cila sigurisht erdhi dhe nga kriza energjetike, duke pasur parasysh agresionin rus në Ukrainë gjatë vitit 2022 dhe duke pasur parasysh që Shqipëria është një vend që prodhon 100% energji të rinovueshme, por nga ana tjetër është në varësi të hidrocentraleve. Ne na është dashur vitin e kaluar që të importojmë sasi të rëndësishëm për të mos pasur ndërprerje të energjisë për të gjithë abonentët tanë, kështu që kemi qenë të ekspozuar ndaj çmimeve të çmendura të tregut elektro energjetik mbarë botëror. Këtë e kujtoj gjithmonë, pasi nuk besoj që do ketë një nivel tjetër historik të çmimit, 31 gusht i 2022-shit u mbyll me 1000 euro mbi të shitjes së megavat/orë.

Ky takim i sotëm është një moment i mirë për të reflektuar dhe për të bërë një bilanc real të reformës së sektorit elektro energjetik shqiptar, që edhe me mbështetjen e Gjermanisë dhe të Francës, përmes institucioneve tyre financiare këtu në vendin tonë KfË-së dhe AFD-së, por edhe mbështetjen dhe do të thoja të gjitha përpjekjet e ambasadorëve të Gjermanisë dhe të Francës ka pësuar një transformim rrënjësor gjatë viteve të fundit. Kjo reformë i ka hapur rrugën zbatimit të politikave dhe të projekteve të reja, dhe projekte të cilat unë do ti quaja inovative në fushën e energjive të rinovueshme, efiçencës së energjisë dhe rimodelimit të tregut të brendshëm vendas.

Reforma në sektorin elektro energjetik ka qenë një ndër proceset më sfiduese, por proces që dua ta quaj të mirë arritur dhe që Ministria e Infrastrukturës dhe Energjisë së bashku me ndërmarrjet dhe sektorët që ka, ka realizuar në këto 5 vite. Kjo reformë ka nisur në vitin 2018, ashtu siç unë thashë, dhe ka qenë një proces i ndërlikuar, i vështirë dhe me plot sfida. Ndihma e partnerëve të huaj ka qenë e vyer dhe jo pa qëllim për realizimin e kësaj reforme u zgjodh instrumenti i huamarrjes bazuar në politika. Pra, një instrument ky i cili detyron dhe palën shqiptare që të performonte në mënyrën e duhur për të pasur mundësi dhe për të tërhequr trançet e kësaj kredie dhe sigurisht ky instrument dha rezultate të mirëfillta që sot janë të prekshme, duke e përgatitur tregun tonë për integrim në tregjet rajonale edhe ato europiane.

Pavarësisht të gjitha sfidave dhe vështirësive me të cilat u përballëm gjatë pandemisë dhe më pas gjatë  krizës energjetike të vitit 2022, të cilat na kanë detyruar të marrim vendime të vështira në lidhje me kufizimin e investimeve publike në sektor, apo ndoshta ngadalësuan disa në proceset e reformës, sot pa frikë mund të themi se Shqipëria i ka bërë detyrat e shtëpisë ashtu siç duhet.

Ndër objektivat kryesore të reformës së sektorit ka qenë ndarja e Operatorit të Shpërndarjes së Energjisë Elektrike ose ndryshe quajtur ‘unbundling’. ‘Unbundling’ ka qenë sfida ime e parë e vitit 2019, të gjithë drejtuesit që janë këtu të sektorit e mbajnë mend mirë të gjithë punën që kemi bërë, përpjekjet. Mënyra sesi jemi ulur në tryeza në mënyrë konstruktive për të diskutuar me njëri-tjetrin, por nganjëherë edhe duke u përplasur me financuesit dhe partnerët tanë, pasi ishte një reformë e cila kërkonte ndryshimin e një mentaliteti të tërë të operimit, por që ashtu siç unë premtova në vitin 2019 ndoshta me hapa më të ngadaltë, por të sigurtë, ne ia dolëm dhe sot mund të themi padyshim që ajo që ne kemi premtuar, pra ndarjen e shërbimit të shpërndarjes nga aktivitetet e tjera që lidhen me furnizimin dhe çektimin e energjisë elektrike, duke garantuar pavarësi të operatorit të shpërndarjes dhe ndarje të qartë të aktiviteteve komerciale nga ato jo komerciale, ne të gjitha këto i kemi arritur.

Ky proces është realizuar në 1 janar të vitit 2020 dhe sigurisht është plotësuar deri në fillim të vitit 2023, duke arritur dhe duke bërë edhe aktet e fundit ligjore të cilat kornizojnë të gjithë këtë proces.

Gjithashtu,  një gur kilometrik për të cilin ne ndihemi krenarë, është ai që kemi vendosur në Prillin e 2023, me krijimin e Bursës së Energjisë, e cila ka qenë me të vërtetë edhe ky një proces i komplikuar. Ka qenë një proces që ka dashur vëmendjen maksimale të Ministrisë së Infrastrukturës dhe Energjisë, por nga ana tjetër ka pasur edhe mbështetjen e partnerëve tanë hap pas hapi gjatë gjithë këtij procesi. Dhe sigurisht, bursa energjetike shqiptare do të jetë një garantues i zhvillimit energjetik dhe sigurisht tregtimit të lirë, transparent dhe të drejt të energjisë elektrike në Republikën e Shqipërisë, por nga ana tjetër ne duhet të themi se sot ALPEX numëron 9 operatorë të regjistruar si anëtarë të bursës, ndërkohë që 16 operatorë janë në fazën e vlerësimit dhe 4 institucione bankare kanë shprehur interes për t’u anëtarësuar.

Liberalizimi i tregut të energjisë elektrike ka qenë një tjetër kërkesë kryesore e partnerëve në bazë të direktivave përkatëse europiane, por edhe marrëveshjes për reformën e sektorit. Duke filluar nga 1 Janari i 2021 të gjithë konsumatorët e lidhur në 35 kilovoltsh, por edhe një pjesë e atyre të lidhur në 20 kilovoltshin kanë dalë dhe furnizohen në tregun e lirë. Gjithashtu edhe konsumatorët e lidhur në tensionin e mesëm janë njoftuar për daljen e tyre në tregun e lirë në janar të vitit 2022, por duke qenë se mbas 24 shkurtit të vitit 2022, ne kemi nisur që të përballemi me krizën ndërkombëtare energjetike, qeverisë shqiptare i është dashur që të ndërmarrë një veprim mbrojtës për bizneset e lidhura në tensionin e mesëm, duke qenë se flitej për më shumë se 7500 biznese dhe për të mos i ekspozuar ata në çmimet shumë të larta të tregut të vitit të kaluar. Kështu që duke konsideruar kontributin e rëndësishëm që këto biznese kanë në zhvillimin tonë ekonomik, qeveria shqiptare ka vendosur ti mbrojë ato deri në një vendim të dytë, por pa shkelur premtimet tona përsa i përket reformës elektro energjetike.

Një tjetër zhvillim shumë i rëndësishëm që lidhet me reformën është dhe amendimi dhe përafrimi me legjislacionin e BE-së, i ligjit për Burimet e Rinovueshme të Energjisë, i cili u miratua nga Kuvendi i Shqipërisë në mars të 2023, pra dy muaj më parë. Ky ligj është ndër instrumentet kryesor strategjike që do të garantojë përmbushjen e objektivave kombëtar energjetik, ekonomikë dhe mjedisor, përmes një sistemi efiçent dhe transparent të shfrytëzimit të burimeve energjetike në vend. Por një risi e këtij ligji është përcaktimi i masave mbështetëse në bazë të ankandeve konkurruese, si dhe tipologjinë e tyre bazuar në format e marrëveshjes për blerjen e energjisë, kontratës për diferencë dhe kontratës për prim. Kjo jo vetëm që adreson dhe plotëson një nga objektivat bazë të marrëveshjes për reformën e sektorit, por është dhe parakusht për krijimin e Operatorit të Energjive të Rinovueshme, i cili është një hap tjetër shumë i rëndësishëm në rimodelimin e tregut energjetik në vend.

Operatori i Energjisë së Rinovueshme do të jetë përgjegjës për administrimin e kontratave me prodhuesit me përparësi të energjisë nga burimet e rinovueshme, duke menaxhuar sasitë energjetike të gjeneruara dhe duke tregtuar ato në bursë, duke garantuar kështu efikasitet dhe duke aplikuar një metodologji shitblerje të energjisë e cila i përgjigjet sinjaleve dhe kërkesave të tregut. Në këtë bilanc nuk mund të rri pa përmendur edhe disa zhvillime të tjera po aq të rëndësishme për sektorin elektro energjetik. Vitin e shkuar kemi zhvilluar ankandin për parqet eolike, ankandi i parë, ku morën pjesë 16 kompani të huaja. Duhet thënë që ankandet që ne kemi zhvilluar, duke nisur nga ankandi i parë ai i parkut fotovoltaik të Karavastasë dhe pastaj të gjitha ankandet që janë zhvilluar në Republikën e Shqipërisë kanë qenë padyshim ndoshta edhe për shkak të emrit të madh të kompanisë së parë fituese, kompanisë franceze Voltalia, por edhe për shkak të të gjithë procesit që ne kemi bërë së bashku edhe me partnerët tanë të huaj, një proces transparent dhe një proces ku konkurrenca ka qenë e drejtë dhe e hapur, do të thoja që të gjitha ankandet pasuese kanë arritur që të jenë të suksesshme dhe me pjesëmarrje shumë të lartë të kompanive europiane dhe kompanive përgjithësisht të huaja, le të themi.

Kështu që edhe në ankandin e parë për prodhimin eolik kanë marrë pjesë 16 kompani të huaja, 6 prej të cilave janë kualifikuar për të vijuar në fazën e dytë, atë të ofertës financiare, e cila ndryshe nga sa thonë këtu në fjalën time që është brenda këtij muaji, unë them që është nesër. Kështu që nesër ne do të kemi hapjen e 6 zarfeve për të marrë dhe për të pasur fituesin e ankandit të parë eolik këtu në Republikën e Shqipërisë. Gjithashtu siç përmenda ne quajmë një sukses shumë të madh jo vetëm për Shqipërinë, por edhe për rajonin dy ankandet fotovoltaike, të cilat janë zhvilluar me toka në zonën e Karavastasë dhe asaj të Spitallës. Përsa i përket parkut të parë, pra atij prej 140 mega ka nisur prej kohësh ndërtimi i tij dhe ne presim që të futemi në prodhim vitin që vjen. Në ndërkohë që parku i Spitallës është duke përgatitur gjithçka për hapjen e kantierit në zonë për parkun e dytë pra, atë 100 megavat.

Ndërkohë, kemi pasur dhe një interes të jashtëzakonshëm nga investitorë të huaj dhe vendas për të zhvilluar projekte fotovoltaike individuale, private, me fonde sigurisht të financuara nga banka të ndryshme dhe për shitje të energjisë në tregun e lirë.

Vetëm gjatë vitit 2022 sasia e aplikimeve në total arrin 1.7 gigavat, që unë shpresoj shumë që më shumë se 50% e tyre, pra e aplikimeve të arrijnë të realizohen sa më shpejt. Këto të dhëna dhe shifra flasin shumë qartë për rezultatet e përpjekjeve tona për ta bërë sektorin eficent, transparent, atraktiv dhe për të përthithur sa më shumë investime vendase dhe të huaja edhe nga sektori privat, jo vetëm pra nga injektimi buxhetor. Besoj se tashmë kemi kaluar fazën kritike, besoj se tashmë kemi krijuar një eksperiencë shumë të mirë përgjatë rrugëtimit të kësaj reforme dhe besoj që faza e dytë e kësaj reforme do të jetë një optimalizim i asaj çka kemi nisur për ta kthyer sektorin elektro energjetik shqiptar në një sektor i cili përmbush të gjitha kriteret dhe kushtet e operimit të Bashkimit Europian.

Qeveria Shqiptare është e vetëdijshme se sektori ka sfida shumë të mëdha përpara dhe nevoja për të arritur ku ne duam, por rëndësi ka që qeveria shqiptare është e angazhuar për të mbajtur premtimet e saj dhe për të vazhduar me të njëjtin ritëm përpara.

Gjej edhe njëherë rastin që të falenderoj të gjithë partnerët tanë për mbështetjen e pakursyer gjatë gjithë këtij 5 vjeçari dhe besoj që do të kemi të njëjtin bashkëpunim me njëri-tjetrin.

Ndaj ne sot me këtë marrëveshje financiare që nënshkruajmë për fazën e dytë të reformës së sektorit elektro energjetik kemi vendosur objektiva të reja që synojmë të arrijmë, një performancë më të mirë financiare të sektorit dhe kjo është pika kyçe të cilën ne duam të zgjidhim për ta kthyer sektorin në një sektor me performancë pozitive financiare. Patjetër rregullat dhe procedurat që garantojnë akses të barabartë, transparencë për të gjithë pjesëmarrësit e tregut dhe politika që na sjellin më afër me integrimin në rrjetet europiane.

Faleminderit edhe një herë për të gjithë kontributin tuaj dhe jam besimplotë se bashkëpunimi i shkëlqyer mes nesh dhe mbështetja juaj në vijim të këtij procesi nuk do të na mungojnë!

Shumë faleminderit!

26 Maj

Furnizuesi i Tregut të Lirë blen energji për muajin qershor 2023

Në datë 23-24.03.2023, Furnizuesi i Tregut të Lirë (pjesë e OSHEE Group Sh.A), në platformen online të blerjes së energjisë elektrike zhvilloi procedurën “Blerje Energjie për periudhën 01-30 qershor 2023”.

Pjesëmarrësit në procedurë ishin 7 shoqëri :

ENER TRADE SH.P.K.

 ReNRGY TRADING GROUP SH.P.K.

  EZ-5 ENERGY SH.P.K.

GSA SH.P.K.

AlbEsp TRADING & COSNULTING SH.P.K.

AYEN ENERGY TRADING SH.A.

U sigurua sasia prej 2,880 MWh , me  çmim 97.40 Eu/MWh , vlerë totale 280,512.00 Euro. Shoqëria fituese u shpall NOA ENERGY SH.P.K.

27 Prill

Rezultati, Furnizuesi i Tregut të Lirë blen energji për muajin maj 2023

Në datë 26-27.03.2023, Furnizuesi i Tregut të Lirë (pjesë e OSHEE Group Sh.A), në platformen online të blerjes së energjisë elektrike zhvilloi procedurën “Blerje Energjie për periudhën 01-31 Maj 2023”.

Pjesëmarrësit në procedurë ishin 7 shoqëri :

  • EZ -5 ENERGY SH.P.K.
  • ENER TRADE SH.P.K.
  • GSA SH.P.K.
  • FUTURE ENERGY TRADING and EXCHANGE DINAMICS SH.P.K.
  • AlbEsp TRADING & CONSULTING SH.P.K.
  • AYEN ENERGY TRADING SH.A.
  • ReNRGY TRADING GROUP SH.P.K.

U sigurua sasia prej 2,976 MWh, me çmim 114.61 Eu/MWh , në vlerën totale 341,079.36 Euro.

Shoqeria fituese u shpall EZ-5 ENERGY SH.P.K.

29 Mars

Shqipëri-Itali, firmoset huaja 35 mln euro për  përmirësimin e rrjetit energjetik

Zv/kryeministrja dhe ministrja e Infrastrukturës dhe Energjisë, Belinda Balluku dhe zëvendësministri i Jashtëm italian, Edmondo Cirielli firmosën marrëveshjen e huasë prej 35 milionë eurosh për investime për përmirësimin e rrjetit shpërndarës të energjisë elektrike në zonat Shkodër, Lezhë, Fushë-Krujë.

Zv/kryeministrja Balluku deklaroi se marrëveshja e nënshkruar kontribuon me investime në një nga sektorët më të rëndësishëm dhe më kritik edhe nën dritën e situatës që preku jo vetëm vendin tonë por mbarë Evropën në vitin 2022 për shkak të krizës energjetike.

 “Përmes kësaj huaje do të zhvillohet një projekt, i cili konsiston në përmirësimin e sistemit të shpërndarjes, konkretisht në zonën e Shkodrës, Lezhës dhe Fushë-Krujës, me fokus kryesor përmirësimin e nënstacioneve ekzistuese, sistemin Scada dhe rrjetin e tensionit të mesëm, duke i ofruar kështu mundësi agjencive shtetërore, ndërmarrjeve shtetërore, por edhe atyre private që të ofrojnë një shërbim cilësor në furnizimin e energjisë elektrike”, u shpreh Balluku.

Më poshtë fjala e plotë e ministres Balluku

I nderuar zëvendësministër Cirielli,

I nderuar ambasador,

Të nderuar pjesëmarrës,

Kolegë,

Marrëveshja që po nënshkruajmë sot është një kontribut i vyer i Qeverisë Italiane, një nga partnerët, por nuk është rasti për të thënë thjesht partnerët, por nga miqtë më të afërt dhe më të vjetër të Republikës së Shqipërisë.

Kështu që kjo marrëveshje sot na bën dy herë të gëzuar edhe për shkak të marrëdhënieve shumë të ngrohta që populli shqiptar dhe populli italian ka, por edhe për shkak se kjo marrëveshje kontribuon në investime në sektorin energjetik, një nga sektorët më të rëndësishëm dhe më kritik në Republikën e Shqipërisë, sidomos edhe nën dritën e situatës që kemi kaluar jo vetëm ne, por mbarë Europa dhe bota gjatë vitit 2022, për shkak të krizës energjetike.

Kjo mbështetje që do të firmosim sot, përmes një marrëveshje, vjen në kuadrin e Konferencës së Donatorëve, “Bashkë për Shqipërinë”, një konferencë e cila bëri bashkë të gjithë miqtë, partnerët ndërkombëtarë për të mbështetur Shqipërinë për të gjitha dëmet e ndodhura nga tërmeti i nëntorit 2019-ës. Vetëm para pak ditësh kam qenë në Bruksel për të marrë pjesë në një konferencë të ngjashme në këtë rast, “Bashkë për Turqinë dhe Sirinë” dhe për të thënë të drejtën sigurisht edhe ne si vend kemi kontribuar në mënyrën tonë modeste, por Shqipëria ishte një vend që ndihej i detyruar dy herë, jo vetëm sepse populli turk është një tjetër popull mik, por nga ana tjetër na është kujtuar momenti i vështirë i shkurtit 2020, kur të gjithë partnerët tanë dhe partnerët italianë sigurisht, miqtë tanë italianë dhe të gjithë miqtë e tjerë ndërkombëtarë, na janë gjendur pranë, duke na dhënë një dorë për të dalë nga situata e vështirë që ishte krijuar nga tërmeti i 2019-ës.

Për të thënë të drejtën nuk është gjithmonë e rëndësishme shuma financiare me të cilën ti mbështetesh, por është i rëndësishëm kontributi shpirtëror, kontributi social që miqtë tanë ndërkombëtarë na kanë dhënë në ato momente.

Me anë të kësaj marrëveshje shteti shqiptar do të marrë një hua prej 35 milionë euro dhe përmes kësaj huaje ne do të zhvillojmë një projekt, i cili konsiston në përmirësimin e sistemit të shpërndarjes, konkretisht në zonën e Shkodrës, Lezhës dhe Fushë-Krujës, me fokus kryesor përmirësimin e nënstacioneve ekzistuese, sistemin Scada dhe rrjetin e tensionit të mesëm, duke i ofruar kështu mundësi agjencive shtetërore, ndërmarrjeve shtetërore, por edhe atyre private që të ofrojnë një shërbim cilësor në furnizimin e energjisë elektrike.

Duhet të theksoj se përmirësimi dhe modernizimi i sistemit energjetik shqiptar ka qenë objektiv strategjik dhe parësor i Qeverisë Shqiptare, duke nisur nga viti 2013. Vëmendje të veçantë i është kushtuar sistemit të shpërndarjes, i cili është ai që ndikon direkt në jetën e qytetarëve. Padyshim prodhimi dhe transmetimi janë dy kolona shumë  të rëndësishme dhe kryesore të sistemit energjetik, por ama përdoruesi, familjari, abonenti apo edhe bizneset janë të lidhur direkt në rrjetin e shpërndarjes dhe është ajo çka ata kuptojnë konkretisht dhe janë të prekur.

Duhet thënë e vërteta. Në vitin 2013 fatkeqësisht ne trashëguam një rrjet totalisht të amortizuar me humbje teknike mbi 45% dhe mbledhje të ardhurash nën 70%. Nga ajo kohë, ne e përsërisim shpesh që situata ka ndryshuar katërcipërisht, nuk bëhet fjalë më për ndërprerje të energjisë elektrike edhe në ditë me mot të keq. Para vitit 2013 Shqipëria vuante errësirën për orë e orë të tëra pikërisht nga humbja gjatë transmetimit dhe gjatë shpërndarjes së energjisë elektrike rreth 45%, rreth gjysma e saj. Por me të gjitha investimet që janë bërë nga viti 2014 dhe deri në vitin 2022 përllogaritet rreth 470 milionë investime të cilat kanë ndryshuar totalisht tashmë sektorin energjetik shqiptar, sidomos atë të shpërndarjes.

Unë nuk po futem në detaje për të shpjeguar të gjitha ato nënstacione, të gjitha ato kabina të reja apo kilometra të tërë të kabullit ABC që është shtuar dhe është shtruar kudo nëpër Shqipëri, por po ndalem vetëm në faktin e dy viteve të fundit.

Dy vitet e fundit kanë qenë dy vite të vështira pasi ne jemi përballur, ashtu si e gjithë bota, me pandeminë, por edhe me krizën energjetike dhe pavarësisht kësaj situate ne jemi munduar që të investojmë sërish edhe në këto dy vite të vështira duke mbajtur premtimet që ne kemi bërë, duke ulur nivelin e humbjeve që në vitin 2020, para nisjes së pandemisë e kishim rreth 22%, por duke e ulur përmes investimeve edhe në kohë të vështira me rreth 50 milionë, sot e kemi 19.7%. Synimi ynë është patjetër që të arrijmë nivelet e humbjeve teknike europiane, për të cilat ne po punojmë dhe që kjo marrëveshje që do të nënshkruajmë sot do të kontribuojë fuqishëm.

Për ne parësore ka qenë, sigurisht të mbronim qytetarët. Të mbronim abonentët duke mos prekur çmimin e energjisë elektrike. Kështu që na është dashur të jemi më konservatorë përsa i përket investimeve dhe për ti ofruar mbrojtje totale qytetarëve tanë edhe kur na është dashur gjatë vitit 2022, që ishte një vit i thatë, që të dilnim dhe të blinim në importe, importe që jam e sigurt që dhe miqtë tanë italianë kanë pasur të njëjtën problematikë me çmime 10 herë më të larta nga sa ishim mësuar deri në vitin 2021 për megavatorë.

Megjithatë ne duam të shpresojmë, pavarësisht se energjia është një treg i pa parashikueshëm tashmë, duam të shpresojmë që viti 2023 do jetë një vit më i qëndrueshëm. Një vit ku trendi është në rënie, i çmimeve, ka prej kohësh që është stabilizuar si çmim për megavatorë, por nga ana tjetër shpresojmë për shkak të kushteve atmosferike dhe situatës së favorshme që kemi në kaskadën e Drinit, viti 2023 të jetë një vit i qëndrueshëm ku ne të kemi mundësi që të rrisim kapacitetet financiare për investime në fushën energjetike.

Unë dua të falënderoj edhe një herë, të përfitoj nga rasti, për të shprehur vlerësimin për bashkëpunimin shumë të mirë që kemi pasur me Qeverinë Italiane për përballimin e krizave, që nuk ka të bëjë vetëm me energjinë, por edhe me të gjitha mbështetjet e tjera që ne kemi marrë duke nisur nga emergjencat civile apo edhe shkëmbimin e eksperiencave që kurrë nuk na është refuzuar nga ana e palës italiane, por bujarisht ata na kanë mbështetur me shkëmbimin e dijes, që për të thënë të drejtën ndonjëherë e vlerësojmë pak më ulët se sa i përket shkëmbimeve apo ndihmës financiare. Transferimi i dijes, që krijon kapacitete njerëzore shpesh herë është shumë më i vlefshëm dhe pala italiane gjithmonë këtë e ka bërë me bujari dhe unë dua të gjej rastin sot që ta vlerësoj. Ne jemi gjithmonë të mbështetur nga ekspertë italianë në fusha të ndryshime të pushtetit vendor edhe atij qendror dhe kjo është diçka që duhet vlerësuar dhe nuk duhet ta harrojmë kurrë pasi me të vërtetë marrëveshjet financiare janë të rëndësishme, por ngritja e kapaciteteve njerëzore prevalon shpeshherë, në kohë të vështira si këto, ku gjithë Europa pas pandemisë sot është në një lëvizje të fortë demografike përsa i përket profesionistëve dhe krahut të lirë të punës.

Dua ti kthehem dhe një herë marrëveshjes që po nënshkruajmë sot, që është pikërisht pjesë e këtij bashkëpunimi të shkëlqyer e vjen në momentin e duhur për ti dhënë një shtysë të re investimeve për përmirësimin dhe modernizimin e rrjetit të shpërndarjes së energjisë elektrike sidomos në veri të vendit.

Ministria e Infrastrukturës dhe Energjisë dhe OSHEE Grup do të jenë maksimalisht të angazhuara për të realizuar me sukses këtë projekt në funksion të qytetarëve tanë, si dhe të bizneseve të cilët janë kontribuues të rëndësishëm në zhvillimin ekonomik të vendit. Zotohemi për këtë pasi shpeshherë kemi dhe vonesa burokratike nga të gjitha palët pasi shtetet janë të ngritura mbi themelet e burokracisë, procedurat, letrat dhe gjithçka janë të rëndësishme, por ne do bëjmë të pamundur ambasador që të përshpejtojmë çdo procedurë pasi do të ishte në të mirë të qytetarëve tanë.

Shumë faleminderit për vëmendjen.

23 Mars

FTL blen energji për periudhën 1-30 prill 2023

Furnizuesi i Tregut të Lirë (FTL Sh.A), pjesë e OSHEE Group Sh.A zhvilloi më datë 23 mars procedurën “Blerje Energjie për periudhën 01-30 Prill 2023”.

Procedura u zhvillua nga Furnizuesi i Shërbimit Universal (FSHU) në platformën online të blerjes së energjisë elektrike dhe pjesëmarrës ishin 6 (gjashtë) shoqëri:

•   EZ -5 ENERGY SH.P.K

•   NOA ENERGY SH.P.K.

•  AYEN ENERGY TRADING SH.A.

•   INFO-TELECOM SH.P.K.

•  GSA SH.P.K.

•    ReNRGY TRADING GROUP SH.P.K.

Nga kjo procedurë, u sigurua sasia prej 3,600 MWh , me  cmim 117.00 Eu/MWh, vlerë totale 421,200.00 Euro. Shoqëria fituese u shpall  EZ-5 ENERGY SH.P.K.

21 Shkurt

FTL blen energji për periudhën 1-31 mars 2023

Furnizuesi i Tregut të Lirë (FTL Sh.A), pjesë e OSHEE Group Sh.A zhvilloi më datë 20 shkurt 2023 procedurën “Blerje Energjie për periudhën 01-31 Mars 2023”.

Procedura u zhvillua në platformën online të blerjes së energjisë elektrike dhe pjesëmarrës ishin 7 (shtatë) shoqëri:

•       INFO –Telecom  SH.P.K

•       EZ-5 Energy SH.P.K

•       NOA Energy SH.P.K

•       Ayen Energy Trading SH.A.

•       GSA SH.P.K

•       ReNRGY Trading Group SH.P.K

•       Future Energy Trading and Exchange Dinamics SH.P.K

Nga kjo procedurë, u sigurua sasia prej 3,720 MWh, me çmim 146 Eu/MWh, vlerë totale 543,120.00 Euro. Shoqeria fituese u shpall “INFO – Telecom” SH.P.K.