Back
19 Tetor

OSHEE Group shpall vende të lira për 309 elektriçistë të rinj në 12 rajonet e OSSH-së

Si pjesë e angazhimit për të siguruar dhe rritur efikasitetin e rrjetit të sistemit të shpërndarjes të energjisë elektrike, OSHEE GROUP Sh.A. shpall vendet për rekrutimin e 309 elektriçistëve të rinj në 12 rajonet e Operatorit të Sistemit të Shpërndarjes, me qëllim forcimin e ekipit të elektriçistëve me talente të reja, të aftë për teknologjitë dhe praktikat moderne elektrike.

Vendet vakante në Operatorin eSistemit të Shpërndarjes Sh.A. janë krijuar me qëllimin që Shoqëria të sigurojë vazhdimësinë me cilësinë më të lartë në shërbimet respektive për të gjithë konsumatorët e saj.
Për të sensibilizuar sa më shumë fushatën e re, u zhvillua sot në ambientet e shoqërisë OSHEE GROUP Sh.A. një takim midis zv.kryeministres dhe ministres së Infrastrukturës dhe Energjisë, znj. Belinda Balluku, administratorit të përgjithshëm të OSHEE Group, z. Enea Karakaçi, me drejtues të arsimit profesional dhe me studentë të vitit të fundit.

Zonja Balluku u bëri apel të gjithë të rinjve të aplikojnë te https://oshee.al/portali-i-punesimit/ dhe kërkoi bashkëpunim nga shkollat profesionale, për realizimin e praktikave mësimore pranë kompanive publike energjetike.

“Ne kemi marrë sot një vendim të lançojmë thirrjen përsa i përket punësimit të 309 elektriçistëve, të cilët do të kontribuojnë në të 12 rajonet e vendit dhe kemi vendosur që mosha për aplikim të jetë deri në 25 vjeç.

Duam të krijojmë tashmë një fuzion, do ta quaja, të të gjithë eksperiencës që mbartin elektriçistët tanë, të cilët kontribuojnë dhe sakrifikojnë në të gjithë vendin, me një armatë të rinjsh, të cilët do t’u bashkohen, duke marrë kështu nga eksperienca e elektriçistëve më të vjetër, por duke sjellë edhe një ritëm të ri në kompani.”
Duke hapur që sot aplikimin për 30 ditë, për 309 vende pune- elektriçist pranë OSHEE-së, një aplikim, i cili, duke qenë se i drejtohet të gjithë Shqipërisë, të 12 rajoneve ku operon OSHEE-ja, shpresoj të ketë një pjesëmarrje sa më të madhe. Në çdo rast, nëse nuk arrijmë të kemi 309 elektriçistë deri në moshën 25 vjeç, pa dyshim do të bëjmë një thirrje të dytë për të plotësuar vendet, duke nisur kështu një praktikë, të cilën kërkojmë ta kthejmë në traditë, në bashkëpunim me të gjitha shkollat profesionale”, deklaroi zv.kryeministrja dhe ministrja e Energjisë.

Më pas zonja Balluku shtoi: “Kjo kërkesë vjen si rrjedhojë e moshës së elektriçistëve që janë pjesë e Sistemit Elektrik, ku mosha mesatare e grave në këtë pozicion është 51.5 vjeç dhe e burrave 48.2 vjeç.
Vendet vakante të hapura për aplikim janë:

  • Elektriçistë të linjave të tensionit të mesëm dhe të ulët;
  • Elektriçistë të linjave të tensionit të lartë;
  • Operatorë Nënstacioni.

OSHEE GROUP SH.A.. u bën thirrje të gjithë të rinjve, të cilët zotërojnë arsim të mesëm ose të lartë Elektrik, që kanë njohuri të Rregullores së Sigurimit Teknik, si dhe dëshirën për të qenë pjesë e ekipit të elektriçistëve të Operatorit të Sistemit të Shpërndarjes Sh.A., të aplikojnë te https://oshee.al/portali-i-punesimit/ ose të referojnë kandidatë të kualifikuar, duke dorëzuar aplikimet e tyre në adresën e e-mailit dbnj@oshee.al. Procedura e rekrutimit do jetë e hapur 30 ditë, nga data 19.10.2023.

05 Tetor

Panairi, Sevrani: Reforma do të vijojë në mbështetje të vetprodhuesve; shërbim korrekt për klientët e FSHU-së

I ftuar në panelin e Panairit “Ndërtimi, Energjia dhe Ekonomia e Gjelbër”, Administrtaori i FSHU Sh.A, zoti Elton Sevrani, vuri theksin te rëndësia e vijimit të reformës, nisur nga rezultatet sidomos në energjinë e burimeve alternative.

Energjia nga panelet diellore ishte kryefjala e panairit, në kushtet kur tregu po merr zhvillim të lartë. Ndaj edhe kreu i Furnizuesit të Shërbimit Universal foli në emër të OSHEE Group Sh.A., duke dëshmuar me fakte interesin në rritje të përdoruesve familjarë dhe privatë.

“Sot që flasim u bënë 5 vjet nga diskutimi për reformën në sektorin e vetprodhuesve, për procesin e së cilës, duhet ta pranoj se, si përfaqësues i OSHEE-së, isha disi skeptik. Ndërsa sot shikoj një zhvillim të jashtëzakonshëm. Duke përgatitur metedologjinë, si grup pune, mendonim se vetprodhuesit do të na dëmtonin dhe procesi nuk do të ishte aq përfitues, por tregu ështe më i zgjuar sesa burokratët, ndaj me mekanizmat që përdori në mënyrë krejtësisht të natyrshme mundësoi që sot të kemi rreth 1235 subjekte autogjeneruese, të lidhur në rrjetin e shpërndarjes së OSSH-së, që gjenerojnë 129 megavat/orë në pik.”, deklaroi më tej administratori i FSHU-së.

Sipas tij, kjo është ana pozitive e këtij procesi që duhet ta stimulojmë të gjithë, duke shtuar se: “OSHEE Group Sh.A., përmes kompanive OSSH e FSHU, bën detyrën e saj funksionale, duke ndihmuar procesin si në aspektin e instalimit teknik të sistemit të matjes dhe të futjes në eficencë të këtyre paneleve, ashtu edhe me anë të faturimit, ku mbështetur në ndryshimet ligjore nga korriku 2023, energjia e tepërt që prodhohet nga autogjeneruesit nuk kalon pa kosto dhe pa përfitim në rrjet, por transferohet nga muaji në muaj, duke i dhënë mbështetje edhe më të madhe këtyre autogjeneruesve”. Kjo sjell uljen e kostove të furnizimit me energji elektrike, pra një ndihmesë e ndërsjellë jo vetëm me konsumin mujor, por edhe për muajt në vijim.

Ndërkohë, vetë OSHEE Group, përmes kompanisë së tretë FTL Sh.A. (Furnizuesi i Tregut të Lirë), ka kontratë për blerje në treg të rregulluar të energjisë elektrike  të subjekteve që e prodhojnë në panele fotovoltaikë mbi 2 mega. Aktualisht ekzistojnë 40 subjekte, pra 40 mega/orë prodhim i instaluar. Zoti Sevrani e konsideron këtë vlerë të shtuar për gjenerimin në total të tregut shqiptar dhe që merr rëndësi, sidomos në vitet e thata hidrike apo dhe në situatat e krizës botërore përsa u përket çmimeve.

Kreu i FSHU-së veçoi rëndësinë e krijimit të një mekanizmi ligjor financiar, për t’i dhënë fund njëherë e mirë procesit të tepricave të energjisë që hidhet në rrjet dhe gjenerohet nga këta autogjenerues. Sipas tij, reforma në këtë sektor do të vijojë dhe se po zhqyrtohen disa variante, duke besuar se Ministria e Infrastrukturës dhe Energjisë do të nxjerrë një metodologji për “tepricat”, në interes të përbashkët.

Zoti Sevrani deklaroi, po ashtu, se në të gjithë vendin operojnë 100 pika të Kujdesit ndaj Klientit –  zyra me sportele të dedikuara ndaj klientëve të FSHU-së –  për çdo shërbim apo nevojë që kanë rreth 1.3 milionë abonentë.

30 Shtator

Intervista, Karakaçi: OSHEE rinis investimet, në 2023 humbjet 19% 

Intervista e administratorit të OSHEE Group, zotit Enea Karakaçi, me revistën MONITOR

Bazuar mbi të dhënat, si paraqiten treguesit kryesorë të OSHEE Group Sh.A?

Të dhënat e deritanishme flasin për një performancë pozitive, të paktën në treguesit bazë, siç janë niveli i arkëtimeve dhe reduktimi i humbjeve. Janë këto zëra që matin punën tonë, pa anashkaluar indikatorët e tjerë si ata të cilësisë e furnizimit me energji elektrike apo të faturimit të energjisë.

Humbjet kanë vijuar trendin rënës, duke zbritur në 19%, kjo falë mirëorganizimit të grupeve në terren, luftës pa kompromis kundër abuzuesve të energjisë elektrike, duke sjellë, nga ana tjetër, rritje të faturimit. Vlen të theksohet se humbjet në muajin qershor ishin 16%, ndërsa pritshmëria e mbylljes së vitit është për një nivel humbjesh 19%.

Më pak humbje për shoqërinë përkthehen në më tepër të ardhura, të cilat janë rritur me 15.3%.

Paralelisht me arritjen e këtyre objektivave, është punuar 24 orë për një furnizim të pandërprerë me energji elektrike, bazuar në planin e masave të remonteve, në mirëmbajtjen e rrjetit etj.

Ndërkohë, vazhdon përmbushja me përpikmëri e detyrimeve që kemi ndaj klientëve të lidhur në nivel tensioni 35kV, që furnizohen në tregun e lirë.

Prej kohësh, sikurse është deklaruar më parë, shoqëria po vuan nga mungesa e investimeve konkrete. A keni një plan se kur mund të rinisin ato?

Është e vertëtë që ka patur një rënie të investimeve, duke patur në fokus ruajtjen e stabilitetit financiar të shoqërisë, në kushtet e krizës me çmimet e larta të importit të energjisë elektrike.

Megjithatë, në pjesët kyçe të rrjetit elektrik, sidomos në n/stacione, fidera dhe kabina, vëmendja ka qenë e shtuar, duke kryer më së shumti remonte, por edhe investime në pika nevralgjike. Masat kanë dhënë rezultat në përmirësimin me rreth 25% të cilësisë së furnizimit me energji elektrike, ndërsa në zonat bregdetare, ku turistët janë përqëndruar më së shumti, kemi përmirësim të cilësisë me afro 44% (qershor-gusht 2023).

Aktualisht që flasim OSHEE po investon në fuqizim e n/stacioneve Velipojë (projekt totalisht i ri), Golem, Pogradec, Vorë, shtrimin e linjave 35kV në juglindje, pa harruar këtu projektet me investim të huaj, që prekin NSt. Valias, NSt. Qendër Tiranë, të cilët do të ndërtohet në nëntokë. Për vitin 2024, OSHEE Group Sh.A. ka planifikuar të investojë rreth 4.2 miliardë lekë në disa zona me peshë për zhvillimin ekonomik të vendit, pa harruar investimet me fonde nga të huajt, siç është projekti i ndërtimit dhe rikonstruksionit të linjave elektrike në veri të vendit (nga Lezha deri në Tamarë/Malësi e Madhe, Shkodër), rreth 3.5 miliardë lekë; apo transformimi i rrjetit në jug Orikum – Himarë, tjetër projekt ky i shumëpritur dhe me mjaft rëndësi.

Rëndësi po i kushtojmë edhe investmeve në teknologji, p.sh. në sistemin e matjes smart në Durrës dhe Shkodër, apo implementimin e sistemit SCADA në disa n/stacione kryesore të vendit.

Shkurtimisht, ndonjë koment mbi “fatin” e 7400 subjekteve që dalin në treg të lirë, a do të vijojë mbështetja me çmime favorizuese?

Referuar afateve në ligj, subjektet që furnizohen në rrjetin e tensionit të mesëm 6/10/20kV duhet të kishin dalë në treg të lirë, pra të mos furnizohen vetëm nga OSHEE, por edhe nga shoqëri të tjera të licencuara, me çmimet e tregut. Në kushtet e krizës të çmimeve të larta të importit, qeveria u ka ofruar suport, duke i furnizuar me çmim të subvencionuar.

Kam besimin se këta klientë kanë për t’u trajtuar me prioritet përsëri gjatë vitit pasardhës. Po shqyrtohen të gjithë skenarët me Ministrinë e Infrastrukturës dhe Energjisë, për mënyrën e trajtimit të tyre, duke filluar data 1 janar 2024.

Nisur nga ecuria e deritanishme, si pritet ta mbyllë OSHEE Group SH.A. vitin 2023 në aspektin financiar?

Në fillim dua të ndalem tek ecuria e humbjeve dhe arkëtimeve, të cilat me ritmin aktual besojmë se do të jenë brenda planit. Konkretisht, humbjet për vitin 2023 pritet të jenë 19% nga 19.7% të 2022, kurse të ardhurat deri në dhjetor parashikohen të kapin vlerën e mbi 80 miliardë lekëve.

Sa i takon rezultatit financiar të konsoliduar, OSHEE Grup parashikon të mbyllë vitin financiar 2023 me një fitim mbi 2.5 miliardë lekë. Ndikim kanë dhënë disa faktorë, veç uljes së humbjeve apo arkëtimeve në rritje, por edhe zëra si: ulja e “shpenzimeve operative” me 20%, reduktimi i shpenzimeve për blerje energjie, etj. Megjithatë, duhet theksuar që OSHEE Group vazhdon të ketë sfidë shlyerjen e detyrimeve të mëdha, të ardhura nga blerja e energjisë elektrike në kushtet e rritjes së çmimeve gjatë krizës energjetike.

25 Shtator

Furnizuesi i Tregut të Lirë, FTL, blen energji për muajin tetor 2023

Furnizuesi i Tregut të Lirë (FTL Sh.A), pjesë e OSHEE Group Sh.A, zhvilloi në datën 25.09.2023, në platformën online të blerjes së energjisë elektrike, procedurën “Blerje energjie për periudhën 01-31 tetor 2023”.

Pjesëmarrësit në procedurë ishin 8 shoqëri si më poshtë :

 ENER TRADE SH.P.K

NOA ENERGY TRADE SH.P.K

EZ-5 ENERGY SH.P.K

AYEN ENERGY TRADING SH.A

ReNRGY TRADING GROUP SH.P.K

GSA SH.P.K

PROINFINIT CONSULTING SH.P.K

FUTURE ENERGY TRADING AND EXCHANGE DINAMICS SH.P.K

Në këtë procedurë u kontraktua  sasia prej 4,464 MWh, me çmim 116.50 Eu/MWh dhe vlerë totale 520,056.00 Euro.

Shoqëria fituese u shpall  “ENER TRADE”  SH.P.K.

13 Shtator

Theth, ndërhynë në rrjetin e energjisë, procedohen penalisht 6 subjekte private

OSSH Shkodër ka kryer një aksion blic në zonën e Thethit, me fokus bizneset e zonës, duke u bazuar mbi të dhënat e humbjeve në zonë.
Nga kontrollet e ushtruara, në bashkëpunim me forcat e rendit u kapën në flagrancë 5 subjekte private, me aktivitet “bujtina”. Nga verifikimi rezultoi se vidhnin energji elektrike me linjë të dytë.
Një subjekt privat “pulari” në Shkodër u zbulua se vidhte energji elektrike, ndërsa është dashur ndërhyrja e policisë tek një tjetër abonent që kundërshtonte punonjësit e OSSH të hynin në ambjent për të kryer faturimin.
OSSH ka intensifikuar kontrollet në sistemin e matjes së energjisë elektrike, me qëllim zbulimin e keqbërësëve me rrjetin, duke mos toleruar askënd, pavarësisht llojit të aktivitetit.
Të gjitha rastet e proceduara në prezencë të policisë i kaluan për gjykim të mëtejshëm institucioneve kompetente.
OSHEE Group i bën thirrje abonentëve të distancohen nga abuzimi me energjinë dhe të denoncojnë çdo rast në numrin e cel: 069 414 1001 whatsapp/viber

01 Shtator

FSHU, pjesë e OSHEE Group Sh.A. marrëveshje me Postën Shqiptare për shërbimin postar hibrid

Me qëllim rritjen e cilësisë së shërbimit ndaj abonenteve tanë, Furnizuesi i Shërbimit Universal (FSHU Sh.A), pjesë e OSHEE Group Sh.A. ka firmosur së fundmi një marrëveshje të re bashkëpunimi me Posta Shqiptare.

Objekti i marrëveshjes është rritja e standardit në shpërndarjen e faturave të FSHU-së përmes shërbimit postar hibrid (Hibrid Mail) të ofruar nga Posta Shqiptare.

Ky shërbim unifikon procesin e “prodhimit dhe shpërndarjes” së faturave të konsumit të energjisë elektrike, ul kostot dhe kohën, duke sjellë përmirësim të shërbimit për 1.3 milionë abonentë të OSHEE group Sh.A.

Marrëveshja ka nisur të zbatohet në muajin gusht dhe synon t’i japë fund shqetësimeve, në raste dhe zona të ndryshme, për mosmbërritjen e faturës tek abonenti.

Dokumenti u firmos nga administratori i FSHU, z.Elton Sevrani dhe drejtori i përgjithshëm i Postës Shqiptare, z.Ardit Demiri.

28 Gusht

Furnizuesi i Tregut të Lirë blen energji për muajin shtator 2023

Furnizuesi i Tregut të Lirë (FTL Sh.A), pjesë e OSHEE Group Sh.A, zhvilloi në datën 28.08.2023, në platformën online të blerjes së energjisë elektrike, procedurën “Blerje energjie për periudhën 01-30 shtator 2023”.

Pjesëmarrësit në procedurë ishin 10 shoqëri:

NOA ENERGY TRADE  SH.P.K.

ENER TRADE SH.P.K

EZ-5 ENERGY SH.P.K

FUTURE ENERFY TRADING AND EXCHANGE DINAMIC

 GSA SH.P.K

 AYEN ENERGY TRADING SH.A

 PROINFINIT CONSULTING SH.P.K

 GEN-I TIRANA SH.P.K

 AlbEsp TRADING & CONSULTING SH.P.K

 ReNRGY TRADING GROUP SH.P.K

Në këtë procedurë u kontraktua  sasia prej 5,040 MWh , me çmim 114.67 Eu/MWh dhe vlerë totale 577,936.80 Euro.

Shoqëria fituese u shpall  “NOA ENERGY TRADE”  SH.P.K..

09 Gusht

Investimi në NST Golem, kreu i OSHEE Group, Enea Karakaçi: Rrisim cilësinë e shërbimit në zonat turistike

Administratori i OSHEE Group, z.Enea Karakaçi, i shoqëruar nga administratori i OSSH, z.Blendian Dalipi dhe drejtori i drejtorisë së Tensionit të Lartë, z.Adriatik Kupi, inspektuan nga afër punimet për investimin e fuqizimit të nënstacionit 110/20/6 elektrik të Golemit, me anë të të cilit përmirësohet ndjeshëm cilësia e furnizimit me energji për të gjithë zonën e Kavajës, por dhe të Durrësit.

Kreu i OSHEE Group, z.Karakaçi  tha ndër të tjera se investimi në fjalë i përgjigjet nevojës në rritje për energji elektrike në bregdetin e Golemit dhe jo vetëm, dhe se janë marrë të gjitha masat e nevojshme për zonat turistike, sidomos aty ku sektori po zhvillohet me ritme të larta.

 “Ne po rivitalizojmë dhe një marrëveshje me qeverinë italiane, përsa i përket zonës nga Palasa në Dhërmi, që përfshin dhe Orikumin, të cilat kanë patur problematika ndër vite. Gjithashtu, jemi në process investimi për n/stacionin e ri në Velipojë. Të gjithë qytetarët duhet ta kuptojnë që strukturat e OSSH, OSHEE dhe FSHU janë aty dhe po ndjekin të gjitha mekanizmat që cilësia e shërbimit të jetë në rritje dhe stabël”, u shpreh administratori i OSHEE.

Nga ana e tij, administrtaori i OSSH, z.Dalipi, përmendi disa tregues të projektit, duke theksuar se, n/stacioni nuk i shërben vetëm Golemit, edhe zonave të tjera përreth, si Shkozetit në Durrës dhe NST Kavajë, pasi konsiderohet nyje për balancimin dhe operimin në kohë të rrjetit.

Vlera e investimit është rreth 2.4 milionë euro dhe synon shtimin e fuqisë me 40 MËA, impiant të dytë TM 20kV, etj. Investimi prek 25 mijë abonentë dhe sipas kreut të OSSH, pritet të përfundojë në fillim të vitit 2024.    

Duke marrë shkas nga dalja publike për mediat, administratori i OSHEE Group, z.Karakaçi i bëri apel qytetarëve që të jenë korrekt me pagesat e faturave të energjisë elektrike pasi çdo fond për kryerjen e investimeve,  vjen nga pagesat e tyre.

“Pavarësisht temperaturave të larta, zyrat e KNK janë të hapura deri në orën 20.00 sikurse i kemi patur dhe gjatë ditëve të diela javën e kaluar,  dhe po kështu do të vazhdojë dhe gjatë muajve gusht-shtator”, tha administratori i OSHEE Group.

02 Gusht

Intensifikohen kontrollet, OSSH luftë pa kompromis kundër abuzuesve të energjisë elektrike

Prej disa ditësh, OSSH ka intensifikuar kontrollet në terren, me qëllim reduktimin e humbjeve dhe disiplinimin e abonentëve.

 Nga kontrollet e ushtruara kryesisht në zonat turistike ku vërehet shtim i konsumit të energjisë si pasojë e rritjes së numrit të pushuesve, grupet e kontrollit të OSSH kanë konstatuar disa raste të lidhjeve të paligjshme konkretisht: në një pallat shumëkatësh në Shëngjin të Lezhës; 3 subjekte “hotel resort” në bregdet, 2 në Shëngjin dhe një në Golem; si dhe një resort në zonën e Saukut në Tiranë si dhe plot raste të tjera etj.  Pas konstatimit të rasteve të vjedhjes së energjisë, strukturat e Operatorit të Sistemit të Shpërndarjes, OSSH, kanë kryer denoncimet në polici, duke vënë para përgjegjësisë personat përkatës.

OSSH thekson se do të vazhdojë pa asnjë kompromis luftën kundër vjedhjes së energjisë elektrike, me qëllim formalizimin dhe vendosjen e plotë të shtetit ligjor në sektorin energjetik.

Kontrollet e strukturave të OSSH kundër abuzuesve të energjisë elektrike do të vijojnë dhe në ditët në vazhdim, për të prerë lidhjet e paligjshme që shkaktojnë humbje në rrjetin elektrik, por dhe për të mos lejuar uljen e cilësisë së furnizimit me energji elektrike, si pasojë e vjedhjes së energjisë.

OSSH i bën thirrje abonentëve të distancohen nga abuzimi me energjinë elektrike dhe të denoncojnë çdo rast në numrin e cel: 069 414 1001, whatsapp/viber.

27 Korrik

FSHU me qendrat e Kujdesit Ndaj Klientit – me kapacitet të plotë në shërbim të klientëve edhe gjatë sezonit turistik

Klientët e Furnizuesit të Shërbimit Universal, edhe gjatë këti sezoni turistik, i kanë të hapura sportelet çdo ditë të javës, nga e hëna në të shtunë, ora 08:00 – 20:00. Gjithashtu, edhe ditën e diel, datë 30.07.2023, të gjitha sportelet e KNK-ve do të jenë të hapura për të gjithë klientët. Ashtu si në çdo periudhë tjetër të vitit, edhe përgjatë këtij sezoni, FSHU sh.a., pjesë e OSHEE Group sh.a. po punon me kapacitete dhe orare të plota, për t’iu shërbyer të gjithë abonentëve në mbarë vendin. Në rreth 100 qendrat e Kujdesit Ndaj Klientit, të shtrira në të gjithë Shqipërinë, abonentët e FSHU-së kanë mundësi të paguajnë faturën mujore të konsumit të energjisë elektrike në pikën e tyre më të afërt të KNK-së apo edhe në çdo pikë tjetër alternative. Sportelet e Kujdesit Ndaj Klientit janë në disozicion të abonentëve për t’iu përgjigjur çdo lloj kërkese apo ankese në lidhje me furizimin me energji elektrike. Po ashtu, dy numrat për informacion të Call Center: 042274141 / 044401414 janë në dispozicion të çdo klienti çdo ditë të javës, nga ora 08:00 – 22:00.