Ndryshimet klimatike, administratori i OSHEE: Digjitalizimi i rrjetit dhe integrimi i energjisë së rinovueshme, ndë prioritetet e kompanisë për 5 vitet e ardhshme

Administratori i OSHEE Group, Mentor Hima, prezantoi sfidat dhe prioritetet për modernizimin e rrjetit të shpërndarjes së energjisë elektrike gjatë forumit me temë “Vendet Nordike-Shqipëri, Tranzicioni i gjelbër dhe ndryshimet klimatike – Si të kalojmë nga ambicia drejt një sistemi energjetik të sigurt dhe të besueshëm”, që u mbajt në Tiranë në datën 14 tetor.
Sipas tij, rritja e kërkesës për energji, integrimi i burimeve të rinovueshme, përforcimi i infrastrukturës dhe digjitalizimi i rrjetit janë ndër drejtimet kryesore ku do të përqendrohen investimet e OSHEE Group në 3 deri në 5 vitet e ardhshme.
Në fjalën e tij gjatë aktivitetit, administratori i OSHEE Group theksoi se rrjeti i shpërndarjes së energjisë elektrike në Shqipëri duhet të zhvillohet me të njëjtin ritëm me ndryshimet në mënyrën se si prodhohet dhe konsumohet energjia elektrike.
Sipas Himës, tranzicioni i gjelbër do të jetë i suksesshëm vetëm nëse vendi arrin të integrojë më shumë burime të rinovueshme të energjisë, duke garantuar njëkohësisht furnizim të sigurt, të qëndrueshëm dhe me kosto të përballueshme për një ekonomi në rritje.
Administratori i OSHEE Group u ndal te disa nga sfidat kryesore të sektorit energjetik, duke theksuar nevojën për investime të planifikuara, modernizimin e infrastrukturës dhe përshtatjen e rrjetit me zhvillimet e reja në prodhimin dhe konsumin e energjisë elektrike.
Rritja e kërkesës për energji dhe integrimi i burimeve të rinovueshme
Në fjalën e tij, administratori i OSHEE Group tha se kërkesa për energji elektrike po rritet, por jo në mënyrë të njëtrajtshme në të gjithë vendin.
Gjatë tetë muajve të parë të vitit 2026, sasia e energjisë elektrike që ka hyrë në rrjetin e shpërndarjes ishte afërsisht 10% më e lartë krahasuar me të njëjtën periudhë të vitit 2025.
Në Tiranë dhe në zonat bregdetare në zhvillim, zgjerimi urban, turizmi dhe aktiviteti i bizneseve po ndryshojnë zonat ku nevojiten kapacitete më të mëdha të rrjetit, si dhe periudhat kur kërkesa për energji është më e lartë.
Një tjetër sfidë lidhet me ndryshimin e funksionit dhe të mënyrës së operimit të rrjetit si pasojë e rritjes së prodhimit nga burimet e rinovueshme.
Energjia elektrike diellore e injektuar në rrjetin e shpërndarjes është rritur nga rreth 32 gigavat-orë në vitin 2020 në më shumë se 212 gigavat-orë në vitin 2025.
Ky është një zhvillim pozitiv për tranzicionin energjetik, por prodhimi i energjisë shpesh përqendrohet në zona që ndodhen larg qendrave kryesore të konsumit.
Për këtë arsye, kapaciteti i përgjithshëm i transformatorëve në nivel kombëtar nuk nënkupton domosdoshmërisht se i njëjti kapacitet është i disponueshëm në çdo pikë lidhjeje me rrjetin. Sipas Himës, kjo kërkon studime teknike në nivel lokal, menaxhim më të mirë të tensionit dhe përforcime të rrjetit në zonat ku evidentohen kufizime.
Një tjetër prioritet është rinovimi i aseteve të amortizuara dhe rritja e qëndrueshmërisë së rrjetit ndaj kushteve klimatike, duke garantuar njëkohësisht cilësinë e shërbimit të përditshëm.
“Kemi arritur përmirësime të matshme: humbjet në rrjetin e shpërndarjes kanë rënë nga 18,93% në vitin 2023 në 16,96% në vitin 2025, falë investimeve dhe forcimit të menaxhimit operacional. Megjithatë, një rrjet modern duhet të jetë në gjendje të përballojë edhe kushtet gjithnjë e më sfiduese të motit”, theksoi administratori i OSHEE Group, Mentor Hima.
Kuadri rregullator dhe përafrimi me tregun evropian
Paralelisht me investimet në infrastrukturë, po zhvillohet edhe kuadri rregullator i sektorit energjetik.
Ligji i ri shqiptar për sektorin e energjisë elektrike, i miratuar në vitin 2026, pasqyron evoluimin drejt një sistemi ku konsumatorët luajnë një rol më aktiv, zhvillohen zgjidhjet për ruajtjen e energjisë dhe fleksibilitetin e kërkesës, ndërsa rregullat e tregut shqiptar të energjisë elektrike përafrohen më tej me ato të Bashkimit Evropian.
Për OSHEE, kjo nënkupton përgatitjen për modele të reja të prodhimit, konsumit dhe rrjedhës së energjisë elektrike në rrjet, dhe jo thjesht përballimin e sasive më të mëdha të energjisë.
Investimet duhet të përqendrohen te nënstacionet dhe rrjetet e tensionit të mesëm në zonat ku kërkesa për energji po rritet, përforcimi i rrjetit në zonat ku është përqendruar prodhimi nga burimet e rinovueshme, si dhe automatizimi, monitorimi dhe përmirësimi i sistemeve të të dhënave në të gjithë rrjetin.
“Gjithnjë e më shumë, investimet duhet të planifikohen në mënyrë paraprake, duke parashikuar nevojat e ardhshme, dhe jo vetëm të reagojnë pasi kufizimet teknike të jenë shfaqur”, u shpreh ai.
Sipas administratorit të OSHEE Group, suksesi i tranzicionit energjetik të Shqipërisë nuk matet vetëm nga sasia e kapaciteteve të reja të prodhimit të energjisë së rinovueshme që instalohen. Ai matet edhe nga aftësia për ta integruar këtë energji në mënyrë të sigurt dhe për të garantuar furnizim të qëndrueshëm e të besueshëm për qytetarët dhe bizneset.
“Ambicia jonë është që rrjeti i shpërndarjes të jetë një mundësues i zhvillimit ekonomik të Shqipërisë, dhe jo një pengesë për të”, theksoi Hima.
Tre prioritetet e OSHEE për modernizimin e rrjetit në tre deri në pesë vitet e ardhshme

OSHEE Group vijon zbatimin e planit të investimeve për modernizimin e rrjetit të shpërndarjes. Gjatë tre deri në pesë viteve të ardhshme, synimi është të kalohet përtej përmirësimit të aseteve individuale dhe modernizimit të rrjetit si një sistem i integruar.
Për kompaninë e OSHEE, kjo nënkupton tri prioritete plotësuese.
Së pari, një infrastrukturë më të fuqishme dhe më rezistente.
Ky drejtim përfshin përforcimin e nënstacioneve dhe linjave të tensionit të mesëm, zëvendësimin e pajisjeve të amortizuara dhe përmirësimin e konfigurimit të rrjetit aty ku këto ndërhyrje mundësojnë rritjen reale të kapacitetit dhe përmirësimin e vazhdueshëm të furnizimit me energji elektrike.
Një shembull konkret është financimi në vlerën 22,5 milionë euro, për të cilin është nënshkruar marrëveshja me Bankën Evropiane për Rindërtim dhe Zhvillim (BERZH), për ndërtimin e një nënstacioni të ri nëntokësor 110/20 kV në qendër të Tiranës.
Së dyti, një rrjet që mund të monitorohet dhe menaxhohet në mënyrë më inteligjente.
OSHEE po avancon me një program për lidhjen e nëntë nënstacioneve me Qendrën Qendrore të Dispeçerisë, me qëllim monitorimin në kohë reale dhe komandimin në distancë.
Deri më tani janë instaluar rreth 8.000 matësa inteligjentë, ndërsa për 14.000 të tjerë janë lidhur kontratat përkatëse.
Këto janë hapa konkretë drejt një modeli operimi të bazuar në të dhëna, i cili mundëson reagim më të shpejtë ndaj defekteve, identifikim më të saktë të humbjeve, mirëmbajtje parandaluese dhe shërbim më transparent për klientët.
Së treti, rritja e fleksibilitetit të rrjetit.
Ndërtimi i kapaciteteve të reja mbetet thelbësor, por duhet të shfrytëzohen më mirë edhe kapacitetet ekzistuese. Kjo mund të arrihet përmes parashikimit më të saktë të kërkesës dhe prodhimit, automatizimit dhe, aty ku justifikohet teknikisht dhe ekonomikisht, zgjidhjeve të tilla si sistemet e ruajtjes së energjisë dhe menaxhimi fleksibël i kërkesës.
Në këtë drejtim, politikat dhe investimet po ndërthuren gjithnjë e më shumë. Ligji shqiptar për sektorin e energjisë elektrike, i miratuar në vitin 2026, e afron më tej kuadrin rregullator me rregullat e tregut evropian të energjisë.
Ai parashikon planifikimin e zhvillimit të rrjetit të shpërndarjes dhe prokurimin e shërbimeve të fleksibilitetit përmes mekanizmave të bazuar në treg, në përputhje me rregullimet e nevojshme rregullatore.

Gjithashtu, ligji njeh një rol më aktiv të klientëve në sistemin energjetik. Kjo krijon mundësi të reja zhvillimi, por nuk do të thotë se çdo shërbim i ri është tashmë funksional në praktikë.
Partneriteti me sektorin privat, tri fusha bashkëpunimi
Sa i përket partneritetit me sektorin privat, administratori i OSHEE Group identifikoi tri fusha konkrete bashkëpunimi.
E para është teknologjia, ku përfshihen matja inteligjente, integrimi i sistemeve SCADA për mbikëqyrjen, kontrollin dhe marrjen e të dhënave në distancë, sistemet e komunikimit, siguria kibernetike dhe analizimi i të dhënave.
E dyta është inxhinieria dhe zbatimi i projekteve, përmes procedurave transparente dhe konkurruese të prokurimit, të cilat garantojnë cilësi, efikasitet dhe përdorim sa më të mirë të burimeve financiare.
E treta është inovacioni, përmes projekteve pilot të vlerësuara siç duhet për zgjidhje të fleksibilitetit dhe teknologji të tjera të avancuara të rrjetit, aty ku ekzistojnë kushtet e nevojshme teknike dhe rregullatore.
Një rol të rëndësishëm në këtë proces kanë edhe partnerët ndërkombëtarë të financimit, të cilët ndihmojnë që investimet e planifikuara me kujdes të shndërrohen në projekte konkrete dhe të realizueshme.
Hima theksoi se, në të gjitha këto partneritete, duhet të mbështetemi te konkurrenca e hapur, specifikimet e qarta teknike dhe treguesit e matshëm të performancës.
OSSH-ja, si operator i licencuar i sistemit të shpërndarjes, mbetet përgjegjëse për aktivitetet e rregulluara të rrjetit dhe garantimin e aksesit jodiskriminues në të.
Më pak ndërprerje dhe humbje, më shumë cilësi në furnizim
Duke u ndalur te rezultatet që synohen nga investimet, administratori i OSHEE Group theksoi se suksesi nuk duhet të matet vetëm me numrin e pajisjeve të reja të instaluara apo kilometrave të rrjetit të ndërtuar.
Për të, treguesit realë të suksesit janë ulja e ndërprerjeve të energjisë elektrike, reduktimi i humbjeve në rrjet, përmirësimi i cilësisë së shërbimit dhe rritja e kapaciteteve për të mbështetur zhvillimin ekonomik. Vizioni i OSHEE Group është ndërtimi i një rrjeti shpërndarjeje më të fuqishëm, më inteligjent dhe më fleksibël. Politikat krijojnë kuadrin e nevojshëm, investimet ndërtojnë infrastrukturën, ndërsa teknologjia e bën rrjetin më inteligjent dhe më efikas.

Përgjegjësia, sipas Himës, është që këta elementë të ndërthuren në një sistem energjetik të sigurt, të besueshëm dhe me kosto të përballueshme, i cili u shërben më mirë klientëve, mundëson tranzicionin e gjelbër të Shqipërisë dhe mbështet integrimin gjithnjë e më të thellë të vendit në tregun evropian të energjisë.