Aktivitete

Qeveria do të synojë zhvillimin e mëtejshëm të sektorit elektroenergjetik, nisur edhe nga konsolidimi i një reforme e cila ka dhënë rezultate, duke konsoliduar qëndrueshmërinë financiare, operacionale dhe teknike me synim plotësimin e kërkesës në rritje për energji brenda vendit, duke pasur si prioritet integrimin e tregut vendas të energjisë në tregjet rajonale dhe ato europiane, dhe duke ulur varësinë nga importi.

Thatësira e tejzgjatur e këtij viti, me keqja e 10 viteve te fundit, ishte një “stres test” i kaluar me sukses. Ndryshe nga më parë kur gjithçka shkarkohej tek Buxheti i Shtetit, këtë herë kompanitë e sektorit arritën të menaxhonin vet situatën e paparashikueshme, duke reduktuar në mënyrë drastike nevojën për injektim parash nga qeveria ne vlera minimale. Mos harrojmë që vite më parë Buxheti i Shtetit hiqte paratë nga investimet etj, vetëm e vetëm që të sigurohej furnizimi me energji elektrike. Kriza tregoi që reforma energjetike ka dhënë rezultat. Nuk themi se jemi aty ku duhet po dha rezultat sepse përballoi financiarisht krizën më të vështirë të 10 viteve të fundit pa krijuar stres të rëndë financiar dhe të vinte në dyshim stabilitetin financiar të vendit.

Qeveria do të synojë thellimin e reformës dhe vazhdimin e programit të investimeve, për të garantuar sigurinë dhe cilësinë e furnizimit përmes:
• rritjes së kapaciteteve gjeneruese;
• diversifikimit të burimeve (ujore dhe me erë);
• rritjes së kapaciteteve transmetuese ndërkufitare e brenda vendit;
• vazhdimin e procesit të ndarjes së OSHEE sipas ligjit të sektorit të energjisë elektrike;
• ulje të vazhdueshme të humbjeve në rrjetin e shpërndarjes, garantimin e aksesit për burimet e reja dhe zhvillimin e tyre;
• krijimin e bursës dhe tregut të organizuar të energjisë;
• forcimin e pavarësisë së rregullatorit;
• integrimin e tregut me Kosovës dhe atë rajonal;
• përafrimin e plotë të të gjithë legjislacionit të sektorit me atë europian;
• stimulim të investimeve;
• vazhdim të betejës pa kompromis me korrupsionin dhe vjedhjen e energjisë elektrike.

Në katër vitet e ardhshme do të investohen 170 milionë euro për forcimin e kapaciteteve gjeneruese dhe sigurinë e digave të administruara nga shoqëria KESH sha.

Në transmetim do të realizohen 160 milionë euro investime ku ndër më kryesori është ai i ndërtimit të linjës së 400 kV mes Shqipërisë dhe Maqedonisë e cila mbyll ciklin e lidhjeve interkonektive me vendet fqinje. Rrëzon të gjitha ato hamendje që thonë që Shqipëria s’ka përfituar, përkundrazi këto para janë të përfituara nga Shqipëria dhe Maqedonia për këtë projekt. Mbyllet cikli i interkonektivitetit, pra Shqipëria do të ketë një rrjet të lidhur me Malin e Zi, Greqinë, Kosovën dhe Maqedoninë. Gjë që do të krijojë premisat e nevojshme që të eksportohet teprica e mundshme që mund të vijë nga rritja e prodhimit të energjisë në Shqipëri.

Qeveria do të vijojë me procesin e ndarjes së funksioneve të shpërndarjes dhe furnizimit të energjisë në OSHEE duke krijuar dy shoqëri më vete me synim përmirësimin e shërbimet e furnizimit për qytetaret dhe kanalizimin e investimeve ne shpërndarje.

Në këtë sektor pritet të realizohet një total investimesh prej rreth 520 milionë eurosh, pjesa dërrmuese të cilave me fondet e vet kompanisë. Pjesë e kësaj pakete investimesh do të jenë edhe projektet me Bankën Botërore, Bankën gjermane KfW për sistemin Scada dhe leximin e matësave Smart. Jam i bindur që sistemi i shpërndarjes shqiptare rinovohet në nivelin 60-70% të tij. Brenda tarifave aktuale, me planet aktuale të performancës dhe me reduktimin e mëtejshëm të humbjeve ne kemi mundësi që në pjesën më të madhe të gjithë ultësirës perëndimore dhe në qendrat kryesore ne të kemi energji si çdo vend tjetër europian dhe njerëzit këto gjëra po i shohin përditë.

Do të nxitet rritja e prodhimit të energjisë prej burimeve të rinovueshme për të siguruar një zhvillim të qëndrueshëm me qëllim rritjen e diversifikimit të burimeve nga energjitë alternative dhe miqësore me mjedisin si dhe implementimin e skemave të reja të matjes neto të energjisë nga impiantet e prodhimit të energjisë diellore dhe me erë për të gjithë vetprodhuesit, konsumatorë familjarë apo biznese.

Do të vazhdojnë investimet private në energji. Do të krijojmë kushtet që këto investime të vazhdojnë të progresojnë, sepse këto investime kanë progresuar edhe në këto vite për shkak të rritjes së likuiditetit në sektorin e energjisë elektrike. Jam i bindur që në vitin 2021, Shqipëria do të ketë edhe 300 mega të tjerë të instaluar dhe këto nga investime të huaja dhe të vendit. Shumë shpejt do të përfundojë edhe procedura për Kalivaçin, ashtu siç edhe shumë koncesionarë të tjerë të cilët me investimet e tyre dhe me riskun e tyre pa kërkuar garanci për blerjet e energjisë do të shtojnë investimet e huaja, por mbi të gjitha do të rrisin prodhimin e energjisë elektrike në Shqipëri.

Kjo do të bëjë që Shqipëria përveç prodhimit të saj hidro do të ketë edhe prodhimin e energjisë nga energjia diellore dhe era. Tashmë kemi një plan të miratuar, kemi një tarifë të miratuar, kanë filluar aplikimet e para dhe shumë shpejt do të organizojmë edhe ankandin më të madh sëbashku me Bankën për Rindërtim dhe Zhvillim për të ngritur impiantin më të madh fotovoltaik që është bërë ndonjëherë në Shqipëri dhe synojmë të paktën 30 megavat, i cili do të integrohet me rrjetin energjetik shqiptar. Në planin kombëtar dhe që është i financueshëm sepse ka një tarifë të rregulluar parashikohen edhe 30 megavat me erë. Do të thotë që Shqipëria fillon edhe me këto energji alternative për të diversifikuar portofolin e saj.

Në sektorin e energjive të rinovueshme, investimet e pritshme në ngritjen e impianteve të gjenerimit të energjisë nga burimet diellore janë rreth 150 milion Euro, ku deri në 2020 do të instalohen rreth 50 MV me tarifë të rregulluar. Nga burimet me energjinë e erës, investimet e pritshme do të jenë afërsisht rreth 60 milion Euro, ku deri në 2020 do të instalohen 30 MW me tarifë të rregulluar.

Marrë me shkurtime nga fjala e Ministrit z.Damian Gjiknuri gjatë prezantimit të programit qeverisës për Infrastrukturën dhe Energjinë në seancën e sotme parlamentare

Operatori i Shpërndarjes së Energjisë Elektrike (OSHEE) publikon treguesit operativ të aktivitetit të 7-Mujorit 2017. Të dhënat krahasimore me të njëjtën periudhë të një viti më parë tregojnë për vazhdimësinë e ecurisë pozitive në drejtim të rritjes së arkëtimeve dhe reduktimit të nivelit të humbjeve.

Për periudhën Janar-Korrik 2017, OSHEE ka rritur me 4.2% arkëtimet nga faturat e energjisë krahasuar me të njëjtën periudhë të një viti më parë duke mbledhur 37.1 miliardë lekë. Rritja e nivelit të arkëtimit vjen si rezultat i ndërgjegjësimit të konsumatorëve për të shlyer detyrimet brenda afateve kontraktuale. Norma e arkëtimit ndaj faturës pararendëse është rritur me 3.6% duke arritur në 98.8%. Theksojmë se 4 vjet më parë ishte rreth 73%!

Sasia e energjisë së shitur rezulton me një rritje në masën 2.9% çka është bërë e mundur nga rritja e kontrolleve në terren dhe ulja e abuzimit.

OSHEE vazhdon të ulë gjithashtu edhe nivelin e humbjeve (teknike dhe jo teknike) në rrjet. Falë investimeve në rrjetin e tensionit të mesëm dhe të ulët, humbjet për 7-Mujorin 2017 kanë arritur në 28.1% çka përbën 0.5% më pak se e njëjta periudhë e vitit 2016.

Ecuria pozitive vihet re edhe në treguesin e reduktimit të nivelit të borxhit të keq i cili në fund të Korrikut 2017 ka zbritur në 49.7 miliardë lekë (pa kamatat). Më parë, ky borxh i krijuar në periudhën 2007-2014 arrinte në 67.8 miliardë lekë.

Nënvizojmë se, si për Arkëtimet, ashtu dhe për nivelin e Humbjeve, siç paraqitet nga tabela më poshtë, OSHEE ka tregues negativë në muajin Qershor, kur administrohej përkohësisht nga drejtorit teknik.

Nënshkrimi i aktmarrëveshjeve me abonentët debitorë, për pagesat me këste të detyrimeve, ka ndikuar pozitivisht në bilancin e kompanisë. Deri në më tani, janë rreth 390 mijë aktmarrëveshje të lidhura mes OSHEE dhe abonentëve familjar dhe privat, ku fal pagesës së borxheve me këste, kemi një reduktim të detyrimeve për 7-Mujorin 2017 me afro 1.7 miliardë lekë.

Ecuria krahasimore e nivelit të humbjeve

7-Mujori 2013
45.1%

7-Mujori 2014
39.8%

7-Mujori 2015
32.1%

7-Mujori 2016
28.6%

7-Mujori 2017
28.1%

Ecuria krahasimore e nivelit të arkëtimeve

7-Mujori 2013
22.1 miliardë lekë

7-Mujori 2014
26.4 miliardë lekë

7-Mujori 2015
39.4 miliardë lekë

7-Mujori 2016
35.6 miliardë lekë

7-Mujori 2017
37.1 miliardë lekë

.Humbjet

Muaji Njesia 2016 2017 2017 vs 2016
Janar % 34.7% 33.5% -1.2%
Shkurt % 29.0% 27.6% -1.4%
Mars % 29.9% 28.7% -1.3%
Prill % 26.1% 25.82% -0.3%
Maj % 27.0% 25.9% -1.1%
Qershor % 24.4% 28.1% 3.8%
Korrik % 25.97% 24.69% -1.3%

Total 7Mujori % 28.55% 28.08% -0.5%

Arkëtimet Total

Muaji 2016 2017 2017 vs 2016
Janar 5,500,506 5,670,000 3.08%
Shkurt 5,369,530 5,601,988 4.33%
Mars 5,359,217 5,831,491 8.81%
Prill 5,105,759 5,038,018 -1.33%
Maj 4,920,953 5,328,851 8.29%
Qershor 4,577,557 4,464,443 -2.47%
Korrik 4,741,724 5,133,311 8.26%

Total 7-Mujori 35,575,247 37,068,102 4.20%

1 Maji, edhe pse ditë pushimi dedikuar Ditës Ndërkombëtare të Punëtorëve, nuk është e tillë për ekipin teknik të OSHEE-së në Tiranë. 30 punonjësit e Brigadës së Tensionit të Lartë vazhdojnë edhe sot, remontin e linjës Lanabregas–nënstacioni i Pallatit te Kongreseve, e ndërtuar në vitin ’84. Kjo linjë prej 8.5 kilometra, ku 90% është ajrore, është një prej nyjeve të rëndësishme në sistemin e shpërndarjes së energjisë elektrike për Tiranën. Amortizimi e bën mirëmbajtjen të nevojshme për parandalimin e defekteve të mundshme. Kryeministri Edi Rama ishte mes tyre, për t’i falënderuar për punën e përkushtuar në shërbim të qytetit, i shoqëruar nga ministrja e Mirëqenies Sociale dhe Rinisë, Olta Xhaxhçka dhe Administratori i Përgjithshëm i OSHEE, Ardian Çela.
Nga mungesa ndër vite e investimeve, rrjeti elektrik i vendit në pjesën më të madhe të tij është pothuaj i njëjti që prej ndërtimit në vitin 1974. OSHEE, falë performancës pozitive të sektorit në dy vitet e fundit, ka rritur investimet në rrjet, por edhe për mirëmbajtjen e rrjetit ekzistues për të shmangur defektet dhe ndërprerjen e energjisë. Aktualisht, 830 punonjës janë duke operuar në të gjithë territorin e vendit për kryerjen e remonteve. Investimet në remont kanë përfshirë gjithë zonën bregdetare, nga Velipoja në Sarandë.
“Kjo është një nga linjat kryesore për qytetin e Tiranës. Është linja e vitit ‘84. Po e bëjmë me fuqinë punëtore të OSHEE. Bën pjesë në programin e remonteve, që kap vlerën e 2 miliardë lekë, të ardhura të kompanisë, për të gjithë vendin. Në gjithë territorin e Shqipërisë janë 830 punonjës që po bëjnë remonte. Aktualisht jemi duke bërë remontet e zonës bregdetare, në mënyrë që me fillimin e sezonit turistik të jemi të gatshëm. Për pjesën tjetër të vendit brenda tetorit t’i kemi përfunduar këto remonte. Në sajë të këtyre remonteve, ne kemi ulur me 50% numrin e defekteve dhe me 80% është ulur numri i ndërprerjeve,” – informoi mbi rezultatet e deritanishme, administratori Çela.

OSHEE, theksoi Çela, ka ndjekur po ashtu një strategji të re për rekrutimin, trajtimin financiar dhe kujdesin ndaj punonjësve. Në viti 2017, për të dytin vit aplikohet sigurimi në punë i punonjësve, falë kontratave të lidhura me kompani sigurimi.

“Është vitit i dytë që të gjithë punonjësit e terrenit, mbi 3500 punonjës sigurohen ndaj aksidenteve që ndodhin në punë. Kompania i mbulon të gjitha shërbimet mjekësore, brenda dhe jashtë vendit, për rastet kur punonjësit janë aksidentuar në punë. Bëmë sistemimin dhe rritjen e pagave të të gjithë punonjësve në terren, ku paga minimale nga 250 mijë lekë [të vjetra] për punonjësit e pakualifikuar kaloi në 350 mijë lekë dhe për gjithë stafin teknik të mesëm shkoi në 550 mijë lekë. Kemi trajnuar mbi 5500 punonjës. Kemi rekrutuar vetëm gjatë vitit 2016, mbi 82 inxhinierë elektrikë.”
Ndryshimi i modelit të administrimit, investimet në rrjet, qasja e re në trajtimin e burimeve njerëzore, sipas Kryeministrit Rama, po e shndërrojnë OSHEE në një kompani moderne. Po ashtu, Kryeministri garantoi vazhdimin e masave të qeverisë në mbështetje të kategorive të ndryshme sociale.
“Për familjet që janë në ndihmë ekonomike, ne bëjmë një kompensim të plotë të të gjithë diferencës pas heqjes së fashës mbrojtëse. Është 19 milionë dollarë në vit nga buxheti i shtetit që shkon për këto familje dhe për gjithë kategoritë e tjera, të cilat prezumohet të mbroheshin nga fasha 300 k/W. Sot, askush nga ata nuk ndjen rritje të çmimit të energjisë, ndërkohë për fasha të tjera, çmimi i energjisë është ulur. Janë bërë zerime kamat vonesash masivisht, duke kontribuar të gjithë sëbashku që të bëhen të gjithë investime të mëdha dhe të fillojë ripërtëritja e një rrjeti shumë të vjetër. Për ne është shumë e rëndësishme që kompania të vazhdojë të përmirësojë standardet dhe të gjitha nivelet e trajtimit të punonjësve në funksion të përmirësimit të cilësisë dhe të vazhdojë të transformohet nga një ushtri militantësh që thjesht ushqeheshin, duke mos ofruar dot kompania asnjë lloj shërbimi, në një kompani moderne që duhet të jetë akoma më shumë, një nga krenaritë e vendit tonë.”
Ministrja e Mirëqenies Sociale dhe Rinisë, Olta Xhaçka falenderoi punonjësit e OSHEE, por edhe të gjithë ata që sot janë në krye të detyrës, duke siguruar se akoma më shumë do të bëhen në mbështetje e mbrojtje të punës së tyre, si dhe të kategorive të tjera vulnerabël.
“Dua të falënderoj të gjithë këta punonjës që bëjnë një punë të jashtëzakonshme, edhe sot që është ditë pushimi për gjithë të tjerët. Edhe ne në Ministrinë e Mirëqenies Sociale dhe Rinisë kemi bërë shumë. Kemi ofruar kompensimin e energjisë elektrike për 90 mijë pensionistë. Ka shumë punë për të bërë edhe për kategori të tjera në nevojë. Edhe me Inspektoratin e Punës kemi arritur që aksidentet në punë të ulen në masën 50%. Ne jemi shumë të angazhuar që në mandatin tjetër të arrijmë t’i shtrijmë këto arritje edhe shumë më tepër, edhe në kategori të tjera.”

Hyn në fuqi vendimi i datës 6 shkurt 2017, i Bordit të Entit Rregullator të Energjisë (ERE), në lidhje me reduktimin e tarifës së energjisë elektrike për objektet e kultit, nga 14 në 9.5 lek/kilovat.

Në muajin shtator 2016, Komiteti Shtetëror për Kultet kishte paraqitur kërkesën mbi mundësinë e ndryshimit të tarifës së energjisë elektrike për bashkësitë fetare, e cila u pasua me rekomandimet pro reduktimit të tarifës nga komisionet parlamentare të Ekonomisë dhe asaj të Veprimtarisë Prodhuese.

Më 22 dhjetor 2016, Bordi i ERE-s, mori vendimin për: “Fillimin e procedurave për rishikimin e çmimit të shitjes së energjisë elektrike nga Furnizuesi Universal për kategorinë Klient – Objekte Kulti/Bashkësi Fetare”.

Pas më shumë se 3 muajsh procedura, më 6 shkurt 2017, ERE vendos uljen e tarifave me mbi 32% për objektet e kultit.

Tashmë, tarifa e re, prej 9.5 lekë, ka vlefshmëri nga data 1 prill deri më 31 dhjetor 2017, ku në periudhën e fundvitit, ERE rishikon tarifat për operatorët dhe abonentët.

Nga të dhënat, mësohen sa janë rreth 800 objekte kulti fetar (kisha, xhamia, etj)

OSHEE është dëmtuar sot në dy raste nga kompani private të kontraktuara për punë publike (Bulevardi i Ri dhe Ujësjellës Kanalizime).

Konkretisht, është dëmtuar fidri A8, duke lënë pjeserisht pa energji elektrike një pjesë të zones së Paskuqanit, Kamzës, etj.
Fidri tjetër i dëmtuar është F5, për pasojë, kanë mbetur pa energji një pjesë e krahut të djathtë të autostradës (ne drejtim te Durresit), nga mbikalimi deri te QTU.

Aktualisht, brigadat e OSHEE janë duke punuar për riparimin e defekteve, në dy pjesët e dëmtuara.
Kompania përsërit apelin ndaj firmave private për më shumë kujdes në respektimin e kushteve teknike të operimit.