Deklarata per shtyp

Banka Europiane për Rindërtim dhe Zhvillim ka nënshkruar një hua sovrane prej 22.5 milionë euro me Operatorin e Shpërndarjes së Energjisë Elektrike, OSHEE GROUP, për të financuar ndërtimin e një nënstacioni të ri nëntokësor 110/20 kV në qendër të Tiranës.

Administratori i OSHEE Group, Mentor Hima, e cilësoi marrëveshjen e financimit shumë të rëndësishme pasi do të ndihmojë për forcimin e infrastrukturës energjetike të kryeqytetit.

“Kjo marrëveshje do të mbështesë investimin për ndërtimin e nënstacionit 110/20kV në qendër të Tiranës dhe është një ndërhyrje strategjike për forcimin e infrastrukturës energjetike të kryeqytetit dhe për përballimin e rritjes së vzhdueshme të kërkesës për energji.

Projekti adreson drejtpërdrejt nevojën për rritjen e kapaciteteve në një nga zonat me densitetin më të lartë të konsumit, duke përmirësuar ndjeshëm besueshmërinë e furnizimit, stabilitetin e rrjetit dhe cilësinë e shërbimit për qytetarët dhe bizneset.

Në të njëjtën kohë, ai kontribuon në uljen e humbjeve teknike dhe optimizimin e menaxhimit të ngarkesës në sistem.
Ky është një hap i rëndësishëm në drejtim të modernizimit të rrjetit të shpërndarjes dhe rritjes së sigurisë energjetike, duke krijuar kapacitete të reja për zhvillimet urbane dhe ekonomike të Tiranës.
Njëkohësisht, ky projekt është në përputhje me qasjen e Europian Bank for Reconstruction and Development në kuadër të programit “Green Cities”, pasi përbën një investim kyç në infrastrukturën që mundëson zhvillimin e qëndrueshëm urban.

Duke rritur eficencën e rrjetit dhe duke mbështetur elektrifikimin e mëtejshëm të qytetit, ai kontribuon ne objektivat për një Tiranë më të pastër, më moderne dhe më të qëndrueshme.”, u shpreh administratori i OSHEE GROUP, Mentor Hima.

Drejtoresha e BERZH-it në Tiranë, Ekaterina Solovova, deklaroi se investimi do të përforcojë sistemin e shpërndarjes së energjisë elektrike të Tiranës në kuadër të rritjes së kërkesës dhe zgjerimit të zhvillimit urban.
“Duke mbështetur zhvillimin e infrastrukturës moderne dhe të qëndrueshme të energjisë elektrike, ne po mbështesim Shqipërinë në rritjen e sigurisë së saj energjitike dhe zhvillimin e urbanistikës së gjelbër”, u shpreh drejtoresha e BERZH në Tiranë.

Investimi do të ndihmojë në rritjen e sigurisë, qëndrueshmërisë dhe efikasitetit të rrjetit të shpërndarjes së energjisë elektrike të kryeqytetit, në mbështetje të zbatimit të Planit të Masave për Qytetin e Gjelbër të Tiranës (GCAP), në kuadër të programit të BERZH-it për Qytetet e Gjelbra.

Financimi zëvendëson 14.5 milionë euro të alokuara më herët në kuadër të një huaje të mëparshme të BERZH-it dhe siguron 8 milionë euro shtesë.

Fondet do të përdoren për të përmirësuar stabilitetin e rrjetit në një zonë urbane në rritje të shpejtë dhe për të ndihmuar në reduktimin e humbjeve teknike, duke kontribuar në një tranzicion më të gjerë në sektorin energjitik në Shqipëri.

BERZH ka investuar në Shqipëri që nga viti 1991, me më shumë se 2.4 miliardë euro të angazhuara përmes 180 projekteve në energji, infrastrukturë, institucione financiare dhe sektorin privat.

Mentor Hima është emëruar administratori i ri i OSHEE Group, duke zëvendësuar në këtë detyrë Enea Karakaçin, pas emërimit të tij në krye të Ministrisë së Infrastrukturës dhe Energjisë.

Ceremonia e prezantimit u zhvillua në ambientet e OSHEE, në prani të zv.ministrit të Infrastrukturës dhe Energjisë, Erlind Sulo, si dhe Sekretarit të Përgjithshëm të Ministrisë, Besjan Kadiu.

Në fjalën e tij, administratori i ri, Mentor Hima, shprehu mirënjohjen për besimin e dhënë dhe vlerësoi rolin kyç të OSHEE GROUP në sektorin energjetik shqiptar.

“Kompania OSHEE është një hallkë kryesore e sektorit energjetik, çka e bën përgjegjësinë dhe detyrën shumë të madhe. Objektivat tona do të vijojnë të mbeten ulja e humbjeve në rrjet, rritja e arkëtimeve dhe garantimi i qëndrueshmërisë financiare të kompanisë, si bazë për rritjen e investimeve në rrjet,” u shpreh Hima.

Ai theksoi gjithashtu rëndësinë e bashkëpunimit dhe koordinimit të të gjitha strukturave për arritjen e objektivave dhe për përmirësimin e mëtejshëm të shërbimit ndaj qytetarëve.
Zv/ministri Erlind Sulo u shpreh ndër të tjera se, ky është një moment i rëndësishëm për institucionin, duke vlerësuar punën dhe arritjet e deritanishme të stafit të OSHEE, të cilat kanë kontribuar në forcimin e sektorit energjetik dhe në avancimin e drejtimit institucional

Ndërsa sekretari i Përgjithshëm, Besjan Kadiu, theksoi rëndësinë e vazhdimësisë në drejtimin e një shoqërie strategjike si OSHEE, duke nënvizuar se emërimi i Mentor Himës garanton vijimin e politikave dhe strategjive të ndërtuara ndër vite.

Furnizuesi i Shërbimit Universal (FSHU), pjesë e OSHEE Group, ka nisur zbatimin e skemave të reja lehtësuese për shlyerjen me këste të detyrimeve nga faturat e energjisë elektrike, të krijuara deri më 31 dhjetor 2024.

Skema e pagesës me këste prek të gjitha kategoritë e klientëve të FSHU, duke patur në fokus të veçantë kategoritë në nevojë, të cilëve u jepet mundësia të lidhin aktmarrëveshje edhe për detyrimet e krijuara në 2025-n.

Kush janë përfituesit?

Aktmarrëveshjet përfshijnë: klientët familjarë me ndihmë ekonomike, pensionistët kryefamiljarë dhe personat me status të veçantë, të cilët mund t’i shlyejnë detyrimet e krijuara deri më 31 dhjetor 2025, duke nisur nga 1,200 lekë çdo muaj, me kusht të mos kenë detyrime të reja të pashlyera për vitin 2026.

Klientët e tjerë familjarë do të paguajnë këste fikse mujore që nisin nga 2,800 lekë për faturat e prapambetura deri më 31 dhjetor 2024, me kusht që të mos kenë krijuar debi të reja për periudhën 2025–2026.

Për të ruajtur një standard të përballueshëm aq sa dhe të drejtë, numri maksimal i kësteve do të jetë jo më shumë se 240 këste.

Në çdo rast klienti ka të drejtë të zgjedhë një këst pagese, me vlerë më të lartë se vlera minimale, duke iu përmbajtur kushtit prej maksimumi 240 këstesh.

Për kategoritë buxhetore dhe jo-buxhetore, skema e akt-marrëveshjeve parashikon përfshirjen e të gjithë detyrimit në marrëveshje, me numrin e kësteve të përcaktuar sipas vlerës së debisë për faturat e prapambetura deri më 31 dhjetor 2024, me kusht që të mos kenë krijuar debi të reja për periudhën 2025–2026.

Numri i kësteve           Vlera e detyrimit

24 këste           100,000 – 500,000 lekë

48 këste           500,001 – 1,000,000 lekë

60 këste           1,000,001 – 5,000,000 lekë

84 këste           5,000,001 – 10,000,000 lekë

120 këste         mbi 10,000,000 lekë

Skema “speciale”

OSHEE GROUP ka miratuar dhe një skemë të veçantë për  faturat korrektive, faturat përmbledhëse dhe sistemuese, rastet e demontimit apo testimit të matësit, energji të akumuluar në mates.

Këto mund të likuidohen me deri në 24 këste. Nëse debia e akumuluar paguhet me një këst, përfitohet ulje e kamatvonesës.

Reduktimi i kamatëvonesave

OSHEE Group ka miratuar gjithashtu reduktime të kamatëvonesave për klientët që zgjedhin shlyerjen e të gjithë detyrimit me një këst të vetëm:

•           Klientët familjarë përfitojnë reduktim në masën 70% të kamatëvonesës.

•           Klientët jofamiljarë (buxhetorë dhe jobuxhetorë), përfitojnë reduktim në masën 50%.

•           Biznesi i vogël, përfiton falje të plotë (100%) të kamatëvonesës, nëse likuidon të gjithë detyrimin menjëherë.

Kushtet për Pjesëmarrje në Skemat Lehtësuese dhe Rregullat e Zbatimit

Për të përfituar nga skemat lehtësuese të miratuara nga OSHEE Group, klientët debitorë duhet t’i kenë shlyer detyrimet e vitit 2025 dhe në vijim, përpara nënshkrimit të marrëveshjes për detyrimet e prapambetura deri më 31 dhjetor 2024.

Me nënshkrimin e marrëveshjes, klienti duhet të kryejë pagesën e këstit të parë brenda 7 ditëve kalendarike dhe më pas të vijojë me pagesa mujore të rregullta deri në shlyerjen e plotë të detyrimit.

Këto masa përfaqësojnë një shprehje konkrete të angazhimit social të OSHEE Group për të mbështetur qytetarët në përballimin e vështirësive financiare dhe për të krijuar një marrëdhënie më të drejtë dhe të qëndrueshme me klientët.

Njëkohësisht, përmes zbatimit të këtyre skemave, synohet të forcohet edhe qëndrueshmëria financiare e kompanisë, si një parakusht për ofrimin e shërbimeve të sigurta dhe cilësore në të ardhmen.

Furnizuesi i Shërbimit Universal, FSHU pjesë e OSHEE Group, vijon procesin për përditësimin e kontratave të energjisë elektrike për të gjithë kategoritë e klientëve me qëllim ndryshimin e tarifimit sipas sistemit të ri të pagesës së energjisë. 

FSHU ka ngritur grupe kontrolli në terren të cilët kanë konstatuar subjekte private që ushtronin aktivitetin e biznesit, kryesisht shërbime dhe që tarifoheshin me 8.5-9.5 lek/kWh si klientë familjarë, jo 14 lek/kWh, tarifa e miratuar për klientët biznes.

FSHU, pjesë e OSHEE Group, fton të gjithë bizneset, organizatat jofitimprurëse (OJF-të), si dhe personat fizikë që veprojnë si biznese, të verifikojnë dhe përditësojnë kontratën e tyre të energjisë, nëse rezultojnë ende të regjistruar si klientë familjarë.

Pse është i nevojshëm ky proces?

Procesi i verifikimit të kontratave të energjisë për subjektet private është i nevojshëm për një tarifim të drejtë bazuar në sistemin e ri të pagesave sipas aktivitetit të biznesit.

Klasifikimi i pasaktë në sistem, ka ardhur si pasojë e regjistrimeve të vjetra, mungesës së përditësimeve apo ndryshimeve në përdorimin real të objektit.

Përmes këtij procesi, FSHU u bën thirrje subjekteve të ndërgjegjësohen dhe të bashkëpunojnë me grupet e kontrollit në terren, me qëllim ndryshimin e tarifimit nga familjar në jo-familjar, duke shmangur penalitetet.

Kush përfshihen në këtë proces përditësimi?

Në procesin e përditësimit përfshihen të gjithë subjektet që kryejnë veprimtari ekonomike në emër të një personi fizik apo juridik, të cilët e përdorin energjinë për qëllime biznesi (zyra, dyqane, punishte, qendra shërbimi etj.), apo që janë të regjistruar si OJF, por në praktikë konsumojnë energji për funksione të ngjashme me ato të subjekteve ekonomike.

Ky proces nuk prek klientët që janë realisht konsumatorë familjarë dhe e përdorin energjinë vetëm për qëllime banimi.

Procesi është i thjeshtë dhe përfshin verifikimin e kontratës aktuale të energjisë elektrike (nëse është familjare apo biznes), plotësimin e një kërkese për ndryshim të kategorisë, bashkëngjitjen e dokumentacionit përkatës, që vërteton natyrën ekonomike të aktivitetit (NIPT, ekstrakt QKB etj.).

Përditësimi i kontratave mund të bëhet lehtësisht në sportelet e Qendrave të Kujdesit të Klientit të FSHU-së, pjesë e OSHEE Group, ose online, përmes platformës online, web-it zyrtar të kompanisë dhe aplikacionit të OSHEE-së.

FSHU dhe OSHEE Group u bëjnë thirrje të gjitha subjekteve të mos e shtyjnë këtë proces dhe të përfitojnë nga mundësia për përditësim  te dhenash  dhe ndryshim tarifimi, duke garantuar një sistem më të rregullt dhe funksional për të gjithë.

Për të forcuar komunikimin me qytetarët dhe për të përmirësuar shërbimet e saj, OSHEE Group ofron një shërbim të ri digjital për raportimin dhe zgjidhjen sa më të shpejtë të problematikave që lidhen me rreziqet nga rrjeti elektrik.

Prej disa ditësh, platforma e re online është aktive dhe e përdorshme për qytetarët. Përmes saj, ata mund të raportojnë raste që rrezikojnë sigurinë e komunitetit pranë zonave të tyre të banimit, si: kabina elektrike të dëmtuara ose të hapura, shtylla të amortizuara, tela të ekspozuar apo çdo element tjetër që mund të përbëjë rrezik për sigurinë publike.

Projekti pilot po zbatohet fillimisht në Tiranë. Duke skanuar kodin QR të vendosur në boksin elektrik të çdo pallati, qytetarët mund të raportojnë problematikën drejtpërdrejt në platformën e re, duke plotësuar formularin në seksionin “Raporto rrezik energjie”

Raportimet mund të bëhen gjithashtu edhe përmes faqes zyrtare të OSHEE Group, www.oshee.al.

Risia e këtij shërbimi qëndron te transparenca dhe komunikimi i vazhdueshëm me qytetarin. Për çdo raportim, qytetarët informohen mbi statusin e ankesës, që nga momenti i pranimit, faza e shqyrtimit dhe deri në përfundimin e ndërhyrjes nga ekipet e OSSH-së në terren.

Pas marrjes së njoftimit, ekipet e OSSH-së, pjesë e OSHEE Group, ndërhyjnë për verifikimin dhe zgjidhjen përfundimtare të problematikës.

Ky shërbim është një hap i rëndësishëm drejt rritjes së sigurisë dhe përmirësimit të shërbimit të OSHEE Group ndaj qytetarëve

Prej datës 20 dhjetor, gatishmëria e kompanisë OSHEE Group është rritur ndjeshëm për të siguruar mbarëvajtjen e furnizimit me energji elektrike gjatë festës së Krishtlindjes dhe Vitit të Ri.

Në terren janë angazhuar rreth 1 600 punonjës, të organizuar në grupe dhe në gatishmëri 24 orë në ditë, të pajisur me të gjithë bazën materiale të nevojshme.

Po ashtu, call center-i funksionon pa ndërprerje për të trajtuar në kohë reale çdo shqetësim të konsumatorëve.

Administratori i OSHEE Group Enea Karakaçi, gjatë prezantimit të planit të masave të hartuara për garantimin e furnizimit cilësor me energji elektrike në të gjtihë vendin, theksoi se, konsumi i energjisë elektrike ka shënuar nivele rekord.

“Vetëm një ditë më parë, është regjistruar një konsum prej 22.9 milionë kilovat-orë, dita më e ngarkuar e vitit deri më tani.

Sipas parashikimeve, piku i konsumit pritet të arrihet më 31 dhjetor.

Pavarësisht rritjes së ndjeshme të konsumit dhe uljes së temperaturave, nuk janë konstatuar problematika serioze në rrjet apo mungesa të furnizimit.

Qëllimi kryesor, sipas drejtuesve, është që mungesa e energjisë elektrike të mos jetë shqetësim për qytetarët gjatë ditëve festive”, u shpreh administratori i OSHEE, Enea Karakaçi.

Administratori i OSSH, Blendian Dalipi, bëri me dije se falë investimeve të kryera, OSSH ka garantuar një rrjet më të sigurt në të gjithë Shqipërinë.

“Janë ndërhyrë 12 nënstacione për rritje kapacitetesh, ku gjashtë prej tyre kanë përfunduar, përfshirë Pogradecin, Zogun e Zi, Lezhën, Çorovodën dhe Kafarajn.

Po ashtu, po vijojnë punimet në Velipojë, Fier, Akërni, Piqeras, Xarrë, si dhe në zonat turistike të Bogës dhe Thethit.

Në kuadër të investimeve janë ndërtuar 667 kilometra linja të reja ajrore dhe kabllore, 661 kabina të reja dhe mbi 1 300 kilometra linja të tensionit të ulët, të cilat përmirësojnë ndjeshëm cilësinë e furnizimit dhe ulin numrin e avarive”, tha administratori i OSSH, Blendian Dalipi.

OSHEE Group parashikon ta mbyllë vitin 2025 me një performancë shumë të mirë si në aspektin financiar ashtu edhe teknik.

Humbjet në rrjet janë ulur me 1% krahasuar me një vit më parë, ndërsa parashikimet tregojnë se viti do të mbyllet brenda objektivit të vendosur nga Ministria e Infrastrukturës dhe Energjisë, në nivelin 16.9%.

Një tjetër tregues pozitiv janë arkëtimet, të cilat gjatë vitit 2025 kanë arritur pothuajse në 100%. Administratori i OSHEE falënderoi punonjësit për angazhimin dhe punën e palodhur, duke theksuar se këto rezultate janë fryt i kontributit të gjithë stafit.

Nga ana financiare, kompania parashikon që viti 2025 të mbyllet me rreth 70 milionë euro fitim, një rezultat i konsideruar shumë i mirë, i cili do të shërbejë si bazë për investime dhe përmbushjen e angazhimeve gjatë vitit 2026.

Ndër to përfshihet indeksimi i pagave me 6.1% për punonjësit e OSHEE-së, si dhe rritje pagash për elektricistët e terrenit dhe inxhinierët elektrikë, të cilat do të fillojnë të zbatohen nga janari 2026.

“OSHEE Charge” është projekti më i ri që kompania OSHEE Group do të zbatojë brenda vitit 2026, i cili ka për qëllim krijimin e një rrjeti të gjerë karikimi për mjetet elektrike në të gjithë vendin.

Në prezantimin e kësaj nisme, administratori i OSHEE Group, Enea Karakaçi, theksoi se sektori i karikimit të mjeteve elektrike është zhvilluar me shpejtësi, por pa një kuadër të plotë rregullator.

 Më datë 1 nëntor, në bazë të propozimit të OSHEE Group, ERE ka miratuar cmimin 22 lek për kilovat për pikat e karikimit të mjeteve elektrike.

 “Në këto pika të karikimit të mjeteve elektrike, ccmimi i energjisë elektrike varion nga 40-60 lek për kilovat ndërkohë që kostoja e blerjes së tyre është 14 lek për kilovat në pikat e karikimit të mjeteve, pra 3 fish shitja më e lartë.

Sot kemi mbi 254 pika karikimi në vend dhe rreth 16 mijë mjete elektrike të regjistruara, nga të cilat 4,600 vetëm në 10-mujorin e parë të këtij viti.

Rritja e shpejtë e këtij tregu kërkon rregullim të qartë, që të garantohet qëndrueshmëria e rrjetit dhe ndarja e drejtë e kostove”, tha Karakaçi.

Në prezantimin e “OSHEE Charge” morën pjesë kryeministri Edi Rama dhe ministrja e Energjisë Belinda Balluku.

Ministrja Balluku tha se sektori i energjisë është renditur për të dytin vit radhazi ndër sektorët me performancën më të mirë, sipas raportit më të fundit të progresit të Komisionit Evropian.

 “Suksesi është fryt i investimeve të vazhdueshme dhe reformave që kanë përmirësuar ndjeshëm eficiencën dhe besueshmërinë e sistemit energjetik”, u shpreh ministrja e Energjisë, Belinda Balluku.

Kryeministri Edi Rama e cilësoi “OSHEE Charge” si një hap të rëndësishëm drejt modernizimit të sektorit energjetik dhe transportit në vend.

“Lajm shumë i mirë, i cili vjen në një moment pozitiv për sektorin e energjisë. Sot kemi këtë inovacion, ndërkohë që brenda vitit të ardhshëm do të kemi edhe fillimin e punës transformuese për matësat e energjisë, duke filluar në sistemin e matësave inteligjentë.

Brenda këtij mandati besoj që do të përmbyllim edhe këtë proces që patjetër do ta ulë edhe më shumë nivelin e humbjeve teknike në rrjet, duke çuar në mesataren e poshtme të BE-së, por edhe do të rrisë cilësisht faturimin e çdeo konsumatori duke riparuar edhe ato të meta të fundit që ka procesi i faturimit”, tha Rama.

Enti Rregullator i Energjisë ka miratuar më 1 nëntor çmimin e ri prej 22 lekësh për kilovat për pikat e karikimit komerciale, ndërsa për konsumatorët familjarë tarifa mbetet 9.5 lekë, më e ulëta në rajon.

Në edicionin e 31-të të Panairit Ndërkombëtar të Tiranës, organizuar nga “Klik Ekspo Group”, mori pjesë edhe OSHEE Group me kompanitë e saj bija OSSHdhe FTL.

Në një nga panelet e panairit, u prezantua vizioni dhe strategjia e grupit për periudhën afatmesme dhe afatgjatë, në përputhje me objektivat e strategjisë kombëtare të energjisë dhe direktivat EU Green Deal, që synojnë një tranzicion të qëndrueshëm energjetik deri në vitin 2030.

Nënstacioni i parë nëntokësor në qendër të Tiranës

“Një nga projektet më të rëndësishme që po zbatojmë është ndërtimi i nënstacionit të parë elektrik nëntokësor në qendër të Tiranës një investim me vlerë rreth 22 milionë euro,” deklaroi administratori i OSHEE Group, Enea Karakaçi.            `

Sipas tij, projekti, i cili pritet të nisë nga viti 2026, do të jetë i pari i këtij lloji në Shqipëri dhe ndër të paktët në Europë. “Ky investim është thelbësor për furnizimin me energji të kryeqytetit, që ka njohur një rritje të madhe në konsum dhe ndërtime,” shtoi Karakaçi.

Objektivat e “Shqipërisë 2030”

Gjatë fjalës së tij, kreu i OSHEE-s vuri në dukje objektivat kryesore të sektorit të energjisë për dekadën në vijim:

“Një nga synimet kryesore të qeverisë shqiptare është ulja e humbjeve të energjisë në nivelin 10% deri në vitin 2030 – një objektiv plotësisht i arritshëm, duke parë se nga 24% në vitin 2017, jemi sot në rreth 17% dhe pritet që 2025 të mbyllet me 16.9%.”

Sipas Karakaçit, qëndrueshmëria e arkëtimeve është një tjetër pikë e forte.

“Sot jemi mbi 100% të arkëtimeve, dhe deri në 2030 synojmë ta mbajmë mbi nivelin 98%.”

Një tjetër drejtim strategjik, sipas tij, është rritja e burimeve të rinovueshme, ku qeveria ka synuar që më shumë se gjysma e energjisë që konsumon vendi të vijë nga burime të pastra. “Ky objektiv është i arritshëm, pasi sot jemi pranë këtij niveli falë projekteve të reja fotovoltaike dhe eolike që po zhvillohen në vend,” theksoi ai.

Investimet në digjitalizim dhe matësat inteligjentë

Një ndër prioritetet e OSHEE Group mbetet modernizimi i rrjetit përmes investimeve në inovacion dhe digjitalizim.

“Jemi në fazë të avancuar me projektin e ri të sistemit SCADA, që do të mundësojë komandimin në distancë të rrjetit elektrik dhe monitorimin e ngarkesave në kohë reale,” u shpreh Karakaçi, duke shtuar se projekti po realizohet në bashkëpunim me KfW, ndërsa një tjetër investim madhor është vendosja e 350 mijë matësave inteligjentë në gjithë Shqipërinë, në partneritet me Agjencinë Franceze të Zhvillimit.

“Kjo do t’u mundësojë konsumatorëve të shohin konsumin e tyre në kohë reale dhe të menaxhojnë më mirë energjinë që përdorin,” shtoi ai.

Diversifikimi i burimeve të energjisë

Sipas administratorit të OSHEE Group, politika energjetike shqiptare po ecën me hapa të sigurt drejt diversifikimit të burimeve.

“Deri para pesë vitesh ishte e paimagjinueshme të kishim kapacitete të mëdha fotovoltaike, por sot projekti 140 MW i Karavastasë është funksional, ndërsa ai i Spitallës është në ndërtim,” sqaroi Karakaçi.

Ai theksoi se kombinimi i energjisë diellore me atë hidrike siguron një balancë të mirë gjatë periudhave të thatësirës, ndërkohë që projektet e gazifikimit dhe ankandet për energjinë e erës do të rrisin më tej sigurinë energjetike të vendit.

Rrjeti, i gatshëm për energjinë e gjelbër

Karakaçi pranoi se kërkesa për lidhje të reja në rrjet nga prodhuesit fotovoltaikë është më e madhe se kapacitetet aktuale, por theksoi se kompania po gjen zgjidhje të shpejta teknike për të akomoduar çdo investitor.

“Sot kemi rreth 4 mijë subjekte vetëprodhuese, familjare dhe private, të lidhura në rrjetin e shpërndarjes, me kapacitete që kanë arritur 400 megavat. Kjo tregon vullnetin e OSHEE Group për të mbështetur çdo klient që investon në energjinë e gjelbër,” u shpreh ai.

Në përfundim, Karakaçi theksoi se OSHEE Group është plotësisht e angazhuar të përmbushë objektivat e qeverisë shqiptare për “Shqipërinë 2030”, duke avancuar në drejtim të një sistemi energjetik më të pastër, më të qëndrueshëm dhe plotësisht të digjitalizuar.