OSHEE Group, drejt një transformimi të qëndrueshëm dhe digjitalizimit të sektorit energjetik!

Në kuadër të projektit të mbështetur nga Agjencia Franceze për Zhvillim (AFD), që synon modernizimin dhe transformimin digjital të OSHEE Group dhe shoqërive të saj, OSSH dhe FSHU, ka nisur cikli i workshop-eve të dedikuara zhvillimit të sistemeve inteligjente të matjes dhe përmirësimit të proceseve organizative.

Në fjalën e tij përshëndetëse, Administratori i OSHEE Group, z. Mentor Hima, nënvizoi rëndësinë e veçantë strategjike të këtij projekti për të ardhmen e Grupit dhe të shoqërive të tij.

Ai theksoi se sektori energjetik shqiptar ka bërë hapa të rëndësishëm drejt përafrimit të kuadrit ligjor dhe rregullator me standardet dhe legjislacionin e Bashkimit Evropian, ndërsa puna vijon për thellimin e këtij procesi dhe përmbushjen e objektivave të modernizimit të sektorit.

Në këtë kontekst, z. Hima u bëri thirrje të gjithë punonjësve dhe strukturave të përfshira për angazhim maksimal, bashkëpunim të ngushtë dhe një qasje proaktive, duke theksuar se rëndësia e veçantë e projektit kërkon përgjegjësi, përkushtim dhe kontribut konkret nga secili.

Ky projekt përfaqëson një mundësi të rëndësishme për forcimin e kapaciteteve institucionale, modernizimin e proceseve të punës dhe përshpejtimin e transformimit digjital, në funksion të një sistemi energjetik më efikas, inteligjent dhe të përafruar me standardet evropiane.