Back
09 Shtator

OST investim 1 milionë USD në Nënstacionin e Ibës, Balluku: Përfitojnë 5 mijë abonentë, i përgjigjet zhvillimit të zonës për 10 vitet e ardhshme

Në nënstacionin elektrik të Ibës ka përfunduar investimi me vlerë afro 1 milion dollarë, i Operatorit të Sistemit të Transmetimit, duke rritur në këtë mënyrë sigurinë energjetike, si dhe duke modernizuar sistemin e menaxhimit të këtij nënstacioni, përmes instalimit të pajisjeve që garantojnë komandimin në distancë.

Ministrja e Infrastrukturës dhe Energjisë, Belinda Balluku, e shoqëruar nga administratori i OST, Skerdi Drenova inspektuan investimin e bërë, nga i cili përfitojnë cilësi më të mirë të furnizimit me energji elektrike afro 5 mijë abonentë.

Administratori i OST bëri të ditur se nënstacioni i ndërtuar në vitet ’70-të, i është nënshtruar një rikonstruksioni të plotë, i cili i jep tashmë këtij nënstacioni një rol kyç.  “Nga një nënstacion fundor tashmë bëhet një nënstacion, që është një nyje transformuese, e cila do furnizojë zonat përreth, por njëkohësisht do të lehtësojë çdo akomodim të mundshëm, që mund të ndodhë gjatë punëve operative. Është ndryshuar totalisht gjithçka nga ana 110-she. I gjithë investimi është bërë që këtu të kemi sigurinë e transmetimit dhe kjo siguri transmetimi do ndihet shumë në të gjithë konsumatorët”, u shpreh administratori Drenova.

Ministrja e Infrastrukturës dhe Energjisë theksoi se ndërhyrja e bërë në nënstacionin e Ibës, jo vetëm mbulon nevojat aktuale të zonës, por është parashikuar që t’i përgjigjet edhe zhvillimeve të pritshme në zonën lindore të Tiranës në 10 vitet e ardhshme.

“Mos harrojmë dy elementë kryesorë, që këto investime kanë. E para dhe më e rëndësishmja është se kemi rritur sigurinë energjetike, çka është edhe synimi, duke nisur nga prodhuesi, tek transmetuesi dhe deri tek shpërndarja. Nga ana tjetër duhet të themi, që kemi automatizuar sistemet. Automatizimi sistemeve na sjell sot para një pozite shumë të fortë nga ajo e së shkuarës, pasi ju sot arrini dhe manovroni gjithçka në distancë. Edhe tek ky nënstacion kemi instaluar sistemin SCADA”, nënvizoi Balluku.

Ministrja e Infrastrukturës dhe Energjisë theksoi se investimet në sektorin energjetik do të vijojë me qëllim jo vetëm modernizimin e sistemit, por duke pasur në fokus uljen e nivelit të humbjeve të energjisë në rrjet. “Kemi pasur një fokus tek energjia. Po bëhen çdo ditë dhe më shumë investime të rëndësishme, të cilat do të ndikojnë minimalisht edhe për një dekade, pasi janë të mirë studiuara dhe është shumë e rëndësishme për ne, që të ofrojnë edhe më shumë mundësi për akomodimin e kapaciteteve, të cilat do jenë të nevojshme në të ardhmen. Mos harrojmë faktin, që synimi jonë kryesor, i cili padyshim i takon shpërndarjes, por mbështetet edhe nga ju fuqishëm, është ulja e humbjeve në sisteme”,  u shpreh ministrja Belinda Balluku.

Rritja e cilësisë së furnizimit dhe skemës së linjave të transmetimit në nënstacionin e Ibës sigurohet si  rezultat i zëvendësimit të pajisjeve të amortizuara dhe të dala jashtë funksioni, me pajisje të reja dhe të kohës. Gjithashtu rikonstruksion i plotë i rrugëve hyrëse dhe të brendshme të nënstacionit, krijon kushte optimale për hyrjen e mjeteve në raste ndërrimi ose riparimi të pajisjeve.

04 Shtator

Investimi 8 milionë euro, OST dhe OSHEE me projekt të integruar përmirësojnë ndjeshëm furnizimin me energji elektrike në zonën e Gjirit të Lalzit

Ministrja Belinda Balluku inspektoi investimet e bëra në ndërtimin e linjës 110 kV dhe nënstacionin elektrik në zonën e Gjirit të Lalzit. Një investim i  përbashkët i OST dhe OSHEE i cili përmirëson cilësinë e furnizimit me energji elektrike për gjithë zonën e bregdetit.

Kliko ketu per materialin e plote

02 Shtator

Vijon rritja e kapacitetit dhe cilësisë së furnizimit me energji elektrike për Tiranën

Tirana shtohet çdo vit me banorë të rinj dhe po ashtu po shtohen investimet në sektorin energjitik, të cilat kanë siguruar rritjen e kapacitetit dhe cilësisë së furnizimit me energji elektrike të kryeqytetit. Nënstacioni energjitik i Uzinës së Autotraktorëve, i cili furnizon me energji një numër të madh banorësh, por edhe fabrikash që ndodhen në zonë, është shndërruar falë investimeve nga një ngrehinë e amortizuar, në një infrastrukturë moderne me teknologji bashkëkohore komandimi dhe monitorimi SCADA.

Kryeministri Edi Rama vizitoi sot Nënstacionin ku është investuar përgjatë viteve të fundit në ndërtimin e fiderave të rinj dhe të kabinave të reja.

“Nënstacioni i Uzinës së Autotraktorëve mbulon një zonë mjaft e rëndësishme, e cila ka një numër të madh banorësh, por nga ana tjetër edhe disa fabrika, të cilat furnizohen nga ne. Këtu jemi në një proces prej thuaje një viti përsa i përket shtimit dhe ndryshimit të pjesës më të rëndësishme, fiderave që kemi patur. Mos harrojmë që këtu kemi trashëguar një rrjet të amortizuar, dhe me punën që kemi nisur, si dhe duke shtuar edhe 4 fiderat e reja supozohet që këtu do të kemi një investim të ri prej 20 kilovolt, ku të gjithë linjat ajrore do të jenë zëvendësuar me fiderat e rinj. Gjithashtu kemi sallën nga e cila kontrollohet i gjithë nënstacioni. Shifrat e investimit synojmë që në fund të këtij viti të arrijnë deri në 13 milionë dollarë. Dua të përmend këtu edhe Bankën Botërore, e cila ka mbështetur këtë investim, ashtu siç ka mbështetur të gjitha investimet në energji në kuadrin të paketës së rimëkëmbjes,”– u shpreh Ministrja e Infrastrukturës dhe Energjisë, Belinda Balluku.

I ndërtuar që në vitet ‘60-të, ky nënstacion, ndër më të fuqishmit që administron OSHEE-ja, nuk ka patur asnjë investim përgjatë 30 viteve. Ndërsa së fundmi ka përftuar një investim të rëndësishëm, i konceptuar në tre faza, çka do të rrisë cilësinë dhe sigurinë e furnzimit me energji elektrike të banorëve. Drejtori i Përgjithshëm i OSHEE-së, Ardian Çela shpjegoi se “ky është nënstacioni më i fuqishëm në 174 nënstacione që administron kompania. Është më i madhi dhe me këtë nënstacion furnizohen rreth 211 mijë banorë. Është një nënstacion i ndërtuar në vitet ‘60-të, ku për 30 vite nuk ka patur asnjë investim. Investimi i fundit është ai që e kemi nisur ne para dy vitesh. E kemi ndarë në tre faza, sepse janë investime që shkojnë në mbi 13 milionë dollarë. Deri tani kemi investuar rreth 9 milionë dollarë, ku nga 35 fidra që ka ky nënstacion, ne po eleminojmë të gjithë ato fidera që janë investime të viteve ‘70-të dhe kemi ndërtuar dhe rikonstruktuar rreth 130 kabina, ku më shumë se gjysmën e tyre e kemi kthyer në të automatizuara që komandohen në distance. Ky nënstacion është pjesë e komandimit SCADA dhe monitorohet nga salla e komandimit SCADA që kemi tek drejtoria qendrore. E kemi nisur me 6 nënstacione dhe brenda këtij viti fillojmë dhe përfundon vitin që vjen të gjitha nënstacionet e Durrësit dhe të Tiranës që komandohen me sistemin online. Kjo rrit cilësinë e furnizimit, por edhe sigurinë e furnizimit për banorët. Investimi që ne kemi nisur dhe që mbaron në tremujorin e parë të vitit 2021 përfshin rreth 40 mijë banorë të tjerë, ku do të kemi rreth 6 fidera të rinj dhe 7 të tjerë që do t’i zëvendësojmë dhe do të rikonstruktojmë dhe ndërtojmë rreth 20 kabina të reja. Me këtë, ne do të shkojmë në 54 fidera që do të ndërtohen të gjithë në nivelin 20 kilovolt.”

Ministrja Balluku tha se krahasuar me vitin 2013 është reduktuar ndjeshëm humbja e energjisë. “Duke ju referuar sigurisë enegjitike dhe shpërndarjes duhet të theksojmë që në vitin 2013 humbjet në rrjet i kemi patur 45%,, ndërkohë që sot nga të gjitha llogaritjet jemi ne 21.8%. Ndërkohë që, Drejtori i OSHEE-së Çela tha se synohet që ky vit të mbyllet nën 21 %.

Kryeministri vizitoi sallën ku ndodhej sistemi i kontrollit dhe i monitorimit për të gjithë nënstacionin. Inxhinieri shpjegoi se nga kjo sallë kontrollohen në kohë reale të gjithë parametrat e nënstacionit, ngarkesat aktuale, si dhe bëhen komandimet, në mënyrë që personeli operativ të mos e ketë të nevojshme të dalë jashtë në terren, por të bëhet monitorim online.

Kryeministri Rama theksoi se në vetëm 7 vite janë bërë më shumë investime se në dekada të tëra në sistemin e furnizimit me energji elektrike, si dhe në rrjetin e furnizimit me ujë të pijshëm gjithashtu.

“Kjo është zona më e ngarkuar dhe me një popullatë që vazhdon rritet dhe me gjithë sistemin SCADA është absolutisht revolucion, krahasuar me çfarë ishin. Në këto 7 vjet janë bërë më shumë se në dekada të tëra, pasi të gjithë këto janë infrastruktura të trashëguara nga vitet ‘70-të, siç janë dhe ato të ujit. Të gjitha kantieret e ujit tani janë në punë për 55 zona të mëdha urbane të Shqipërisë, janë kantiere për të transformuar rrjete të furnizimit me ujë të viteve ‘60-të, 70-të dhe të fillim viteve ‘80-të. Në të gjitha ato rrjete është bërë mirëmbajtje, por nuk është bërë asnjë investim. Ne nuk kemi patur mundësi të investojmë më parë, sepse kishim gjithë këtë barrë borxhesh dhe barrë gjërash që duhej lehtësuar pak nga pak. Por të imagjinosh që ndërkohë që demografia ka ndryshuar rrënjësisht, që janë rritur konsumatorët në mënyrë eksponenciale në zonat urbane dhe qoftë furnizmi me ujë, qoftë furnizimi me energji i është lënë atyre rrjeteve të ndërtuara në atë kohë për atë lloj numri banorësh dhe për atë lloj konsumi që ishte komplet konsum tjetër është një gjë e paimagjinueshme. Nuk ka patur asnjë strategji, të paktën për t’i bërë hap pas hapi. E kur mendoj se ku do ishim sot, sikur këto që po bëjmë ne të ishin bërë hap pas hapi qysh në krye të herës, është vërtetë për të vënë duart në kokë, por nuk kemi çfarë të bëjmë. Na mjaftojnë kusuret tona. Kusuret e të tjerëve që nuk i bënë gjërat përpara le t’i mbajnë ata. Ne nuk i mbajmë dot,”- u shpreh Kryeministri

01 Korrik

KONTRATA E SHIT-BLERJES SË ENERGJISË ELEKTRIKE NGA SHOQËRIA FURNIZUESI I TREGUT TË LIRË SH.A/OSHEE GROUP SH.A.



Përshëndetje,

Shoqëria “Furnizuesi i Tregut të Lirë” SH.A./”OSHEE Group” SH.A. (në vijim FTL SH.A), regjistruar në 30.03.2018 në Rregjistrin Tregtar të Qendrës Kombëtare të Biznesit me NUIS L81530029T, është krijuar nga Asambleja e Përgjithshme “OSHEE” SH.A. në zbatim të Urdhërit Nr. 157, datë 12.02.2018 të Ministrit të Energjisë dhe Industrisë “Mbi krijimin e tri shoqërive të kontrolluara nga Operatori i Shpërndarjes së Energjisë Elektrike SH.A”. “Furnizuesi i Tregut të Lirë” SH.A. është licencuar nga Enti Rregullator i Energjisë në aktivitetin e tregtimit dhe furnizimit të energjisë elektrike, respektivisht me Vendimin Nr. 198, date 03.09.2018 “Mbi licencimin e shoqërisë Furnizuesi i Tregut të Lirë SH.A. në veprimtarinë e tregtimit të energjisë elektrike” dhe Vendimin Nr. 199, datë 03.09.2018 “Mbi licencimin e shoqërisë Furnizuesi i Tregut të Lirë SH.A. në veprimtarinë e furnizimit të energjisë elektrike”.

Bashkëlidhur Kontrata e Shitblerjes së Energjisë Elektrike për vitin 2020 e cila shërben si parakusht për pjesëmarrje në procedurat e shitblerjes së energjisë elektrike që zhvillohet nga “FTL” SH.A.

Për të siguruar një proces transparent, të barabartë dhe gjithëpërfshirës, Ju ftojmë të njiheni me Kontratën e Shitblerjes së Energjisë Elektrike dhe ta nënshkruani atë brenda datës 20.07.2020.

Për më shumë informacion në lidhje me Kontratën e Shitblerjes së Energjisë Elektrike Ju mund të kontaktoni në adresën adresën e email-it info.blerje@oshee.al.

“FURNIZUESI I TREGUT TË LIRË” SH.A.

Klikoni këtu për të shkarkuar kontratën (Shqip)

Klikoni këtu për të shkarkuar kontratën (Anglisht)

12 Qershor

Investimi në sistemin matës, OSSH po instalon rreth 120 mijë pajisje të reja “smart”

Një ndër proceset më me rëndësi për OSHEE Group është investimi në sistemin e matjes. Instalimi i matësave të rinj elektronik, gati për tu përshtatur në “smart” vijon çdo ditë në të gjithë vendin.
Procesi po ndiqet nga Operatori i Sistemit të Shpërndarjes (OSSH sh.a), në kuadër të projektit “rimëkëmbja e sektorit të energjisë.
Objektivi është shdërrimi i sistemit të matjes, duke instaluar rreth 120 000 pajisje të reja sipas standardeve ndërkombëtare, klasi 1.

03 Qershor

Prezantohen skenarët për projektin e HEC Skavica, Balluku: Po bëjmë realitet një ëndërr shumëvjeçare, me impakt të rëndësishëm në sektorin energjetik dhe ekonominë kombëtare

Hidhet zyrtarisht hapi i parë për ndërtimin e Hidrocentralit të Skavicës, një vepër madhore dhe një projekt i hershëm, me impakt të madh jo vetëm në sektorin energjetik, por në gjithë ekonominë e vendit.

Sot paradite në mjediset e qendrës COD, në praninë e kryeministrit Edi Rama, është bërë prezantimi i skenarëve për Zhvillimin e Projektit për “Hidrocentralin Skavica”.

Në fjalën e saj ministrja e Infrastrukturës dhe Energjisë, Belinda Balluku e cilësoi hapin e parë për nisjen e procedurave për ndërtimin e HEC Skavicës, si një ëndërr shumëvjeçare e hedhur si ide që në vitet ’60-të, e risjellë në vëmendje herë pas here, por pa arritur asnjëherë finalizimin e projektit të saj. Sot, tha ministrja, Qeveria Shqiptare ka në duar një studim konkret të këtij projekti, i cili ofron disa skenarë për ndërtimin e kësaj vepre.

Balluku u ndal tek ndikimi që do të ketë ndërtimi i Hidrocentralit të Skavicës, duke nisur me optimizimin e Kaskadës së Drinit, eliminimin e përmbytjeve në zonën e fushë Shkodrës dhe fushë Lezhës, rritjen e sigurisë dhe efiçencës në veprat hidrike në HEC-et ekzistuese të kaskadës, por mbi të gjitha hedhjen e një tjetër hapi, drejt përmbushjes së kërkesës energjetike vendase dhe sigurisë së saj.

“Skavica ofron optimizimin e kësaj kaskade, duke bërë që 3 hidrocentralet e tjera të optimizojnë prodhimin e tyre, duke e rritur minimalisht deri në 80 GWh”, ka thënë ministrja Balluku.

Ndërtimi i HEC Skavica do të ofrojë një zgjidhje për përmbytjet në rrjedhën e poshtme të kaskadës. Projekti i propozuar do të mundësojë “magazinimin” e një pjesë të ujit në rast të krijimit të plotave në Drinin e Zi, duke zvogëluar në këtë mënyrë efektet negative në rrjedhën e poshtme të kaskadës.

Ministrja e Infrastrukturës dhe Energjisë tha se kjo vepër do të realizohet me fondet e Qeverisë Shqiptare, duke u mbështetur tek partnerët e saj financiarë dhe synohet, që brenda këtij viti të hapet gara ndërkombëtare për realizmin e kësaj vepre, në formatin projektim i detajuar dhe ndërtim.

“Është e rëndësishme të theksohet, që sot nis ky proces me synimin, që brenda këtij viti ne të realizojmë një garë të hapur, transparente dhe ndërkombëtare, ashtu siç qeveria shqiptare bën, brenda muajit tetor, për të arritur në një instrument të rëndësishëm të kësaj gare, përmes dizenjimit të projektit të detajuar dhe të ndërtimit të veprës. Kjo është një vepër, e cila do të ndërtohet me fonde të Qeverisë Shqiptare, duke u mbështetur tek partnerët tanë financiarë, po përmend BERZH-in, i cili është ofruar për t’a financuar këtë projekt, duke qenë se dhe bashkëpunimi me WBIF, financuese e studimit të fizibilitetit, është një paketë, që ata zakonisht operojnë së bashku”, theksoi ministrja Balluku.

Megjithatë, sipas ministres, ndërtimi i hidrocentralit të Skavicës nuk do të jetë vetëm një lajm i mirë për sistemin energjetik shqiptar, por do të jetë një lajm i mrekullueshëm për të gjithë ekonominë shqiptare.

Drejtori i KESH, Benet Beci, ka bërë një pasqyrim të detajeve teknike, sa i takon projektit dhe impaktit që ai pritet të ketë në sistemin energjetik shqiptar.

27 Maj

Parku Fotovoltaik i Karavastasë, shpallet fituesi i ankandit

Ministria e Infrastrukturës dhe Energjisë, në prani të kryeministrit Edi Rama, ka përmbyllur sot ankandin ndërkombëtar për ndërtimin e parkut fotovoltaik të Karavastasë, i cili do të jetë parku energjetik më i madh me energji solare në Ballkan.

Çmimi prej 24.89 euro, për MWh, i ofruar nga kompania fituese, është konsideruar si një çmim fantastik, për leverdinë ekonomike që i sjell ekonomisë së vendit, nisur nga fakti se energjia elektrike me shumicë në Shqipëri llogaritet të jetë në nivelin 50-55 euro për MWh. Ky është çmimi më konkurrues për tregun e ardhshëm të energjisë, i cili do të reflektojë sinjale te konsumatori.

Në mbyllje të fazës finale të ankandit ndërkombëtar, fituese është shpallur kompania franceze Voltalia, e cila kishte bërë edhe ofertën financiare prej 24.89 euro, për MWh.

Ministrja Belinda Balluku nuk e ka fshehur entuziazmin e saj në mbyllje të procesit, të cilin e ka vlerësuar si një proces model përsa i përket transparencës, ndërsa çmimin e ofruar nga kompania fituese një çmim rekord për parqet energjetike.

“Ky është një çmim rekord, për të gjitha parqet energjetike. Ne shpesh i jemi referuar parqeve të ndërtuara në Jordani, apo në zona ku piku i diellit është shumë më i lartë, pra dhe prodhimi është më i lartë, me çmime 26 euro. Ndërkohë ne kemi ardhur sot në këtë ditë, që të kemi një park energjetik me 24.89 euro nga kompania Volttalia, që është një nga kompanitë më të mëdha europiane me kapital 100% francez”, është shprehur ministrja Balluku.

Ankandi për këtë park fotovoltaik u shpall në datën 20 janar, dokumentet ishin të disponueshme online për një periudhë të konsiderueshme dhe ato u blenë nga 30 kompani. Ministrja Balluku vlerësoi se ato ishin kompani me emër të madh në Europë, por edhe në kontinente të tjera. Në 30 prill Komisioni i Vlerësimit të ofertave ka arritur të administrojë 5 oferta.

“Kjo është një garë e suksesshme, pasi ka pasur konkurrencë dhe ajo që është më e rëndësishmja, diçka të cilën mund ta faktojnë edhe konsulentët e BERZH, të cilët kanë qenë pjesë e pandarë e të gjithë këtij procesi dhe e grupit të punës, ka qenë një proces transparent nga fillimi deri në fund. Një proces i bazuar mbi garën dhe sigurisht të pesta kompanitë kanë pasur mundësi që të vlerësohen nga grupi ynë i ekspertëve dhe nga grupi i BERZH për të kaluar fazën e pare”, ka theksuar ministrja Balluku.

Vendi ynë, për shkak se bazohet në energjinë e prodhuar nga hidrocentralet, sigurisht që ka një varësi të jashtëzakonshme nga moti. Ndërtimi i Parkut Fotovoltaik të Karavastasë sipas ministres Balluku është një hap shumë i rëndësishëm, në drejtim të diversifikimit të burimeve të energjisë, përmes krijimit të burimeve alternative të prodhimit të energjisë, që në këtë rast është energjia solare.

Investimi për ndërtimin e Parkut Fotovoltaik të Karavastasë në zonën e Divjakës dhe të Fierit do të kapë shifrën e mbi 100 milionë eurove. Parku fotovoltaik do të ketë një kapacitet të instaluar prej 140 megavat energji, të ndara sipas një skeme ku 70 megavat do të jenë me çmim të parashikuar dhe 70 megavat do të tregtohen në tregun e lirë. Afati i projektit është 30-vjeçar dhe për kapacitetin 70 megavat me çmim të parashikuar, kemi një kontratë shitblerje energjie për një afat 15-vjeçar.

26 Maj

Faturimi dhe humbjet, OSHEE hedh poshtë spekulimet: Bilanci 4-Mujor

Operatori i Shpërndarjes së Energjisë Elektrike hedh poshtë spekulimet e ditëve të fundit në disa portale, rreth procesit të faturimit në kushtet e pandemisë COVID 19 dhe treguesit të humbjeve në rrjet. Artikuj të cilët të nxitur nga interesa politike apo edhe ekonomike kanë synuar të dëmtojnë imazhin e OSHEE në publik. Treguesit e 4-Mujorit të parë 2020 konfirmojnë se pavarësisht situatës së krijuar nga pandemia COVID-19, Operatori i Shpërndarjes së Energjisë Elektrike ka garantuar: a) furnizimin me energji pa ndërprerje për të gjithë konsumatorët; b) faturimin e saktë pavarësisht kushteve të izolimit të lëvizjes; c) krijimin e lehtësirave për abonentët duke u falur vlera të konsiderueshme të borxhit të mbartur dhe c) mbajtjen në kontroll të objektivave vjetore për uljen e humbjeve/rritjen e arkëtimeve. Përtej kushteve të vështira të krijuara nga mungesa e prodhimit në Kaskadën e Drinit dhe thatësira e tejzgjatur përgjatë 2018-2019, OSHEE ka mundur të sigurojë energjinë e nevojshme nga importi pa rënduar Buxhetin e Shtetit. Kompania ka optimizuar procedurat dhe në 4 muajt e parë të vitit ka blerë energjinë me çmime 20 deri 24 euro/Mwh më të lira se një vit më parë. Nëse në Mars-Prill 2019 u shpenzuan 31,6 milion Euro për energji nga importi, në periudhën Mars deri 12 Prill 2020 janë shpenzuar vetëm 9.9 milion euro. Mbyllja e aktivitetit të biznesit për periudhën e pandemisë testoi gjithashtu gadishmërinë e OSHEE për të përballuar rritjen e fluksit të energjisë së konsumuar nga abonentët familjarë. Paçka se sasia e energjisë së konsumuar nga familjarët u rrit ndjeshëm, gjendja e gadishmërisë së rrjetit mundësoi shmangien e defekteve dhe sigurinë e furnizimit me energji. Bazuar mbi vendimin e Entit Rregullator të Energjisë u bë i mundur edhe procesi i saktë dhe i drejtë i faturimit në kushtet e izolimit të lëvizjes në të gjithë territorin. OSHEE garanton se asnjë abonent familjar apo biznes nuk është mbifaturuar, përkundrazi, zbatimi i faturimit me vlerë reference për rreth 20% të abonentëve gjatë muajit Mars ka bërë që ata të faturohen më pak se sa konsumi real. Nga faturimi i muajit Prill është garantuar rakordimi i konsumit faktik dy mujor, të çdo abonenti me atë që raportohet dhe fotografohet në matësin e tij nga punonjësi i OSHEE. Numri i ankesave të abonentëve për mbifaturim për 3-mujorin 2020 ka pësuar ulje me 28% krahasuar me një vit më parë. Ankesat për faturimin e muajit Mars janë vetëm 0,3% e faturave të lëshuara nga Operatori i Shpërndarjes për atë muaj. Në përmbushje të paketës së ndihmës së qeverisë në kushtet e pandemisë COVID 19, OSHEE mori vendimin për faljen e kamatëvonesave të krijuara deri në 31 Dhjetor të vitit 2019. Vendimi mundësoi faljen e rreth 135 milion USD për 27,568 abonentë, prej të cilëve 205,228 janë familjarë dhe 22,340 konsumator biznes. Procesi i përfitimit vazhdon edhe aktualisht ndërsa i vetmi kusht është që abonenti të paraqitet në OSHEE për të amenduar aktmarrëveshjen dhe zyrtarizuar faljen e kamatës. Të dhënat si 4-mujor dëshmojnë se Operatori i Shpërndarjes së Energjisë Elektrike ka mbajtur nën kontroll nivelin e humbjeve, edhe pse në kushtet e emergjencës së shkaktuar nga pandemia. Në këtë periudhë, humbjet në shpërndarje rezultuan 24.3%, pothuajse e njëjta vlerë me atë të një viti më parë. OSHEE mbetet e përkushtuar në realizimin e objektivit të vitit 2020 për reduktimin e nivelit të humbjeve totale nën 21%.

04 Maj

OSSH vijon procesin e leximit të matësave, në fokus janë faturat referencë mars 2020

Operatori i Sistemit të Shpërndarjes, pjesë e OSHEE Group, po vijon normalisht procesin e leximit të matësave elektrikë në rang vendi.

Të ndarë në grupe pune, lexuesit kanë në fokus, ndër të tjera, matësit me kontrata të faturuar me referencë mars 2019, verifikim ky, që mundëson sistemimin (balancimin) e konsumit real të kilovatit. 

OSSH ka marrë masa per te mos vendosur “tarifë shërbimi” (340 dhe/ose 200 lekë) për fatura kreditore, gjithashtu është duke ndjekur me vëmendje të gjithë procesin e leximit në objektet ku ka akses për ta realizuar. 

Ekipi i Lexuesve

Theksojmë sërish se, në muajin mars 2020, në kushte të kufizuara veprimi, me staf të reduktuar, etj, OSSH mundi të lexonte rreth 70% të kontratave, ndërsa pjesa tjetër u faturua duke marë për bazë konsumin e mars 2019, bazuar me vendim të ERE.

Abonentët me fatura “referencë” mund të mos bejnë ankese pasi sistemimi do të kryhet nga vet Operatori, si pasojë e leximit që po zhvillohet aktualisht.

OSSH garanton proces të drejtë dhe transparent faturimi. Askush nuk paguan më tepër nga sa kWh regjistron matesi elektrik, pasi çdo veprim/verifikim realizohet me foto. 

10 Prill

EMERGJENCA COVID-19/ FALJA E KAMATËS, LEXIMI I MATËSIT DHE PAGESA E FATURËS, KREU I OSHEE SQARON ABONENTËT

KAMATA

I ftuar sonte në emisionin “Opinion”, Administratori i OSHEE-së Adrian Çela deklaroi se nga vendimi për faljen e kamatëvonesave përfitojnë në total 227,568 abonentë, prej të cilëve 205,228 janë familjarë dhe 22,340 konsumator biznese të vogla. Shuma totale e falur e kamatvonesave arrin në 15,8 miliard lek ose mbi 135 milion USD.

Sipas Çelës, e rëndësishme është që qytetarët të kuptojnë që “aministia” në këtë rast përfshin vetëm vlerën e kamatëvonesës që abonenti ka në sistem deri në 31 Dhjetor 2019 dhe jo vlerën e kamatëvonesës që një abonent mund të ketë gjeneruar gjatë 3 muajve të fundit. Nëse abonenti nuk e paguan faturën aktuale mujore brenda afatit ai nuk i shpëton dot kamatëvonesës.

“Kusht që ata të përfitojnë faljen e kamatës është që të kenë një aktmarrëveshje valide me OSHEE-në. Ata që nuk e kanë një të tillë por kanë detyrime të vjetra, gjithashtu duhet të nënshkruajnë brenda Qershorit një aktmarrëveshje për të përfituar faljen e kamatës. Që nga dita e hënë, të gjithë ata abonentë që e kanë patur këstin e pagesës së aktmarrëveshjes pas datës 14 duhet të paraqiten në zyrat e OSHEE për të bërë riskedulimin e saj dhe reflektimin e faljes së kamatës”, theksoi Çela.

Për të mundësuar këtë falje dhe për ta regjistruar qytetarin në sistem, sqaroi Administratori i OSHEE, ne kemi punuar me të gjitha kapacitetet të vëmë në punë sistemin online vetëm për këtë rubrikë. Sistemi është testuar këto ditë me specialistet më të mirë dhe është gati të regjistrojë ata që lidhin akt-marëveshjen.

“Unë ju falenderoj veçanërisht që na krijoni mundësinë që përmes emisionit tuaj Opinion i cili ndiqet gjërësisht t’i njoftojmë qytetarët për këtë mundësi. Ka ndodhur shumë shpesh që nuk është përfituar nga uljet apo amnistitë sepse njerëzit mendojnë se këto aktivizohen automatikisht. Kjo nuk ndodh, ndaj ky informim i qartë ka shumë vlerë. Ai që e ka një aktmarrëveshje duhet të paraqitet menjëherë dhe brenda Prillit të kryejë riskedulimin e saj me faljen e kamatës të reflektuar. Ai që ka një borxh të akumuluar por nuk ka një aktmarrëveshje duhet të paraqitet brenda Qershorit të nënshkruajë atë dhe të përfitojë njësoj nga falja e kamatës”, nënvizoi Çela.

Nga dita e Hënë, secili prej këtyre përfituesve ka mundësinë që të paraqitet në sportelet e OSHEE dhe të sanksionojë hyrjen në fuqi të faljes së vlerës së kamatës së krijuar deri më 31 Dhjetor 2019.

LEXIMI I MATËSIT

Në lidhje me shqetësimet e qytetarëve që në këto kushte izolimi mund të ketë faturim jo të drejtë të energjisë për familjarët dhe bizneset apo siç është pretenduar faturim aforfe, Çela dha për publikun rastet e faturave reale të bizneseve dhe të familjarëve.

“Pretendimet për faturim aforfe janë plotësisht të pavërteta. Teknikisht, faturimi aforfe përdorej kur abonenti nuk kishte një matës të instaluar. Prej vitesh ne e kemi zhdukur faturimin aforfe pasi kemi pajisur të gjithë abonentët me matësa”, sqaroi Çela.

Sipas tij, për shkak të situatës së krijuar dhe kufizimit të lëvizjes, punonjësit e OSHEE janë përballur me pamundësinë për të kryer leximin e matësit për të gjithë abonentët. Muajin e fundit është kryer leximi për mbi 66% të abonentëve ndërsa pjesa tjetër bazuar mbi vendimin e ERE janë faturuar me vlerë reference të konsumit.

Çdo abonent e ka të thjeshtë të verifikojë se si është faturuar. Mjafton që ai të shohë faturën, nëse sasia e kilovatëve është shënuar tek ‘energji e matur’ do të thotë që matësi është lexuar dhe fotografuar nga OSHEE. Nëse sasia e kilovatëve është shënuar tek ‘energji vlerë referuese’ ai është faturuar me të njëjtën vlerë të paguar në Mars 2019.

“Konsumatorët shërbime, biznese që nuk do mund tu kryhet leximi do të faturohen me gjysmën e vlerës së paguar prej tyre në Mars 2019, çka përkon me ditët që kanë qenë në aktivitet gjatë muajit që sapo mbyllëm”, u shpreh Çela.

Marrë në konsideratë faktin se qytetarët janë në kushtet e karantinës, të ngujuar 24 orë në shtëpi, konsumi i tyre real për Mars 2020 është shumë më i lartë se sa ai i Mars 2019 çka bën që aplikimi i vlerës së referencës ti bëjë të paguajnë më pak se sa kanë konsumuar në këtë muaj.

“Për këto raste të aplikimit të vlerës së referencës, në leximin e muajit pasaardhës bëhet balancimi, pra sistemimi i faturës. Ky proces do të kryhet automatikisht nga vet OSHEE, pa patur nevojë për një kërkesë/ankesë nga abonentët. Në çdo rast, abonenti paguan vetëm për atë energji që e ka të regjistruar në sistemin e tij të matjes dhe asgjë më tepër”, tha Çela.

Shembulli i parë ilustrues i dhënë nga Çela ishte ai i një abonenti të cilit i është lexuar dhe fotografuar normalisht matësi. Si ky rast është kryer faturimi plotësisht i saktë për 66% të abonentëve. “Duke qenë se qytetari ka qenë 24 orë në shtëpi, natyrisht që ai ka konsumuar më shumë energji. Përshembull, abonenti familjar me inicialet H.S. nga Gjirokastra me numër kontrate 034275 ka konsumuar 596 kilovat. Matësi është fotografuar dhe shuma që ai duhet të paguajë është 7,008 lekë. Një vit më parë, në Mars 2019 ai ka paguar 3,759 lekë sepse ka shpenzuar vetëm 321 kilovat”, nënvizoi Çela ndërsa bëri thirrje që qytetarët të përpiqen të reduktojnë konsumin në kushtet e izolimit.

Shembulli i dytë ilustrues ishte ai i faturimit me vlerë reference të një biznesi në pamundësi për të kryer leximin e matësit në terren. “Abonenti biznes me numër kontrate 050778 në Pogradec. Ky subjekt ka qenë në ushtrim aktiviteti vetëm dy javë ndaj ai faturohet me vlerë reference gjysmën e konsumit të realizuar në Marsin e vitit 2019. Konkretisht, një vit më parë, në të njëjtin muaj ai ka konsumuar 12320 kilovat dhe fatura ishte 207,076 lekë. Faturimi për Mars 2020 për këtë subjekt është me 6160 kilovat dhe fatura ka shumën 103,588 lekë”, theksoi Çela.

Shembulli i tretë ilustrues ai i faturimit me vlerë reference të një abonenti familjar. “Kemi qytetarin me inicialet P.F. banues në Berat me numër kontrate 02961. Në pamundësi leximi të matësit ai është faturuar me të njëjtën vlerë të konsumuar prej tij në Mars 2019. Një vit më parë për të njëjtën periudhë ai ka paguar për 579 kilovat shumën 6,700 lekë. Aktualisht ai është faturuar për Mars 2020 me po 579 kilovat dhe po me 6,700 lekë”, sqaroi Çela.

Çela theksoi që s’duhet t’i lëmë vend asnjë spekulimi panikues pasi OSHEE garanton faturimin korrekt të abonentëve dhe në asnjë rast ata nuk do të paguajnë asnjë kilovat më shumë se sa kanë shpenzuar.

Sipas tij, OSHEE po sakrifikon edhe pagat e disa punonjësve të saj që të mbajë peshën e rëndë të situatës.

PAGESA E FATURËS

Pasi ju përgjigj shqetësimeve të qytetarëve të përcjella në emisionin “Opinion” të gazetarit Fevziu, Çela qartësoi edhe pikëpyetjet mbi rrezikun e furnizmit me energji.

“Çdo konsumator i energjisë elektrike, familjar apo biznes, duhet të paguajë rregullisht dhe brenda afatit faturën e konsumit mujor. Kjo është e vetmja mënyrë se si Operatori i Shpërndarjes së Energjisë Elektrike mund të garantojë qëndrueshmërinë dhe vazhdimësinë e furnizimit me energji”, u shpreh Çela.

Falë rikthimit të ligjshmërisë në konsumin e energjisë elektrike, theksoi Çela, OSHEE ka mundur që të përballojë edhe situata të tejzgjatura të mungesës së prodhimit nga Kaskada e Drinit dhe mbulimit me energji të shtrenjtë importi. E gjitha kjo pa rënduar në Buxhetin e Shtetit.

“Sot kemi 52% më pak defekte në rrjet dhe koha e riparimit të tij është ulur gjithashtu me 27% duke e bërë reagimin më të shpejtë”, tha Çela.

Ai këmbënguli se OSHEE është e vendosur të bëjë gjithçka për të garantuar furnizimin të qëndrueshëm me energji dhe shërbim sa më korrekt ndaj qytetarëve.

“Nëse ka mundësi 1 në 1 milion për energji, ajo energji do të shkojë në shtëpitë e shqiptarëve.
Nga ana tjetër, ju gazetarët jeni të rëndësishëm sepse bëni të mundur të përfshini qytetarët në këtë bashkëveprim të domosdoshëm. Pa korrektesën e tyre minimale ne nuk ekzistojmë dot të tillë”, nënvizoi Administratori i OSHEE.