Back
19 Shtator

OSSH, 8-mujori 2022: Humbjet zbresin në 21.38 %, rekord në gusht, u ulën me 16.81 %

Megjithëse sektori energjetik ndodhet në situatë të vështirë si pasojë e krizës energjetike, performanca e OSHEE Group sh.a, vijon të jetë e mirë, duke përmirësuar më tej treguesit e saj.

Sipas të dhënave të 8-mujorit 2022, FSHU arkëtoi 96 përqind ose 19 përqind më shumë në krahasim me vitin 2013, ku norma e arkëtimit ishte 75 përqind

Nga të dhënat e FSHU-së, (Furnizuesi i Shërbimit Universal), niveli i arkëtimit për 8-mujorin 2022 është përmirësuar ndjeshëm. Konkretisht, gjatë kësaj periudhe u arkëtuan 58 miliardë lek ose 17.43 lek më shumë, në krahasim me 49.37 mld lek në vitin 2021 dhe 45.20 mld lek që u arkëtuan në vitin 2020, dy vitet e vështira të pandemisë.

Edhe ankesat për cilësi faturimi, gjatë 8-mujorit të këtij viti, janë reduktuar me 20.685, nga 25.744 që ishin në vitin 2021.

Tregues i rritjes së performancës për 8-mujorin 2022, ka patur dhe kompania e Operatorit të Sistemit të Shpërndarjes së Energjisë, (OSSH), e cila ka reduktuar nivelin e humbjeve në 20.42 përqind, ku vetëm në muajin gusht u shënua shifra rekord prej 16.81 përqind, ndërkohë që niveli i humbjeve në vitin 2021 ishte 21.38 përqind dhe në vitin 2020 u mbyll me një bilanc prej 22 përqind.

Reduktimi i nivelit të humbjeve përbën sfidën kryesore të OSHEE Group, e cila përmes mekanizmeve të ndryshëm synon rritjen e standardeve të shërbimit ndaj abonentëve.

Në dy vitet e fundit, shoqëria ka operuar në terrene atipike, për shkak të pandemisë, shoqëruar me thatësirat në HEC-e dhe shtrëngim të investimeve.

Megjithatë, organizimi i strukturave me kontrolle të vazhdueshme dhe përmirësimin e proceseve të punës, bashkë me investimet për mirëmbajtjen e rrjetit, kanë dhënë rezultat në reduktimin e mëtejshëm të nivelit të humbjeve në total.

08 Shtator

Prezantohet paketa e rezistencës sociale, garantohet furnizim i pandërprerë dhe pa kosto për qytetarët

Kryeministri Edi Rama, së bashku me zv.kryeministren dhe ministren për Infrastrukturën dhe Energjinë, Belinda Balluku dhe ministren e Financave, Delina Ibrahimaj  prezantuan sot paketën e re të rezistencës sociale e cila i përgjigjet situatës së emergjencës me të cilën po përballet e gjithë bota. Padyshim që energjia elektrike mori vëmendjen kryesore.

 “Përmes një plani të qartë, jo vetëm do të garantojmë furnizim të pandërprerë, por mbi të gjitha pa kosto për qytetarët. Do të vijojmë të mbajmë të pandryshuar çmimin, duke mos rënduar buxhetet familjare, ndërsa nisim nga 1 tetori aplikimin e fashës prej 800 kilovatorësh”, u shpreh znj.Balluku.

Mbështetje për familjet për instalimin e paneleve diellor për ngrohjen e ujit, kursimi i energjisë në institucionet publike, si dhe sensibilizimi, duke nisur nga më të rinjtë, për kursimin e energjisë janë masat tona të para për ti bërë ballë kësaj situate që po vë në vështirësi të gjithë botën.

Për më shumë lexoni në vijim planin e detajuar të masave në sektorin e energjisë.

19 Qershor

OSSH, 5-mujori 2022: Humbjet zbresin në 21.88%, rekord në maj u ulën me 17.08%

Reduktimi i nivelit të humbjeve përbën sfidën kryesore të OSHEE Group, e cila përmes mekanizmeve të ndryshëm synon rritjen e standardeve të shërbimit ndaj abonentëve.
Në dy vitet e fundit, shoqëria ka operuar në terrene atipike, për shkak të pandemisë, shoqëruar me thatësirat në HEC-e dhe shtrëngim të investimeve.
 
Megjithatë, organizimi i strukturave me kontrolle të vazhdueshme dhe përmirësimin e proceseve të punës, bashkë me investimet për mirëmbajtjen e rrjetit, kanë dhënë rezultat në reduktimin e mëtejshëm të nivelit të humbjeve në total. Pesëmujori 2022 u mbyll me nivel humbjesh në rrjetin elektrik 21.88%, ose 1.04 pikë përqindje ulje më tepër se 2021, për të njëjtën periudhë.
 
Drejtori i Departamentit të Matjes, Bilancit dhe Suportit të Tregut, pranë OSSH-së, Ermal Murati tregon se, rezultati u arrit falë punës intensive, sidomos në muajt prill-maj, ku humbjet zbritën në 17.71%, nga 19.62% që ishin vitin e kaluar, ndërsa vetëm në muajin maj humbjet arritën në 17.08%.
 
“Përmirësimi i mëtejshëm i treguesve vjen si ndërveprim i ndërhyrjeve në rrjetin e amortizuar, mirëmbajtjes së aseteve të OSSH, instalimit të matësave smart, si dhe kontrolleve në zonat e identifikuara me humbjet më të larta, nga ku zbulohen raste të vedhjes së energjisë elektrike.
Shifrat janë pozitive, por ende larg asaj ku duam të arrijmë, ndaj kërkohet punë e vazhdueshme me strukturat në rajone, dhe bashkëpunim me organet e drejtësisë, jo vetëm për identifikimin e abuzuesve të energjisë elektrike, por edhe parandalimin e fenomemit”, deklaron Murati.
 
Kujtojmë se në vitin 2014, kur nisi reforma, OSHEE trashëgoi një sistem të degraduar, ku më shumë se 50% energjisë elektrike vidhej, kurse kompania shpenzonte 150 milionë euro në vit, për mbuliminn e humbjeve përmes importeve.

15 Qershor

OSSH rrit kapacitetet në NST Himara 3, garanci furnizimi për aksin Dhërmi-Borsh

Me nisjen e sezonit turistik, Operatori i Sistemit të Shpërndarjes, OSSH, ka marrë të gjitha masat për fuqizimin e kapaciteteve për rritjen e sigurisë dhe cilësisë së shërbimit.

Prej fillimit të javës është dyfishuar fuqia e NST Himara 3,  e ndërtuar në qershor 2016. Në bashkëpunim me Drejtorinë e tensionit të lartë,  u investua për implementimin e një tjetër transformatori, me parametra të njëjtë të fuqisë,  25MVA 110/35/20kV si dhe seksionet e dyta 35 dhe 20kV.

Pas energjizimit e kalimit të provës 72 orë me tension, transformatori i ri është vendosur tashmë në punë.

Fuqizimi i NST Himara 3 do të sjellë rritje të sigurisë së furnizimit me energji në nënstacionet që furnizojnë zonat bregdetare në jug, Palase, Himara 1 e vjetër, Kuç dhe Smokthinë.

Nga ky investim përfitojnë të gjithë abonentët biznesë e familjarë të zonës bregdetare nga Dhërmiu në Borsh.

14 Prill

ERE miraton tarifat e reja të OSSH dhe OST, nuk ndryshon çmimi i abonentëve familjarë dhe biznesi I vogël

Enti Rregullator i Energjisë, ERE, ka miratuar tarifat e reja të energjisë elektrike për dy kompanitë e sektorit energjetik, atij të transmetimit, OST, dhe shpërndarjes, OSSH.

Nga ky vendim nuk preken klientët fundorë të lidhur me tensionin e ulët (0.4 kV), që janë abonentët familjarë dhe biznesi i vogël.

 Në mbledhjen e bordit të ERE, u theksua se tarifat e miratuara mundësojnë kryerjen e mirëmbajtjes dhe investimeve më të nevojshme dhe të domosdoshme në rrjet dhe garantojnë qëndrueshmërinë e sistemit dhe cilësinë e shërbimit të furnizimit të konsumatorëve.

 Pavarësisht aplikimit të OST sh.a për miratimin e një tarife mesatare prej 1.41 lekë/kËh, ERE bazuar në analizën e të dhënave që lidhen me ushtrimin e aktivitetit të transmetimit të energjisë elektrike, vendosi të miratojë tarifën mesatare të transmetimit prej 0.85 lekë/kËh për periudhën rregullatore 1 maj 2022 – 31 dhjetor 2024.

Sa i përket aplikimit të OSSH, ERE në perputhje me kuadrin rregullator në fuqi dhe pas analizimit të të dhënave  për qëllime të përcaktimit të tarifave të shpërndarjes , vendosi të miratojë tarifat e mëposhtme:

 Tarifa e shpërndarjes së energjisë elektrike për klientët e lidhur në nivelin e tensionit 35 kV – 1.55 Lekë/Këh

    Tarifa e shpërndarjes së energjisë elektrike për klientët e lidhur në nivelin e tensionit 0.6 – 20 kV –  3.99  Lekë/Këh

    Tarifa e shpërndarjes së energjisë elektrike për klientët e lidhur në nivelin e tensionit 0.4 kV – 6.42  Lekë/Këh

Ndërkohë tarifa mesatare e shërbimit të shpërndarjes  për periudhën 1 maj – 31 dhjetor 2022, me miratimin e tarifave të mësiperme,  rezulton  5.89  leke/kËh kundrejt tarifës mesatare prej 6.69 lekë /kËh, të kerkuar nga OSSH sh.a.

Me miratimin e tarifave të transmetimit dhe shpërndarjes, ERE paralelisht vlerësoi dhe efektet e këtyre tarifave ndaj cmimit final të  furnizmit të  klientëve familjarë dhe jo familjarë në nivelin e tensionit të ulët 0.4  kV.

Për periudhën e mbetur të vitit 2022,  ERE vendosi lënien në fuqi të çmimit të klientëve familjardhe jo familjar të lidhur në nivelin e tensionit 0.4kv.

Ne vijim paraqitet nje tabele ilustruese qe mundeson krahasimin e tarifave aktuale me tarifat e kerkuara nga operatoret si dhe tarifat e cmimet e miratuara nga ERE te cilat do te jene te aplikueshme duke filluar nga data 1 Maj 2022 si vijon.

06 Prill

Balluku në kuvend: Nuk ka rritje të çmimit të energjisë për abonentët familjarë dhe biznesin e vogël

Gjatë fjalës në seancën e së hënës në kuvendin e Shqipërisë, ministrja e Infrastrukturës dhe Energjisë Elektrike Belinda Balluku theksoi sërish se çmimi i energjisë nuk do të rritet për abonentët familjarë dhe biznesin e vogël. Balluku tha se pavarësisht rritjes së mëtejshme të çmimit të energjisë në tregun ndërkombëtar, qeveria ka vendosur një mburojë për kategoritë familjarë dhe biznes i vogël.

Sipas ministres Balluku, në tregun ndërkombëtar çmimet e energjisë elektrike janë rritur deri në 10 fish, por çmimi i abonentëve familjarë dhe biznesi i vogël nuk do të ndryshojë.

“Kemi vendosur që për shkak të krizës, çmimi i abonentëve familjarë të qëndrojë aq sa ka qenë, 9.5 lekë kilovatorë pa reflektuar çmimet e importit. Dhe biznesi i vogël i lidhur në fashën 0.4 po ashtu nuk do të ketë lëvizje të çmimit, gjithashtu dhe pas marëveshjes dhe negociatave me biznesin e mesëm, 7440 prej tyre nuk u preket çmimi”, u shpreh ministrja Balluku.

Ministrja Balluku nënvizoi se situata e basenit të Fierzës është përmirësuar ndjeshëm me reshjet e shiut të rëna në javën e parë të muajit prill dhe pritet rritje e nivelit të ujit në basen rreth 280 metra, shpresëdhënëse për prodhimin e energjisë.

23 Mars

Masat për menaxhimin e krizës, Balluku-Çela: Çmimi i energjisë për familjet e biznesin e vogël nuk rritet, vijojmë investimet në rrjet

Ministrja e Infrastrukturës dhe Energjisë, Belinda Balluku zhvilloi një takim me të aktorët e sistemit elektro-energjetik shqiptar për të diskutuar mbi situatën energjetike në vend, ndikuar nga zhvillimet në të gjithë botën.

Në takimin e Komitetit të Energjisë, ishte i pranishëm dhe administratori i kompanisë OSHEE Grup, Adrian Çela, I cili në fjalën e tij renditi disa nga pasojat negative të krizës në sektorin energjetik që kanë nisur prej vitit të kaluar si pasojë e rritjes së çmimit të energjisë në bursë.

Çela tha se impakti në financat e kompanisë  deri në fund të nëntorit të kaluar ishte 150 mln euro të cilat ishin dedikuar për investime në rrjet, por që shkuan për blerjen e energjisë.

Administratori i OSHEE theksoi se prej 4 vitesh, si pasojë e kostove të larta të importit, OSHEE u detyrua të ndërpresë investimet në infrastrukturë, por nga ana tjetër ajo realizoi treguesit e performancës sic ishin niveli i humbjeve dhe arkëtimet.

Çela tha se pavarësisht kostos financiare, OSHEE e mbështetur dhe nga qeveria nuk rriti tarifat për abonentët familjarë dhe jo familjarë.

Administratori i OSHEE Adrian Çela e konsideroi të rëndësishme rifillimin e investimeve në rrjet pasi mirëmbajtja në kushtet aktuale kushton 40 milion euro.

“Kemi disa projekte në investime në zonën bregdetare që do t’i vazhdojmë, konkretisht në Velipojë Shëngjin apo në jugun e Shqipërisë por nuk do të lëmë pas dore investimet e nevojshme për të suportuar ekonominë”, u shpreh Çela.

Edhe ministrja Balluku deklaroi se investimi në zonat turistike është e nevojshme, me rritjen e kapaciteteve të operatorëve turistikë në këto zona.

Ajo tha se së bashku me OSHEE po bëhet një analizë e thelluar për situatën aktuale financiare të kompanisë dhe vendosjen e prioriteteve të investimeve që duhet të vazhdojnë e nuk duhet të ndalen.

“Padyshim që do të vazhdojmë me investimet. Zona e jugut është një nga zonat më të rëndësishme dhe me rritjen e investimeve të bizneseve në zonat turistike ne duhet të jemi gati ti përgjigjemi me kapacitete energjetike. Ne po analizojmë prioritetet dhedo të vazhdojmë të bëjmë mirëmbajtjen e rrjetit dhe do të investojmë aty ku është e enevojshme dhe e domosdoshme. Rëndësi ka fakti që shërbimi të jetë I qëndrueshëm dhe të mos ketë ndërprerje të energjisë për qytetarët”, tha ministrja Balluku.

Ministrja Balluku vlerësoi punën e kompanisë për realizimin e treguesve të performancës ku theksoi se me investimet e kryera prej 2015, është ulur ndjeshëm niveli i humbjeve sic është rasti i Kombinatit I cili sot ka nivelin 4 përqind, ,më të ulët se në vendet evropiane. Ajo theksoi se së bashku me të gjithë aktorët e sistemit energjetik janë marrë të gjitha masat për menaxhimin e situatës së deri tanishme duke bërë  maksimumin për të mos rënduar xhepat e qytetarëve dhe sigurisht duke garantuar furnizim të pandërprerë me energji elektrike për të gjithë.

15 Mars

Kriza e çmimeve, Qeveria vendos 280 milionë USD mburojë për faturat e energjisë së familjeve dhe biznesit të vogël

Pavarësisht 10-fishimit të çmimit të energjisë elektrike në tregjet e bursave, fatura e konsumit për familjet dhe biznesin e vogël do të mbetet e pandryshuar.

 Kostot shtesë janë duke u përballuar nga buxheti i shtetit, si masë mbrojtëse ndaj krizës së çmimeve, tashmë edhe tek lëndët e tjera.

Prej disa ditësh, Kryeministri Edi Rama, së bashku me Ministren e Infrastrukturës dhe Energjisë, Belinda Balluku, jane duke prezantuar në publik “Paketën e Rezistencës Sociale”, si reagim ndaj pasojave të krizës globale energjetike, si edhe të luftës në Ukrainë, mbi çmimet.

Një ndër masat e marra nga qeveria është mbrojtja nga rritja e çmimit të energjisë për konsumatorët familjarë dhe bizneset e vogla.

Kryeministri Rama ka deklaruar se qeveria do të shtojë 28 miliardë të tjera, 280 milionë dollarë, në financimin e mburojës së çmimit të energjisë elektrike për familjet dhe bizneset e vogla.

“Sot, me luftën, çmimet kanë pësuar një kërcim të ri dhe çmimi i energjisë ka shkuar aty ku, as nuk e ka imagjinuar njeri, deri në 61 lekë për kilovat/orë, ndërkohë që energjia paguhet nga familjarët, ata të cilët janë në nevojë 7 lek, dhe 7 lekëshi është mbajtur i tillë dhe për ta mbajtur të tillë, që nga reforma e energjisë, çdo vit për të mbajtur të 7 lekësh në faturën e familjeve në nevojë, ne paguajmë 45 milionë dollarë në buxhet që shkojnë si kompesim i faturave.

Për familjarët është 9,5 lekë dhe për bizneset është 14 lekë. Që do të thotë, ky është çmimi para krizës, ndërkohë që çmimet pas krizës dhe gjatë krizës, janë shumëfish”, u shpreh kryeministri Rama.

Ai theksoi se i ka kërkuar OSHE-së që për çdo faturë energjie te sjellë edhe pjesën e pagesës së buxhetit të shtetit për çdo familje dhe biznes të vogël.

“Unë do të doja që faturat të ishin si kjo fatura që është e dikujt nga ju këtu ku faktikisht shkruhet vlera për tu paguar nga subjekti që në këtë rast është një subjektet që konsumon 176 mijë lekë energji, por po të shikojmë mbrapa çmimi real i faturës është 476 mijë lekë pra subjekti paguan 176 mijë të vjetra, vlera reale e faturës është 476 mijë dhe 299 mijë lekë që është diferenca e paguan buxheti i shtetit”, tha kryeministri Rama.

Ndërsa ministrja e Infrastrukturës dhe Energjisë, Belinda Balluku tha se në muajin janar, për të kompensuar prodhimin e kaskadës dhe kërkesën e tregut, u shpenzuan për blerjen e energjisë nga importi 32 milionë e 678 mijë e 433 euro.

“ Në muajin shkurt blerja nga importi është 48 milionë e 356 mijë e 732 euro. Parashikimi për blerjen në muajin mars me çminimin që sapo ju thashë, mesatarisht 500 euro është 100 milionë euro.

 Ndërkohë që parashikimi për muajin prill i pritshëm, duke qenë  se kaskada do të prodhoj dhe më pak, është 134 milionë euro. Në total deri një muajin e katërt të këtij viti faktikja e konsumuar dhe çfarë presim nga projeksionet do të arrij rreth 320 milionë euro subvencion përsa i përket energjisë nga Qeveria Shqiptare dhe nga buxheti i shtetit”, tha ministrja Balluku.

Sipas saj,  kosto e kilovatorit në muajin mars për Qeverinë Shqiptare do të jetë 61 lekë për kilovatorë, ndërkohë që do të vazhdojë të tregtohet dhe ti jepet abonentëve me çmimet e mëparshme.

“Kështu që këtu po shkojmë drejt 10 fishimit të çmimit të kostos ndërkohë që çmimi i shitjes vazhdon të ruhet i njëjtë.

Unë besoj që ky subvencion është subvencioni më i madh që ne kemi dhënë pavarësisht të gjithë subvencioneve që janë dhënë gjatë pandemisë, por energjia zë pjesën më të madhe të subvencionit shtetëror ndaj abonentëve dhe jo vetëm abonentëve në nevojë, por ët gjithë abonentëve duke qenë se këtu përfshihen të gjithë abonentët familjarë”, tha ministrja Balluku.

Ministrja Balluku tha se qeveria ka marrë masa që në fillim të verës së kaluar për të përballuar krizën energjetike duke vënë në dispozicion një kredi të vendosur mbi garancitë sovrane prej 100 milionë eurosh që u konsumuan për blerjen e energjisë dhe për subvencionin që ju jepet të gjithë abonentëve.

02 Mars

Energjizohet linja 35kV Korçë-Bilisht, vendosen në punë 17 shtyllat e thyera, rikthehet gradualisht energjia në zonën e Devollit

Pas një pune intensive prej 3 ditësh, ka përfunduar sot rreth orës 12:14 puna për energjizimin e linjës 35kV Korçë-Bilisht e cila la pa energji qytetin e Bilishtit dhe një pjesë të fshatrave të bashkisë Devoll.

Shkak i avarisë ishte thyerja e 17 shtyllave elektrike si pasojë e motit të keq me stuhi bore.

Megjithë kushtet e këqija në terren moçalor dhe reshje bore❄️ që kanë vijuar gjatë këtyre ditëve, grupet e avarisë së Tl #Juglindje dhe OSSH #Korçë, sot rreth orës 13:04 vendosën në punë dy nënstacionet që furnizohen nga linja 35kV Korçë-Bilisht, NST Bilisht dhe NST Vranisht.

Deri në orën 13:20 u vendosën në punë fiderat F5, F6 dhe F7 të NST Bilisht që furnizojnë një pjesë të qytetit Bilisht dhe fshatrat përreth.

Aktualisht po punohet për rikthimin në skemë të plotë furnizimi me energji të fiderit F8 të NST Bilisht i stakuar me defekt lokal, për të cilët janë angazhuar shumë grupe pune të OSSH #Korçë, për eleminimin e defektit.

Fiderat Cangonj dhe Vranisht të NST Vranisht janë vendosur në gjendje normale dhe është rikthyer furnizimi me energji i fshatrave të bashkisë Devoll që furnizohen nga ky nënstacion.

Në ndihmë të TL Juglindje, OSSH angazhoi në terren punonjës nga drejtoritë e TL Shkodër, Fier, Vlorë dhe Laç për të riparuar avarinë në linjën 35kV Korçë-Bilisht dhe rikthimin e energjisë në të gjitha zonat e bashkisë Devoll

28 Shkurt

Moti i keq me stuhi bore dëmton shtyllat, OSSH riparon disa linja në Juglindje

Prej 24 orësh, disa zona të vendit po përballen me mot të keq, shoqëruar me kushe ekstreme reshje dëbore, në formë stuhie dhe shpejtësi ere.

Për pasojë janë dëmtuar linja dhe shtylla të rrjetit elektrik, duke prekur asetet e tensionit 110kV të OST dhe tensionin e lartë 35kV të OSSH, kryesisht në juglindje të vendit.

Zonat më problematike ishin ato të Korçës dhe Elbasanit, kryesisht zonat malore.

Grupet e punës së  OSSH #Korçë kanë riparuar disa prej linjave që u prekën nga defektet gjatë ditës së djeshme duke shkaktuar problem me furnizimin me energji në disa zona të Korçës e rrethinave të saj.

Megjithë kushtet e vështira të motit me reshje bore e temperatura të ulëta,  u riparua segmenti Ersekë-Mollas ku u evidentuan 6 kampata përcjellës të këputur dhe iu dha energji NST Mollas. Ndërsa u vendosën në punë dhe fiderat 10kv si dhe HEC Treskë.

Më herët, punonjësit e TL Juglindje #OSSH Korçë riparuan avarinë dhe në linjën Maliq-Lozhan duke i dhënë energji NST Lozhan. Ndërsa u vendosën në punë dhe Hecet e lidhur në  NST Lozhan

Prej mëngjesit të djeshëm vijon puna e brigadave të avarisë së OSSH #Korçë dhe drejtorisë së TL Juglindje dhe për riparimin e avarisë në linjën 35Kv Korçë-Bilisht e cila furnizon me energji qytetin e Bilishtit dhe fshatrat përrreth saj.

Shkak i avarisë kanë qenë dëmtimi i 13 shtyllave ku 6 prej tyre u thyen plotësisht ndërsa 7 të tjera pjesërisht.

OSSH ka angazhuar në terren 57 punonjës të saj, të cilët megjithë kushtet e vështira të motit, në një terren moçalor dhe me trashësi bore 30 cm po vijojnë punën për vendosjen e të gjitha shtyllave.

Aktualisht janë vendosur 4 prej shtyllave të thyera ndërsa vijon puna dhe për ngritjenn e 4 të tjerave, ku dy prej tyre janë shtylla ndërmjetëse. Ndërsa janë riparuar dhe 3 shtylla që u dëmtuan pjesërisht dhe vijon puna për 4 të tjera.

Në ndihmë të brigadës së TL Juglindje është dhe një grup pune e OST të cilët po punojnë intensivisht për rikthimin e energjisë sa më shpejt tek të gjithë abonentët.