Back
25 Janar

Normalizohet situata e furnizimit me energji, ngarkesat në rrjet 50% më tepër

Operatori i Sistemit të Shpërndarjes ka marrë të gjitha masat për të përballuar situatën e furnizimit me energji elektrike, në kushtet e një moti të ftohtë me temperatura të ulëta dhe reshje bore, ngrica e stuhi ere.

Në terren janë angazhuar 2200 punonjës nga 11 rajonet e OSSH në vend të cilët prej fundjavës janë në punë 24 orë për të riparuar avaritë që janë shfaqur këto ditë në rrjetin e shpërndarjes.

Nga informacionet që përcjell në mënyrë periodike dispeceria qendrore në kompaninë OSSH, me uljen e ndjeshme të temperaturave, është rritur me 50 % ngarkesa në rrjetin elektrik ,në qendrën e Shqipërisë duke sjellë avari në fidera.

Grupet e OSSH, ndonëse në kushtet e motit ekstrem kanë vijuar punën duke eleminuar avarinë  dhe duke rikthyer energjinë në 95 % të zonave të prekura nga defektet.

Vijojnë të mbeten problematike disa zona malore të thella në rajonin e Burrelit dhe Peshkopisë ku defektet jannë kryesisht në linjat ajrore si këputje përcjellësash, thyerje izolatorësh apo rrëzim të shtyllave.

31 Dhjetor

Administratori i OSHEE: Kompania, bilanc pozitiv në 2021 në arkëtime dhe humbje

Në mbledhjen e fundvitit, e organizuar nga minstrja e Energjisë dhe Infrastrukturës Belinda Balluku, së bashku me administratorët e kompanive OST dhe Kesh, Administratori i OSHEE Grup, Adrian Ccela, renditi disa prej arritjeve pozitive të kompanisë për vitin 2021.

Ccela tha në fjalën e tij se megjithë vështirësitë që po kalon kompania OSHEE si pasojë e krizës energjetike ndërkombëtare, por dhe situatës financiare të krijuar si pasojë e pandemisë, viti 2021 mbyllet me tregues të kënaqshëm të nivelit të humbjeve dhe arkëtimeve.

Sipas tij, për 11-mujorin 2021, niveli i humbjeve teknike në rrjet mbyllet me 20.5 %, 1 ëprqind më mirë se viti i kaluar.

“Nëse krahasojmë  periudhën kur ka filluar kjo reformë ku  humbjet ishin në nivelin 45 përqind, ne kemi një përmirësim me 50 % të nivelit të humbjeve dhe nëse do të bënim një krahasim me megavat, janë 10 mln megavat të kursyera ose  600 milion euro më shumë të kursyera”, tha administratori i OSHEE.

Ccela u ndal konkretisht dhe në rajonet kryesore të vendit si Tirana e Elbasani të cilat kanë përmirësuar ndjeshëm nivelin e humbjeve dhe sot janë nën 14 % të nivelit të humbjeve ndërkohë që synimi është që të përmirësohet treguesi i humbjeve në rajonin e Shkodrës, nga 40 në 30 përqind.

Kurse niveli i arkëtimeve ka shënuar nivel rekord ku  janë arkëtuar 72 miliardë lekë.

Kreu i kompanisë OSHEE tha se ky është bilanci më i mirë i realizuar në 7 vite ku 101 % është niveli i arkëtimeve i realizuar për abonentët familjarë dhe 92 % për abonentët buxhetorë dhe jo buxhetorë, pra në total jemi në nivel arkëtimi 95 përqind.

Në analizën e performancës së kompanisë, administratori i OSHEE përmendi dhe investimet në rrjet, ku falë punës së realizuar ndër vite, OSHEE përmirësoi treguesit SAID/SAIF.

“Në vitin 2013, SAID ishte 117.5 jashtë cdo lloj standardi, në 2021 si 11 mujor është 42, në 2013 SAIF ishte 53.5 dhe në 10 mujorin e 2022 është 22.6.

Pra treguesit janë mëse të qartë, dhe janë të realizuara në cdo nivel drejtorie, ku përmirësimi është i paimagjinueshëm”, u shpreh administratori i OSHEE.

Ccela theksoi se prioritet I kompanisë për vitin 2022 është vazhdimi i investimeve ku në fund të 6-mujorit të parë dhe në vazhdim,  do të implementohet instalimi i matësave smart pas përfundimit të dy projekteve pilot në Tiranë dhe në Durrës.

“Tashmë  jemi gati të nisim instalimin e matësave smart  në drejtrorinë rajonale në Shkodër dhe në Durrës me instalimin e matësave smart në 3700 kabina që është 70 përqind e konsumit në këto dy qarqe dhe ajo që ne presim, është përmirësimi në nivelin e 70 përqind të humbjeve”, tha kreu i OSHEE.

Sipas Ccelës ky është loti iI parë që do të implementohet plotësisht në katër vitet e ardhshme.

Ndërkohë që ka nisur procesi i prokurimit me KfË dhe brenda tremujorit të parë të vitit  do të firmoset kontrata për nënstacionin e qendrës që pas 20 vitesh bëhet realitet dhe nëstacioni I Valiasit ku do të investohet totalisht në rrjetin TM/TU duke I dhënë fund gangrenizimit të rrjetit për qytetin e Tiranës.

Sa i takon mbarëvajtjes së furnizimit me energji elektrike, kreu i OSHEE garantoi se në terren janë 309 ekipe prej 3957 punonjësish që janë në gatishmëri për të riparuar në kohë sa më të shpejtë avaritë.

Ndërsa ministrja e Energjisë Belinda Balluku teksa vlerësoi arritjet pozitive të OSHEE, tha se me ndryshimet ligjore që ngarkojnë KESH të mbulojë furnizimin me energji të abonentëve familjarë dhe biznesin e vogël, OSHEE do të vijojë planin e investimeve.

“Pavarësisht vështirësive, ambicia jonë është që Shqipëria të kthehet në një vend eksportues të energjisë së pastër. Janë një sërë projekte të cilat tashmë e kanë marrë rrugën dhe shumë shpejt do të jenë realitet duke rritur ndjeshëm kapacitetet prodhuese energjetike në vend”, tha ministrja Balluku.

14 Dhjetor

Moti i keq. OSSH stabilizon situatën e furnizimit me energji elektrike

Prej disa ditësh, si pasojë e ndryshimeve drastike të motit, me reshje shiu e bore dhe temperatura të ulëta, rrjeti i shpërndarjes në disa zona të vendit u afektua duke shkaktuar probleme me furnzimin me energji elektrike për abonentët.

Operatori i Sistemit të Shpërndarjes, OSSH, në vijim të planit të masave për organizimin e punës në 11 drejtoritë rajonale, angazhoi në terren afro 2200 punonjës të brigadave të avarive, me qëllim eleminimin në kohë sa më të shpejtë të defekteve në fiderat dhe linjat e tensionit të mesëm.

Puna në terren u vështirësua dhe nga vërshimi I ujërave të lumenjve që në disa zona dolën nga shtrati sic ishte lumi Vjosa.

Nisur nga kjo situatë, OSSH ishte e detyruar të stakonte për masë sigurie disa fidera duke lënë pa tension disa kabina dhe nënstacione, sic ishte NST Grapsh dhe linja 35kV Ballsh-Poçem për efekt sigurie.

Në ndihmë të grupeve të tensionit të lartë të OSSH u afruan dhe grupet e avarisë së OST të cilat së bashku mundësuan riparimin e shpejtë të defektit dhe rikthimin e energjisë në pjesën më të madhe të abonentëve.

Defektet më të mëdha u shfaqën në zonat malore të Korçës, Burrelit dhe Dibrës.

Në këto zona vijon puna për riparimin e defekteve megjithëse terreni malor dhe ngricat vështirësojnë punën e grupeve të OSSH.

Në zonën e Korçës, defektet në rrjetin e OSSH u shkaktuan dhe nga palët e treta sic janë dy hecet Gjoka dhe Nica që operojnë në zonën e Korçës.

Përcjellat e tyre të djegur ranë mbi fiderat e OSSH duke lënë pa energji prej disa ditësh zonat Velçan, Strelcë, Moglicë, Lozhan, Senisht dhe Tresovë.

Në zonën e Dibrës,  vijon puna për vendosjen e shtyllave të rrëzuara në  fideirn Sllovë, përgjatë aksit Ceren dhe Vosije.

Në Gjirokastër vijon puna për rikthimin e linjës 35 kv Gjirokastra 2-Grapsh në punë dhe normalizimin e situatës me furnizimin me energji elektrike për zonat  Zagori, Grapsh, Dropull i Poshtëm dhe Dropulli i Sipërm

Në zonën e Shkodrës është vendosur në punë fideri i Kelmendit dhe një pjesë e kabinave në segmentin Lepushë-Budac dhe është rikthyer energjia në zonat që furnizohen me energji nga ky fider.

30 Nëntor

Moti i keq, Administratori i OSHEE: Në terren 2200 punonjës, kemi përgjysmuar kohën e riparimit të defekteve

Administratori i OSHEE Group, Adrian Çela në një intervistë me skype në studion e Neës 24, ka dhënë një pasqyrë të situatës së defekteve në rrjetin elektrik  si pasojë e motit të keq ekstrem, me reshje shiu intensive dhe stuhi ere e bore në zonat malore.

Ai shpjegoi se sipas planit organizativ të kryer nga Operatori i Sistemit të Shpërndarjes u bë e mundur që brenda 2 orëve të reduktohet në masën 50 % numri i fiderave me defekt.

Administratori i OSHEE-së shpjegoi se  ndërprerjet e energjisë patën si shkak stuhitë duke sjellë për pasojë defekte në linjat e tensionit të ulët dhe të mesëm.

“Kur kemi reshje të shumta bore dhe kohë të keqe, jemi koshientë që situata në të tilla raste do pasqyrohet dhe me rritje të defekteve.

Aktualisht kemi në terren 2200 punonjës, në gatishmëri 24 orë dhe situata ka ardhur drejt përmirësimit.

Në momentet që flasim nga 1200 fidera janë vetëm 12 fidera ende me defekt. 19218 abonentë janë pa energji elektrike në këto momente. 322 janë në zonat urbane”, u shpreh administratori i OSHEE Adrian Çela.

Lidhur me rastin e Dervicianit, ku pas përfshirjes së banesës nga flakët humbi jetën një 12-vjeçare, kreu i OSHEE i ka shprehur ngushëllime familjes së viktimës ndërsa kërkoi që të mos abuzohet me këtë rast.

“Një rast ekstrem dhe shumë tragjik. Më vjen keq që abuzohet me këtë rast. Ne nuk themi që kemi rrjetin më modern, kemi investuar, por për të investuar në rrjetin elektrik shqiptar duhen 30 vite.

 Gjatë natës për arsye teknike në shumë defekte është e pamundur ndërhyrja për shkak të rrezikut për punonjësit. Ne kemi pasur dhe raste të humbjes së jetës. Në shumë raste bëjmë dhe stakime për arsye sigurie, ku ka rritje të nivelit të ujit, për të mos pasur dëme më të mëdha kemi raste që i stakojmë, për të ruajtur jetën dhe pajisjet”, tha Çela.

Sipas administratorit të OSHEE, në rast se në vitin 2015 në të tilla situata numri i defekteve ka qenë shumë herë më i madh, investimet e kryera treguan se jemi më të përgatitur dhe më të gatshëm të riparojmë në kohë sa më të shpejtë defektet.

“Në orën 12 të natës kishim 16 fidera në të gjithë vendin pa energji. Në 3 shkoi 40 dhe në 9 të mëngjesit kishim 78 fidera pa energji. Pas dy orësh numri i fiderave zbriti në 38 dhe tani janë 12 fidera me 19218 abonentë. Situata më e rënduar është në Drejtorinë Rajonale Burrel.

Çdo një orë raportohet për përmirësimi ne situatës. në zonat ku ka ngarkesa kemi zhvendosur punonjësit. Në zonën e Dibrës po dërgojmë punonjës të tjerë për të realizuar kthimin e energjisë për banorët pa rënë nata. Ka zona ku vërtetë nuk arrin të hyhet. Ka gjëra që nuk parashikohen. Kërkojmë mirëkuptim dhe punonjësit e OSHEE, si këtë radhë dhe siç kanë demonstruar gjatë gjithë kësaj periudhe, do jenë në gatishmëri për të garantuar furnizimin me energji”, tha ai.

Çela foli dhe për mungesën e energjisë në zonën e Radhimës më 28 nëntor.

“Ishte një furtunal. Në Radhimë dhe gjithë zonën kemi planifikuar një investim të ri me rrjetin 20 kV. Ky rrjet aktual nuk mund të përballet me furtunalet. Në Orikum kemi një investim të ri, një rrjet.

Për shkak të situatës së ndërlikuar në tregjet energjetike dhe ne kemi qenë të detyruar të importojmë energji, kemi ndërprerë të gjitha investimet. Për shkak se jemi në këtë situatë nuk kemi arritur akoma ta implementojmë këtë investim. Shpresojmë gjatë 3-mujorit të vitit tjetër”, tha Çela.

15 Nëntor

Rama në Kuvend: Çmimi i energjisë për familjarët dhe biznesin e vogël nuk ndryshon, kostot do t’i përballojë shteti

Kryeministri Edi Rama, gjatë fjalës së mbajtur në kuvend për projektbuxhetin e vitit 2022, ka deklaruar se qeveria nuk do të ndryshojë çmimin e energjisë elektrike për abonentët familjarë dhe biznesin e vogël.

Rama tha se të gjitha kostot e parashikuara për mbulimin e këtij financimi do të përballohen nga buxheti i shtetit.

Duke iu referuar situatës së krijuar në vendet e rajonit si pasojë e krizës energjetike, kryeministri Rama tha se ata që po përballojnë koston e kësaj krize janë familjarët të cilët po paguajnë me tarifë më të lartë gazin dhe energjinë elektrike.

“Mbase shumëkush bën sikur nuk i sheh, sepse kështu i intereson ato që po ndodhin me çmimin e energjisë përreth, mbase shumëkush nuk do që ti shohë se cfarë po ndodh me  konsumatorët familjarë jo shumë larg nesh, ku debati kryesor është kostoja e stërngritur e ngrohjes për familjarët, por po i referohem Italisë, Greqisë e vendet e tjera rrotull që po përballen me rritje të lartë të cmimit të energjisë për familjarët e bizneset e vogla”, tha Rama.

Më tej ai theksoi se sic është premtuar qeveria do të mbrojë familjet dhe biznesin e vogël nga efektet e krizës energjetike.

“Do t’i qëndrojmë fort bindjes se do të jemi mburojë për famijet dhe për biznesin e vogël në raport me cmimin.

Ne do të vazhdojmë të mbajmë cmimin aktual të energjisë duke financuar për të kompensuar të gjithë koston, që është kosto që i faturohet arkës së shtetit dhe duke shpresuar se siç janë parashikimet në gjashtëmujorin e dytë të vitit të ardhshëm, vala e krizës do të zbutet”, tha kryeministri Rama.

12 Nëntor

Efiçienca e energjisë, Balluku dhe ambasadori zviceran firmosin marrëveshjen për “Projektin e Bashkive me Energji Inteligjente”

Ministrja e Infrastrukturës dhe Energjisë Belinda Balluku dhe Ambasadori zviceran Adrian Maître nënshkruan marrëveshjen për zbatimin e “Projektit të Bashkive me Energji Inteligjente” (SEMP), i cili do të vendosë modele të reja të menaxhimit të energjisë në të paktën katër bashki. Projekti i financuar nga Sekretariati Shtetëror Zviceran për Çështjet Ekonomike SECO ka një buxhet prej 5.3 milionë franga zvicerane – afërsisht 4.8 milionë euro.

“Efiçienca e energjisë dhe energjia e rinovueshme janë shtyllat e politikës së energjisë së qëndrueshme dhe renditen lart në listën e prioriteteve të shteteve anë e mbanë globit. Ministria e Infrastrukturës dhe Energjisë nëpërmjet dhe në bashkëpunim me Agjencinë për Efiçiencën e Energjisë është duke punuar intesivisht që të suportojë efiçiencën e energjisë në Shqipëri, si një koncept i ri, por me potencial të madh që premton fitime për qytetarët, mjedisin dhe vetë sistemin elektro-energjetik të vendit.

Rreth 270 mijë banorë të bashkive, pjesë e këtij projekti, do të përfitojnë drejtpërdrejtë apo në mënyrë të tërthortë nga kursimet në koston e energjisë, nga ndriçimi i përmirësuar publik në kuadër të investimeve dhe të përfitimeve të shpejta“, tha Ministrja e Infrastrukturës dhe Energjisë Belinda Balluku.

“Përfitimet janë të qarta: emetime më të ulëta të karbonit, cilësi më e mirë e jetës, reduktim i ndotjes, qytete më tërheqëse dhe kosto më të ulëta të energjisë. Le ta kthejmë këtë në një histori suksesi dhe në një shembull se si duhet të duket e ardhmja e energjisë në Shqipëri. Pres me padurim punën tonë të përbashkët për të ndërtuar bashki me efiçencë energjetike”, tha Ambasadori zviceran Adrian Maître.

Aktualisht bashkitë nuk kanë vendosur një kuadër për menaxhimin e energjisë. Prandaj projekti do të punojë për të krijuar kapacitete për menaxhim më inteligjent të energjisë me Agjencinë për Efiçiencën e Energjisë dhe bashkitë Shkodër, Korçë, Berat dhe Përmet, të cilat u përzgjodhën për fazën pilot pas një procesi me tre hapa. Një përfshirje më e gjerë e bashkive të tjera po përgatitet ndërkohë. SEMP gjithashtu do të prezantojë modelin e Çmimit Europian të Energjisë i cili është standardi për të asistuar bashkitë në të gjithë Europën përsa i përket efiçencës së energjisë, energjisë së rinovueshme, dhe lëvizshmërisë së qëndrueshme.

Bashkitë do të mbështeten me plane të integruara energjetike dhe gjithashtu do të shpërblehen për performancën e mirë me fonde investimi dhe ndihmë të mëtejshme. Disa investime në infrastrukturë – projekte të fitimit të shpejtë – do të shërbejnë si demonstrime të efiçiencës së energjisë dhe do të përfshijnë ndriçimin publik, ndërtesat dhe transportin. Rezultati kryesor që pritet është rritja e aftësisë së bashkive për të planifikuar dhe menaxhuar energjinë në mënyrë më efiçente. Përafërsisht 270,000 qytetarë do të përfitojnë nga përmirësimi i ndriçimit publik dhe ulja e kostove të energjisë.

Projekti do të jetë i pari që adreson menaxhimin e energjisë në nivel bashkie. Ai do të forcojë kapacitetet e bashkive dhe të institucioneve kombëtare për efiçencën energjetike si dhe do të prezantojë teknologji të reja dhe mekanizma financimi për tregun energjetik të Shqipërisë. Projekti është një hap i rëndësishëm në angazhimin e Zvicrës për të mbështetur Shqipërinë në përdorimin efiçent të energjisë dhe në adresimin e ndryshimeve klimatike.

12 Nëntor

Vijimi i reformave në sektorin e energjisë, firmoset huaja 50 mln euro me Agjencinë Franceze për Zhvillim

Sektori i energjisë do të mbështetet me një kredi të butë nga Agjencia Franceze për Zhvillim prej 50 milionë euro për vijimin e reformave energjetike.

Marrëveshja e huasë u firmos në emër të qeverisë shqiptare nga ministrja e Financave dhe Ekonomisë, Delina Ibrahimaj.

Në fjalën e saj, ministrja Ibrahimaj tha se kjo kredi synon të përmirësojë dhe të konsolidojë strukturën e OSHEE-së , ndarjen e 3 operatorëve të saj.

“Kjo kredi synon gjithashtu të nxisë funksionimin e bursës së energjisë dhe krijimin e një tregu konkurrues për energjinë”.

Ministrja e Financave tha se kjo kredi është në vijim të një marrëveshje tjetër kredie për sektorin e energjisë të financuar nga qeveria gjermane bazuar në marrëveshjen që qeveria shqiptare dhe qeveria gjermane dhe ajo francize kanë për nxitjen e reformave në sektorin e energjisë.

Gjatë ceremonisë së nënshkrimit të marrveshjes, ishte i pranishëm dhe zv/kryeministri Arben Ahmetaj.

Zv/kryeministri Ahmetaj u shpreh se kjo marrëveshje huaje është në vijim të marrëveshjes ndërqeveritare firmosur gjatë Konferencës së Donatorëve më 17 shkurt 2020,  firmosur nga kryeministri Rama.

“Prej shkurtit të vitit 2020 e deri më tani, është avancuar me 3 projekte të rëndësishme, 2 prej të cilëve janë mbështetje e drejtpërdrejtë buxhetore me shumën 100 mln euro, 50 mln euro secila krahas 3 mln euro asistencë teknike për reformën në sektorin e energjisë që u firmos gjatë ceremonisë së sotme”, u shpreh zv/kryeministri Ahmetaj.

Ahmetaj vlerësoi mirëmenaxhimin e kompanisë OSHEE Group, ku 450 mln euro investime kanë përmirësuar rrënjësisht cilësinë e furnizimit me energji elektrike.

Ai ka falenderuar donatorët në sektorin e energjisë që kanë bërë të mundur investimet dhe përkujdesjen për të avancuar me reformën në tregun e energjisë.

Gjithashtu, zv/kryeministri Ahmetaj vlerësoi gjithashtu dhe transparencën në blerjen e energjisë nga kompania OSHEE përmes platformës online.

Sipas tij, marrëveshja që firmosëm sot është një hap tjetër i mëtejshëm për të vijuar me reformat.

 “Suporti i rëndësishëm i qeverisë shqiptare që prej vitit 2019 afron bashkë agjenci të fuqishme ADF dhe KfË për të mbështetur në realizimin e disa objektivave si përmirësimi dhe qëndrueshmëria financiare e operatorëve të sektorit, krijimi i një tregu elektrik, një proces progresiv i derregullimit të tarifave dhe diversifikimit dhe i miksit elektrik të zhvillimit të energjive të rinovueshme”, tha Ahmetaj.

Në fund të fjalës së tij, zv/kryeministri Ahmetaj vlerësoi mbështetjen financiare dhe ekspertizën e ADF-së me shumën e parë 4 mln euro, si shenjë kjo e intensifikimit të marrëdhënieve politike dhe ekonomike mes Francës dhe Shqipërisë.

10 Nëntor

Janar 2022, bizneset në rrjetin TM dalin në treg të lirë, Balluku: OSHEE garanton furnizimin me energji elektrike

Ministrja e Energjisë dhe Infrastrukturës Belinda Balluku gjatë seancës dëgjimore në kuvend ka deklaruar se në kuadër të liberalizimit të tregut të energjisë, nga janari i vitit 2022 do të dalin në tregun e lirë bizneset e lidhur në tensionin e mesëm.

Balluku tha se ky është një detyrim ligjor, por nga ana tjetër këto subjekte biznesi kanë mundësi të zgjedhin ofertuesit me çmimin më të ulët.

Sipas saj,   OSHEE përmes Furnizuesit të Tregut të Lirë, FTL ofron sot çmimin më të ulët të energjisë dhe për këtë shkak shumë prej klientëve të tensionit të lartë të cilët kanë dalë prej vitesh në tregun e lirë, janë afruar pranë OSHEE për të përfituar nga ofertat e saj të blerjes së energjisë.

“Dalja e biznesit 35 Kv në tregun e lirë është detyrim ligjor që rrjedh nga angazhimet tona në entitetet e Bashkimit Evropian sic është Sekretariati i Energjisë, por kemi qenë ne që e kemi shtyrë këtë proces për të mos i ekspozuar ata”.

Sipas saj, në janar 2022 është detyrimi i fundit ligjor që përdoruesit e tensionit të mesëm të dalin në treg të lirë. Referuar afateve të vendosur në reformën e liberalizimit, kjo kategori biznesesh duhet të kishin dalë në tregun e lirë në 2018.

“Kemi kaluar çdo limit për të mos ekspozuar bizneset shqiptare në tregun energjetik dhe i kemi mbajtur me çmimin e paracaktuar që OSHEE ofron”, u shpreh në komisionin kuvendor të Ekonomisë, ministrja Balluku.

Në respekt të ligjit, ministrja sqaroi se përdoruesit e rrjetit TM do të kenë mundësi ta zgjedhin vetë operatorin se ku do të furnizohen me energji elektrike dhe një nga këta është FTL me çmime konkurruese, pjesë e OSHEE Group.

“Ne po bëjmë gjithcka  për të garantuar energji dhe për të mbajtur brenda sistemit dhe tensionin e mesëm, por me dëshirën e tyre, jo si një detyrim për të qëndruar me ne”, përfundoi ministrja e Energjisë dhe e Infrastrukturës.

09 Nëntor

OSHEE zbulon 237 raste të vjedhjes së energjisë, 130 procedime në polici

Strukturat e Operatorit të Shpërndarjes së Energjisë kanë identifikuar  237 raste të vjedhjes së energjisë elektrike në mbarë vendin.

Në një aksion të përbashkët me OSHEE, policia e shtetit, arrestoi në flagrancë rreth 58 abonentë të të denoncuar për veprën penale të vjedhjes së energjisë elektrike.

Nga ky aksion policia procedoi  penalisht 130 shtetas dhe janë shpallur në kërkim 34 shtetas të tjerë.

 Gjithashtu janë proceduar penalisht 4 punonjës të OSHEE-së, për “Shpërdorim detyre”.

Në një dalje për mediat, policia e shtetit njoftoi se pas denoncimit nga punonjësit e OSHEE Group, vetëm ditët e fundit, si rezultat i kontrolleve janë evidentuar 48 raste të vjedhjes së energjisë elektrike dhe janë arrestuar në flagrancë 12 shtetas dhe janë proceduar penalisht 33 shtetas, si dhe 3 punonjës të OSHEE-së, për shpërdorim detyre.

Policia e Shtetit ka ftuar qytetarët që të denoncojnë në numrin 112 dhe në Komisariatin Dixhital, çdo rast të paligjshmërisë, duke iu garantuar anonimat të sigurt, reagim të menjëhershëm, profesional e të paanshëm.

01 Nëntor

Divjakë, përfundon rikonstruksioni i nënstacionit 35/10kV, Balluku: 25 vite garanci, për furnizim cilësor me energji për zonën

Ministrja e Energjisë dhe Infrastrukturës Belinda Balluku, e shoqëruar nga drejtori i drejtorisë së Tensionit të Lartë në OSSH, Adriatik Kupi, ishin sot në Divjakë ku u përurua investimi i rikonstruksionit të plotë të NST Biçukas 35/10kV.

Ministrja Balluku tha se për të disatën herë OSSH po investon në Divjakë duke  përmirësuar cilësinë e furnizimit me energji jo vetëm për banorët, por dhe fermerët.

Sipas ministres, kjo zonë e njohur për ndjeshmërinë si pasojë e funksionimit të hidrovorëve, kishte një rrjet elektrik të ndërtuar që në vitet ’70.

“Kjo zonë e meriton të ketë vëmendjen totale të qeverisë, megjithë krizën energjetike që po përballon sot jo vetëm Shqipëria, por e gjithë bota.

Kynënstacion është i rëndësishëm, një nyje qendrore për furnizimin me energji në zonën Fier-Lushnje, i cili tashmë garanton një shërbim më të mirë duke mbuluar edhe nevojat e fermave bujqësore dhe subjekteve turistike të kësaj zone”, u shpreh ministrja Balluku.

Ministrja Balluku theksoi se kompania OSHEE Group prej disa vitesh ka përmirësuar treguesit financiarë sic janë niveli i humbjeve dhe rritja e arkëtimeve.

Sipas saj, si pasojë e trashëgimisë së një rrjeti të amortizuar, sic ishin më parë linjat në zonën e Divjakës, OSHEE fokusoi investimet në zonat ku rrjeti datonte prej viteve ’70.

““Është e dukshme që është investuar sepse shqiptarët nuk e kanë harruar se vitet 2007 dhe 2009 rrinin 6 orë pa drita ndërsa sot dhe kur ka ndërprerje për remont lajmërohet ditë më përpara.

OSHEE ka investuar 500 milionë euro në kapitalet e kompanisë por të gjitha këto investime janë të prekshme, të dukshme e të faktuara me nivelin e shërbimit që ne kemi. Qoftë me orët e ndërprerjes qoftë me minutazhin e ulët të ndërprerjeve dhe kur ka avari teknike, apo dhe me shërbimit që qytetarët marrin kudo”, tha ministrja Balluku.

Lidhur me pyetjet e ngritura nga opozita ditët e fundit, mbi arsyet e rritjes së numrit të punonjësve nga 2015 deri në 2021, ministrja Balluku tha se arsyeja lidhet me ofrimin e një shërbimi modern dhe sa më cilësor për abonentët.

“Deri dje, ne kishim një qendër të Kujdesit të Klientit për 1600 banorë dhe sot kemi një KNK për 600 abonentë. Sigurisht që këto investime janë të automatizuara por ato kërkojnë skuadra që ti mirëmbajnë dhe kërkojnë profesionistë për të ofruar më të mirën e shërbimit për qytetarët”, tha ministrja Balluku.

Lidhur me trashëgiminë e rrjetit të vjetër eneergjetik, ministrja Balluku tha se me dakordësinë dhe të kryeministrit Rama është duke u menduar hapja e një Muzeumi Energjetik për ti treguar brezave se sa i dukshëm ndërhyrja me investime, për të bërë diferencën midis asaj cfarë kaluam dhe asaj cfarë po përjetojmë.

“Kemi treguar me fakte që në parlament dhe komisione parlamentare se nuk janë rritur pagat e drejtuesve të kompanisë por të punonjësve që punojnë në kushte të vështira, në dimër e verë duke i shërbyer qytetarëve”, tha ministrja Balluku duke shtuar se kjo është arsyeja se megjithë krizën energjetike sot në botë, qeveria do të vazhdojë të mbrojë shtresat sociale përmes një pakete të miratuar në qeveri për ti ofruar atyre shërbim cilësor pa rritur çmimin e energjisë”, tha ministrja e Energjisë Belinda Balluku.

Drejtori i TL në OSSH, Adriatik Kupi tha se ky investim në NST Biçukas do ti përgjigjet nevojave për energji të kësaj zone për një periudhë kohore 25 vjecare ne vazhdim.

Sipas drejtorit të Tensionit të Lartë në OSSH ky nënstacion është i pajisur me impiante 35 kV dhe në impiante 90 si dhe në transformatorët me fuqi 10 MËA që do të përballojnë nevojat për furnizim me energji në periudha afatgjata.

Kupi tha se NST i Biçukasit kap vlerë 1.5 milionë euro dhe do të përmirësojë cilësinë e furnizimit me energji për rreth 12 mijë banorë.

Me investimin e ri të OSSH në NST Biçukas, zona e Divjakës nuk do të ketë probleme me cilësinë e furnizimit me energji, pasi pajisjet e tij janë bashkohore dhe të çertifikuara sipas standardeve bashkohore.